DÍLI----Ministru Edukasaun Joventude No Desportu (MEJD), Armindo Maia Hatete ohin Governu ho Embaixador Portugueza iha Timor-Leste no UNICEF hala'o observasun ba eskola sira ne'ebe hetan estragus husi inundasaun foin lalais iha loron 4 fulan Abril semana kotuk liuba atu oinsa hare kondisaun tanba parte governu halo ona levantamentu kuaze eskola 27 mak afetadu husi inundasaun iha teritoriu laran tomak inklui mos eskola Kasnafar.

“Ohin ita hala'o vizita ba fatin eskola sira ne'ebe sai sentru deslokadus ba komunidade sira ne'ebe afeitadu ba inundasaun au mesmu tempu apoiu mos buat ruma ba sira no sei fundu ita hare mos ita-nia eskola sira ne'ebe afetadus,” Dehan Ministru Edukasaun Joventude no Desportu, Armindo Maia ba jornalista sira Iha eskola ensinu Bazika Kasnafar Manleuana, Sabadu (17/04)

Governante hatutan, Governu halo ona levantamentu maibe tenke tun direita hare kondisaun estragus ne’e oinsa hodi nune’e bele hadia diak liutan iha futuru mai. “Ami halo hotu ona levantamentu sira hamutuk eskola 27 iha teritoriu laran tomak maibe barak liu mak iha Díli hanesan ita hare dadauk eskola Kasnafar ne'ebe estragus total,” dehan governante ne'e.

Ministru edukasaun relata eskola ne'ebe hetan estragus husi inundasaun tama ona iha planu 2021 nian maibe nivel destruisaun sei a’at teb-tebes. “Emfelizmente iha Díli ne'e eskola sira ne'e tama hotu ona iha planu 2021 nian soke nivel destruisaun ne'e a'at tebe-tebes maibe buat sira ne'e hotu ita sei halo levantamentu,” Esplika nia. 

Nia dehan, Ministériu Edukasaun Joventude no Desportu sei halo kordensaun ho Ministériu Obras Publikas hodi aranka ekipamentus pezadus nune'e bele normaliza hikas fali fatin ne'ebe hetan estragus husi inundasaun foin lalais ne'e. Iha okajiaun ne'e Kordenadór eskola Kasnafar, Alarico Antonio de Sá Freitas  haktuir tan katak, inundasaun ne'ebe akontese iha loron 4 fulan Abril foin lalais ne’e, kuaze estraga total fasilidade eskola nian.

“Akontese ne'e iha loron 3 fulan Abril ne'e i depois loron 4 madrugada mak hotu-hotu afetadu inklui mos eskola Kasnafar ne'ebe kondisaun grave liu no dokumentus hotu estragus total no ohin ami rekomenda ona ba Ministru Edukasaun atu bele hare asuntu ne'e,” Haktuir Kordenador eskola Kasnafar.

Responsavel ne’e mos rekomenda ba governu liuhusi Ministériu Edukasaun Joventude no Desportu atu normaliza lalais fatin ne'ebe afetadu nune'e iha tempu seluk labele Akontese tan. Nia dehan tan, Eskola baziku Kasnafar iha sala de aula hamutuk-5 no sala tau dokumentus-1 hetan estragus total husi inundasaun foin lalais ne'e. Nune’e, Total estudantes husi eskola Kasnafar hamutuk-154 no profesores permanente na'in-4 no voluntariu na'in-3.

Portantu, Durante hala'o observasun ba eskola baziku Kasnafar husi Ministru Edukasaun Joventude No Desportu, Armindo Maia hetan akompaina husi Vice-Ministru Edukasaun Joventude No Desportu António Guterres, Embaxador Portugal Iha Timor-Leste José Pedro Machado no reprezentante UNICEF. (BT)