Asuransi

DÍLI----Primeiru Ministru (PM) Governu da Ualu, Taur Matan Ruak sente kontenti tanbá Parlamentu Nasionál aprova Orsamentu Jerál Estadu (OJE) 2020 ho Votus afavor-43, Kontra-21 no Abstensaun ida (1) nune’e passa iha votasaun final global iha Parlamentu nasional. Nune’e husi OJE ne’ebe mak passa ona, lori VIII Governu Konstituisionál agradese ba Meza Parlamentu Nasionál no deputadu sira tomák espesial ba bankada Governu ne'ebé mak fó apoiu tomák ba Governu.

Ba votasaun finál global ba Orsamentu Jerál Estadu 2020 ho Votus A-favor (43) Kontra (21) no Abstensaun (1) nune'e proposta lei númeru 22/V terseira Orsamentu Jerál Estadu 2020 aprovadu iha Parlamentu Nasionál. “Ha'u kontenti los tanbá lei proposta orsamentu jerál estadu 2020 finalmente Passa iha finál global iha Parlamentu Nasionál,” Dehan Xefí Governu Taur Matan Ruak hafoin remata Debate Orsamentu Jerál Estadu 2020 iha Parlamentu Nasionál, Kinta (08/10).

PM lori VIII Governu Konstituisionál nia naran agradese ba Prezidenti Parlamentu Nasionál no meza Parlamentu Nasionál nian, distintus no distintas deputadu no deputada sira tomák espesial ba Bankada Governu nian ne'ebé mak fó apoiu ba Governu. Lider VIII Governu ne'e klarifika, ha'u mós hakarak lori VIII Governu Konstituisionál nia naran fó saudasaun ba partidu opozisaun, ne'ebé mak durante ne'e fó kontribuisaun.

Prezidenti Partidu Demokrátiku (PD) Mariano Assanami Sabino informa, kaer metin prinsipiu prontu fó apoiu ba proposta Orsamentu Jerál Estadu 2020, hodi nune'e bele hadia setór privadu, hakotu impasse Polítika no hadia dezenvolvimentu ne'ebé iha area rurais. “Partidu Demokrátiku (PD) kaer nafátin ninia prinsipiu katak, prontu atu fó apoiu hodi hakotu impasse Polítika, hodi normaliza ekonómia normaliza funsionamentu instituisaun demokrátiku no normaliza diálogu entre ba ukun na'in sira,” Dehan Prezidenti Partidu Demokrátiku (PPD) Assanami hafoin remata votasaun orsamentu jerál estadu hato'o intervensaun iha Parlamentu Nasionál.

Assanami esplika, Ho PD-nia apoiu ba Orsamentu Jerál Estadu 2020, hodi bele kontinua halo dezenvolvimentu iha área infraestrutura hanesan hadia Eletrisidade, Bee-Moos no Estrada ne'ebé mak seidauk finaliza iha baze ne'ebé mak durante povu infrenta. "Ho ida ne'e Partidu Demokrátiku fó apoiu nafátin ba Orsamentu Jerál Estadu 2020, atu kontinua iha no halo remata ba dezenvolvimentu infraestrutura Eletrisidade, Bee-Moos no Estrada ne'ebé mak seidauk finaliza," Assanami informa

Hanesan reprezenta Povu ne'e Kontinua fó apoiu hodi bele reforsa politika, liu-liu dezentralizasaun ho objetivu atu hakbesik ukun ne'e ba Povu no Povu hakbesik ba ukun, hodi apoiu ba Xefí Suku no Xefí Aldeia ba konsellu Suku KPK no estrutura Munisípiu sira, atu nune'e bele aselera lais dekonsentasaun no dezentralizasaun, hodi nune'e dezenvolvimentu iha rurais bele la'o. Ho nune'e mos apoiu ba professór Doutór no Médiku sira, hodi nune'e timoroan hotu, tenki iha aproveitamente ne'ebé mak hanesan matenek no saudavel.

Enkuantu apoiu ba Edukasaun Ensinu Superiór no apoiu mós ba Ministériu Saúde, hodi tau matan liu-liu ba Jerasaun foun, tanbá PD preokupa tebés ba Jerasaun foun ne'ebé mak husi tinan 1999 mai leten. Signifika, “PD nafátin fó apoiu ba modernizasaun iha ita-nia sosiedade, inklui funsionamentu husi leten ba kraik tenki serví ho di'ak, ho husi kraik bele komprende no hatene mós bele asesu informasaun. PD mós fó apoiu tomák ba Kabel Sumarino ne'ebé mak atu dezenvolve husi Kosta Súl no loke dalan ba Kosta Norte, hodi nune'e Setór Privadu sira bele tama,” Salienta nia.

Nia afirma, Tanbá ne'e fasil liu ba Setór Privadu sira, husi Setór Privadu ema barak mak halo ona estudu ba iha parte ida ne'e, ita hanoin katak lalais liu hodi hatun folin internet ne'ebé mak to'o agora karun tebés, tanbá bele fó impaktu ba investimentu ne'ebé atu mai Timor-Leste. Nia haktuir katak, PD argumenta sei fó apoiu hodi bele kapitaliza Banku Nasionál, liu-liu ba iha Orsamentu Jerál Estadu 2021, PD seí halo proposta atu fó apoiu ida ne'e, tanbá Banku Nasionál bele fó fasilita ba Setór Privadu, Setór Públiku no Setór Kooperativa liu husi asosiasaun mikro no pekena impreza sira.

