Asuransi

OSSÚ----Eskola Basiku Filial (EBF) Mua-Imi iha aldeia Umatamene, suku Ossorua, postu administrativu Ossú, Munispiu Vikeke, menus infraestrutura hanesan bee-moos no moru protesaun ne’ebé mak laiha atu haleu eskola.

“Hanesan iha eskola ne’e menus infraestrutura mak hanesan liliu ba bee-moos tanba bee importante depois komesa eskola koloka iha tinan 2007 to’o agora bee nunka atu tama iha eskola laran, depois liliu ba hanesan moru ne’ebé atu haleu eskola ne’e laiha tanba labarik ki’ik tesi ai halo tiha lutu la kleur lutu ne’e dodok entaun karau tama iha eskola laran entaun buat hotu-hotu laiha,” hatete Koredenador EBF Mua-Imi António Amaral ba jornalista BT iha nia kna’ar fatin EBF Mua-Imi, aldeia Umatamene, Ossú, Vikeke, Sabadu (31/10).

Nia hatutan, aredores iha eskola EBF ne’e luan tebes tanba ne’e husu ba governu bele loke kampu futebol maibé iha eskola kotuk mós rai halai oinsa governu bele tau matan ba buat sira ne’e. “Ami nia aredores eskola ne’e luan tebes tanba ne’e husu ba governu se bele karik oinsa loke kampu futebol no iha ami nia eskola kotuk mos rai halai besik ona eskola tanba ne’e estadu bele tau matan tanba uluk ami kuda ai iha ne’eba mak sei tahan hela nune’e estadu bele haree buat sira ne’e hotu maibe importante liu mak bee tanba bee laiha ne’e ami la halo buat ida,” hatutan António

Nia informa, Tanba agora mos pandemia Covid-19 mosu, entaun ita tenki uza bee maibé bee laiha ami haka’as labarik sira atu kuru tau tiha eskola maibe tempu agora mos bee maran hela. Nia dehan, Se bele karik estadu bele tau matan no buka took dalan ida hodi dada bee ba eskola ida ne’e tanba bee ne’e mak ami araska tebes tanba ne’e oitavu governu bele tau matan ba ami nia eskola EBF Mua-Imi.

“Kona-ba buat seluk iha ami nia eskola ne’e alunu uituan deit no liliu ba meza kadeira ne’e ha’u rasik direitamente iha tempu ne’ebé ministru sesante nian ne’e meza kadeira ne’e kompletu maibé menus liu ba ami mak bee-mos tanba to’o agora bee nunka atu tama iha eskola ne’e, sira mai halo peskiza atu dada bee mai maibé to’o agora ema ida nunka mosu mai fali atu dada bee ba iha eskola ida ne’e,” dehan nia

Nia esplika, Tanba dadaun ne’e ami halo ona proposta ba ministeriu relevante katak ami atu halo kampu futebol, basketbol no voleibol tanba rai luan no hotu-hotu kapaas tanba ne’e sira mai haree ami nia eskola Mua-Imi ne’e rai luan lolos ne’e atu loke eskola boot mos be’e ida ne’e mak ema rain nain dehan katak prontu atu loke saida deit iha ne’e mos sira prontu atu simu tanba rai ne’e luan, Tanba ne’e mak ami nia hakarak uluk ami hatama ona proposta.

Nia haktuir, Estudante ne’ebé daudaun ne’e hala’o sira nia estudu iha eskola ne’e hamutuk 70 no professor ne’ebé hanorin iha eskola ne’e permanente na’in-2 kontratadu na’in-2 agora iha sexta ne’e professor na’in-2 ba tuir eskola iha sexta no sabadu maibé profesora laiha ami hotu-hotu mane deit. (BT)