DILI—Difikuldade ne’ebe durante ne’e setor privadu hasoru liu-liu mak iha parte finansas tanba to ohin loron seidauk iha banku ida mak fo kreditu ba sira. Tanba ne’e, governu foun atu kria kondisaun hodi hare ba kestaun ne’e atu sira bele kontribui mos ba prosesu dezenvolvimentu nasional.

Diretor kompañia Tinolina Agustino Gomes hatete lia hirak ne’e bainhira husu nia hanoin kona-ba kbiit setor privadu sira nian atu kontribui ba dezenvolvimentu nasional. “Realidade tinan hirak ne’e setor privadu hetan difikuldade ba finansas, maske nasaun Timor-Leste hamrik tinan sanulu (10) ona,”dehan Agustino Gomes.

Nia parte husu ba governu foun atu fo fiar hodi kontinua nafatin projetu ne’ebe la remata. Tanba emprezariu sira iha setor privadu ne’ebe foin hamrik, sosa ekipamentu hetan kedas projetu. Ne’e duni, ida ne’e la dun di’ak ba setor privadu sira ne’ebe iha ekipamentu barak. Governu tenke identifika kada setor privadu ida-idak.

Hodi nune’e governu bele hatene kbi’it setor privadu to’o ona iha ne’ebe, saida mak sira bele halo no saida mak sira labele halo. Ekipamentu saida mak la iha no saida mak sira iha, lamenta Agustino. “Ami tenke identifika prioridade saida mak atu halo uluk. Iha IV Governu Konstituisional ita hare halai liu ba eletrisidade. Maibe eletrisidade rezolve agora dadaun tama fali estrada.

Hakarak ou lakohi V Governu presiza hadia kondisaun estrada iha teritoriu tomak,” director Tinolina Lda ne’e hatete. Nia hatete importante tebes bainhira kondisaun ekonomia no prosesu dezenvolvimentu la’o di’ak, povu sira hetan ona fasilidade hanesan uma di’ak, bee moos no tratamentu saude.

Programa Projetu Dezenvolvimentu Dezentralizasaun (PDD) no pakote referendun hala’o desentralizasaun iha distritu. Uluk osan konsentra de’it iha kapital Dili maibe, hare ba politika IV Governu ne’ebe aprezenta nia Planu Estratejia Dezenvolvimentu Nasional husi Primeiru Ministru Kay Rala Xanana Gusmão, tuir nia hatete diak tebes.

Ne’e duni, desentralizasaun tenke kontinua no aumenta ba beibeik. Tanba setor privadu tenke forma munisipiu hodi bele liga kbi’it atu dezenvolve ida-idak nia distritu. Tan ne’e, nia optimista projetu hirak ne’e sei entrega ba governu foun. Maske governu seluk mai mos projetu ne’e tenke kontinua tanba governu asina ona.(R-5)