DÍLI----Ministru Transporte no Komunikasaun (MTK) José Agustinho da Silva, hatete Governu liuhusi Ministeriu Transporte no Komunikasaun (MTK) iha vontade tomak atu oinsa promove setor privadu sira, tantu setor telekomunikasaun nomos setor transporte aero, maritima no transporte terestre maibe kompañia ka ajensia tenki hetan autorizasaun lisensiamentu husi Servico de Rejisto e Verificação Emprezarial (SERVE).

“Governu atraves MTK iha vontade tomak oinsa mak promove ita-nia setor privadu sira tantu iha setor telekomunikasoens nomos iha setor transporte aero, maritima no transporte terestre, agora liga ba movimentu aero nian ba ita-nia sidadaun sira ne’ebé mak interese para atu harii no atu fasilita ita-nia timoroan sira dahuluk, sira tenki priense rekejitus, ha’u hanoin ne’e laos buat foun kuandu ita ejiste hanesan kompaiñia ida ka ajensia ida sira tenki iha autorizasaun lisensiamentu ne’ebé mak rejistu iha SERVE ne’e rekejitu komun ne’ebé mak parte hotu-hotu tenki kumpri,” hateten MTK José Agustinho da Silva ba jornalista sira iha salaun ANC Merkadu-Lama, Díli, Segunda (03/05).

Nia hatutan, Durante ne’e MTK nia mandatu akontese dala rua mak akontese mak la prepara uluk rekejitus maibé orienta ema mobilize uluk fali tiket. “Agora liga ba autoridade aviasaun sivil ita-nia esperiensia ha’u haree durante iha ha’u-nia mandatu akontese dala rua ona buat ida ne’ebé mak akontese mak ne’e la prepara uluk rekejitu maibé ita orienta ema, mobiliza uluk fali ema faan tiket depois ema hotu kuandu asesu ona mobilize ema ba konsentra tiha iha fatin ida depois mak sira impoen fali governu ha’u hanoin ne’e buat ida ne’ebé ladun kolaborativu tenki priense rekejitus uluk,” Salienta nia.

Nia informa, Kona ba foin dadauk ita-nia sidadaun ne’e komete asuntu hanesaan, se nia orienta ema para mobiliza sosa faan tiket maibé ita-nia sidadaun ne’e rasik nia individu ninia rejistrasaun mos la iha la priense rekejitu no rekejitus la iha depois ita mobiliza uluk ema ikus mai iha faktus hatudu katak ita-nia ema sira ne’e balun ba hanesana terlantar hanoin ne’e attitude ida ne’ebé ladun diak.

Nia esplika, Ba oin se se deit mai iha ne’e para ita orienta se hakarak interese investe iha parte ruma prinse rekejitu, tenki ba SERVE uluk se hakarak halo ligasaun ruma ho kompañia Aero Lines ruma ne’e tenki iha akordu individu ne’e ho kompañia aero lines no kompañia aero lines sei indika katak ida hanesan ne’e mak nu’uadar reprejentante kompañia Aero lines iha Timor no sira nia ejistensia tenki rejistu iha autoridade Aviasaun Sivil Timor-Leste nian.

Maibé ida foin liu ba ne’e la iha entaun ninia implikasaun halo ita-nia sidadaun balun joven sira balu ba iha ema nia rai ho tan situasaun Estadu emerjensia ita hatene ema nia situasaun nasaun ida-idak la hanesan liga ba situasaun pandemia covid-19 ida ne’e.

“Tanba ne’e ha’u hanoin ba futuru ita kuidadu maibé ha’u ohin mak rona tan dehan iha kompañia balun sira komesa faan tan ona tiket, ha’u fo ona atensaun ba autoridade aviasaun sivil para haree se mak faan tiket bele faan maibé ha’u nia orientasaun mak dahuluk tenki koordena, prepara uluk rekejitu para bainhira avansa ne’e serteja no ita-nia ema sira ne’ebé mak ba karik sira mos la iha difikuldade bainhira iha dalan klaran sira hetan problema,” Dehan nia

Nia Informa, Ita-nia hakarak mak ne’e fasilita husi inisiu too ba fatin distinasaun ne’e ho seguru, labele too iha dalan klaran mak ita-nia sidadaun sira ne’e hetan problema iha ne’eba ikus mai ita tenki esforsu oinsa mak halo fali repatriasaun. (BT)