Alende ne'e mós “PD fó nafátin apoiu liu-liu iha tinan 2021, nune'e dezenvolvimentu iha Kosta Súl ita presiza tebés, tanbá ita independente Mina Rai husi Bayu Undang, maibé ita tenki aselera lais hodi nune'e ita nafátin iha reseita ne'ebé mak boot,” Tenik nia. Nia Hateten, PD sujere nafátin liu-liu iha transporte investe iha Pras Kapitál no lead entre Díli ho Munisípiu sira, hodi ita bele moderniza lalais no fasilita lalais ba mobilizasaun Povu. Nomos PD mós fó apoiu ba Veteranu kombatente liu-liu ba Veteranu nia oan sira, Uma ba Veteranu ne'ebé mak Tinan 24 tenki fó atensaun másimu ba situasaun sira ne'e.

“PD mantein preokupa ba Jerasaun foun sira, ne'ebé mak laiha esperansa atu servisu iha ita nia rai, tanbá ne'e PD husu Governu orsamentu 2021 mai ho espetativa ida, ne'ebé mak atu projeta ba joven, hira mak servisu iha ita nia rai, Timor Ba Ita Hotu, Ita Hotu Ba Timor, Ba O Timor Maubere Oan Prontu Serví,” Informa nia. Alende ne'e mós Partidu Frenti Mudansa (FM) Isabel Ximenes haktuir katak fó apoiu ba Orsamentu Jerál Estadu 2020, hodi hadia dezenvolvimentu ne'ebé mak hanesan Elétrisidade, Estrada no iha área sira seluk, hodi fó apoiu mós setór privadu emprezáriu kooperativa fundasaun no asosiasoens.

Isabel akresenta liu tan, fó apoiu ba Orsamentu Jerál Estadu 2020, nune'e setór ekonómia naun formal sira, fila liman ki'ik sira, iha tasi ibun no fila liman iha merkadu no kios sira, vendedores ambulante inan aman fila liman kondutores no Setór naun formal sira seluk. “Ho nune'e Bankada Frenti Mudansa fó apoiu ba iha orsamentu jerál estadu 2020 hodi nune'e povu sira bele moris ho di'ak,” Informa nia. Deputadu Partidu Demokrátiku (PD) Adriano Nascimento hatutan, orsamentu ida ne'e orsamentu ne'ebé mak ita hein hodi hakotu duadésimu, tanbá rejime duadésimu ne'e limita ita no limita estadu no Governu, atu responde nesesidade povu no nasaun nian.

“Orsamentu ida ne'e fó biban ba ita atu restaura ita-nia dezentendimentu restaura ita-nia difikuldade hodi bele la'o ho di'ak, liu-liu funsionamentu makina estadu nian. Ha'u esperansa ba VIII Governu Konstituisionál ida ne'e atu bele fó esperansa hikas ba povu no nasaun, nune'e bele hatúr kredibilidade estadu Timor-Leste nu'udár nasaun ida iha mundu iha respeita nu'udár nasaun ukun rasik an,” Salienta nia.

Alende ne'e mós Partidu UDT Francisco David hatete katak, Item barak hodi selu divída de'it, espera katak iha futuru mai Governu labele halo dívidas ba Kompañia sira hodi halo jestaun ida ne'ebé mak di'ak, ho kualidade ba membru Governu sira di'ak, ba futuru mai nasaun ne'e bele la'o ba oin. “UDT apoiu tomák, iha finál global, ha'u foti Abstensaun ba Orsamentu Jerál Estadu 2020, ho razaun indiretamente motivasaun ida atu halo servisu makás liu tan nune'e futuru mai orsamentu ho Votus A-favor iha finál global,” dehan nia.

Iha oportunidade ne'e mós husi Xefí Bankada FRETILIN Francisco Miranda Branco haktuir tan, iha futuru orsamentu mai husu ba lider no nai ulun ukun na'in sira investe makás iha área Agrikultura, Turizmu, Peska, Pekuária, Edukasaun, Saúde, tanbá ita-nia dependensia ba fundu petrolíferu. Tanbá ne'e, tinan barak ita lahatur ema nu'udár sentru polítika dezenvolvimentu nasionál hanessn Setór Saúde, Edukasaun, Turizmu ne'ebé mak ita ladun fó atensaun ne'ebé mak di'ak no Agrikultura ita nia povu 70% ba moris agrikultura. Ho nune'e, iha Orsamentu Jerál Estadu 2020, seí aloka ba medida rekoperasaun ekonómiku ba kurtu prazu, miloens $113, ne'ebé ami fiar seí sirkula tomák iha ita nia rai laran, hodi nune'e bele fó benefísiu ba ita nia povu, no fó servisu direta ba agrikultura sira. (BT)