Asuransi

DÍLI----Parlamentu Nasional iha loron 8 fulan Outubru tinan 2020, aprova ona iha final global ba Proposta de Lei no. 22/V (3ª) - Orsamentu Jeral Estadu (OJE) tinan 2020 nian, ho votus 43 a favor, 21 Kontra no 1 abstensaun. Antes hakat ba votasaun final global, Deputadu sira halo uluk aprovasaun ba artigu hirak ne’ebé seidauk hetan aprovasaun, hahú husi artigu 22 no termina iha artigu 27 ne’ebé regula kona-ba entrada em vigor.

Hafoin votasaun final global, Prezidente Parlamentu Nasional informa kedas ba Komisaun C hodi halo redasaun final no haruka ba gabinete Prezidente Parlamentu no envia ba Prezidente Repúblika hodi halo promulgasaun. Deputadu sira mós halo deklarasaun votu hodi deklara opiniaun no pozisaun politika kona-ba OJE 2020 ne’e. Sessaun Plenária ne’e prezide husi Prezidente Parlamentu Nasional, Aniceto Longuinhos Guterres Lopes, akompaña husi membru Meza sira no marka prezensa husi Primeiru Ministru, Taur Matan Ruak, akompaña ho nia membru Governu sira. (KI)