DÍLI----Xefe Juventude Metiaut, Antonio Ferreira hatete relasiona ho akontesimentu iha loron 4 Abril (hahú husi Sabadu kalan too Domingu dadersan) ne’ebe mak akontese udan ho variedade boot hamosu inundasaun bee sa’e ba populasaun ka komunidade sira iha territoriu laran tomak liliu iha kapital Dili, ema barak afeita no lakon vida.

Ho situasaun ida ne’e, supermarket Jacinto fó apoiu ba familia-35 iha Aldeia-1 ho Aldeia-2, Suku Metiaut, Postu Administrativu Kristu-Rei, familia refere fo agredese ba apoiu tomak husi Supermarket Jacinto Group Lda.

“Inundasaun ne’ebé bo’ot, familia sira ne’ebé hetan afetadu maka'as, agora sira hotu hela iha eskola EBC Metiaut, ami halo regista bá familia-35 ne’ebé sai ameasa bá sira-nia hela fatin, hetan uma grave husi udan no anin-bo’ot maibe agradese no orgulhu bo’ot bá Supermarket Jacinto ne’ebe reprezentante husi Karen Guterres Uitomo, bele fó ona apoiu bá ami-nia populasaun sira ne’ebé lakon sira nia uma no sasán, Metiaut-oan senti kontenti tanba bele hetan ona apoiu husi Supermarket Jacinto,” hatete Xefe Juventude Metiaut, Antonio Ferreira bá jornalista BT iha Metiaut, Kuarta (07/04).

Nia dehan, Husi parte Governu nian to’o agora sei-da’uk mai haree familia sira ne’ebé iha risku bá inundasaun, hato’o ona bá munisipal maibé sei-da’uk iha responde memzu liuhusi Reuniaun Konsellu Ministru deklara Serka Sanitaria no Konfinamentu Obrigatóriu to’o 17 Abril, ho ida ne’e dezastre bá inundasaun ita tenki mós tetu hamutuk hodi fó mensagem bá familia-35 tanba moras Covid-19 ne’ebé iha ita-nia Nasaun Timor-Leste.

Nune’e, Husu nafatin bá familia sira hodi mantein nafatin protokolu husi Ministeriu saúde, fase liman, mantein distansia sosiál, uza maskra no labele halibur malu hamutuk, to’o ita hein governu responde ita-nia nesesidade. “Ami mós infrenta bá be’e mós tanba tanke ne’ebé ense be’e hodi liga mai Metiaut kanu tohar no be’e labele mai, ami uza udan ben hodi tein no ba uza nian,” nia subliña.

Iha fatin hanesan familia afeitadu husi komunidade Metiaut, Deolindo Soares, haktuir katak inundasaun fó impaktu bo’ot ba ami, tanba rai-monu no estraga hotu ami-nia sasán no uma, agora ami mai hela hotu iha escola EBC Metiaut. “Ohin loron governu seidauk mai haree ami familia-35, supermarket Jacinto, mak fó ajuda ona ami, ami agradese bá Supermarket Jacinto tanba fó ona ajuda bá ami populasaun ne’ebé hasoru iha situaasaun inundasaun,”Salienta familia afeitadu Deolindo.

Nia informa, Antes udan bo’ot no anin, ami la akontese rai monu hodi estraga ami-nia sasán, ho Kompañia ne’ebé loke dalan husi Primeiru Ministru nian, halo bé dalan atu halai ba mai ladi’ak, entaun ho ida ne’e fó risku bá ami ne’ebé hela iha-okos, tanba ho udan bo’ot be dalan laiha, bele sai fali mota bá ami ne’ebé hela iha-okos, hodi estraga ami nia uma no ami nia sasán. (BT)