Asuransi


DÍLI----Reitor Úniversidade de Díli (UNDIL) José Agostinho Belo sente triste, tanbá Timor-Leste la aprende sistema jestaun ne’ebé di’ak husi nasaun ne’ebé ninia dezenvolvimentu avansadu ona hodi bele kria kondisaun iha Timor-Leste.

“Ita triste oituan, tanbá ita nia nasaun ne'ebé mak ki'ik no populasaun ne'ebé mak oituan, no orsamentu ne'ebé mak maromak fó tulun ita iha minarai, maibé ita nia jestaun ne'e ita la aprende ho nasaun sira ne'ebé mak post konflitu, katak ho orsamentu oituan, maibé sira bele halo mudansa,” Dehan Retitó UNDIL ba Jornalista Semanál Business Timor (BT) iha nia kn'ar fátin UNDIL Maskariñas, Segunda (24/08) hafoin husu ninia observasaun ba dezenvolvimentu ohin loron.

Reitór ne'e esplika, rai sira ne'ebé Timor-Leste atu aprende tuir sira ninia jestaun mak hanesan Kambodia no nasaun sira ne'ebé mak post konflitu, hodi nune'e bele kria industria fabrika no investimentu iha Timor-Leste. “Fátin iha referensia Kambodia rai ida ne'ebé mak post konflitu, maibé agora nasaun ida ne'ebé iha indústria, fabrika no iha investimentu ne'ebé mak bo’ot, no rekursu umanu ne'ebé mak forti, tanbá ema nia polítika ba rekursu umanu no investimentu ekonómia ne'ebé mak bo’ot, katak haruka ema ba eskola iha rai liur la'os haruka na'in-5 no na’in-6 de'it, maibé haruka ba kuaze 200 no 300," dehan nia

Akademista ne'e argumenta, 200 no 300 fila-fali mai matenek no kapasidade ne'ebé mak bo’ot, iha efetvidade atu bele promove ita nia ekonómia ho di'ak, ita la aprende ho diak, ita nia ivestimentu ba rekursu umanus menus, laiha kualidade ne'ebé mak di'ak, entaun labele fó retornu ne'ebé di'ak no lalais iha tempu badak.

Reitor relata, rekoperasaun ekonómia ita tenki hare husi aspeitu sira ne'ebé mak iha importante, Timor ita iha fátin turizmu ho potensiál, ita iha agrikultura ne'ebé potensiál, ho edukasaun mós importante, maibé iha ita nia rai agrikultura ne'e la'os ministériu ida bolu dehan kredibilidade, atu bele iha produsaun ne'ebé mak forti, atu bele ekonómia ne'e forti.

Maibé ita laiha, ita tratór ne'ebé mak barak, maibé ita nia produsaun ne'ebé laiha, kompara ho nasaun viziñu Indonézia nia tempu, ema halo transmigrasaun iha agrikultura oituan, maibé rendimentu barak, hektar ida bele kualidade ho kuantidade ne'ebé mak bo’ot, agora ita hektar kuaze lato'o, ne'e faktor ida ne'ebé mak importante. José esplika ba Jornalista BT katak, koalia kona-bá turizmu iha tasi ne'ebé mak potensiál, ita iha fátin ne'ebé úniku no fátin ne'ebé mak konsentra ba rejistensia nian, maibé ita nia infraestrutura ne'ebé la sufisiente no la konsege bele atrai turista sira atu mai vizita.

Nia mensiona, Kristu Rei, investimentu ida ne'ebé mak bo’ot, ne'ebé mak Indonézia rai hela, lolos ita konsentra atu bele ema hotu bele vizita, maibé ita nia infraestrutura susar, bele alkatraun to'o ona iha ne'ebá. Ita nia aviaun nia ne'ebé mak nia tiket karun tebés, Timor ba Korea no Bali folin hanesan laiha diferensia, komparasaun ho nasaun sira seluk hanesan Malazia, Korea no nasaun seluk, ema hakarak mai vizita interkâmbiu, professór sira bele mai hanorin no estudante sira bele mai prátika iha timor, maibé primeiru ema hare mak tiket.

Tanba nee mak Governu hakarak koopera hodi rezolve uluk problema ki'ik oan sira nee, ida ne'e bele rezolve ona rendimentu iha ita nia ekonómia bele sa'e, maibé ida ne'e ita nunka halo, ita tau osan, tanbá ita hanoin rekoperasaun. Timor orsamentu barak, ita hare Mina-Rai di'ak liu iha nasaun barak, agora ita nia problema jestaun atu bele hala'o situasaun ida ne'e kala'e, agora se mak atu hala'o, no ita nia tim ekonómia ne'ebé mak ema bolu Rui Gomes, maibé sira servisu fulan 6 de'it.

Tanbá ne'e nia dehan, razaun problema ekonómia timor ninian, ne'ebé mak ho fulan 6 la sufisiente, ne'e seí halo milagre, no ita nia ekonómia forti, maibé seida'uk iha, tanbá foin mak konseiptu, konseiptu tenki iha suratahan, lahanesan situasaun dinámika iha rai laran. Reitor ne'e fundamenta, Setór ida ne'ebé mak atu bo’ot, ita nia Banku Jurus bo’ot liu iha nivel azia pasifiku, agora oinsá kréditu ema bele halo dezenvolvimentu ekonómiku karik jurus ne'e kontinua bo’ot.

Akademista mós akresenta, ita nia eletrisidade karun liu iha nivel nasaun iha Azia, Fabrika no Indústria ligadu ho eletrisidade, ita nia emprezáriu sira barak mak hetan susár, tanbá hakarak halo ida ne'e tenki halo reforma atu ajuda halo ita nia ekonómia bele la'o. Nia esplika, ita hotu hatene, ita nia investimentu bo’ot hanesan halo ba iha Oe-Cusse, liu-liu kampu aviasaun ne'ebé mak modernu, maibé to'o agora aviaun ida laiha laran, hanesan mós iha Suai.

José klarifika, aviaun tenki tama no dinámika tenki iha, foin mak iha orsamentu atu halo hodi sustenta ba ita nia ekonómia. Tanbá ne'e, ita nia Governu no Estadu tenki hola pozisaun ida di'ak, primeiru investimentu la'os de'it ba osan, investimentu ku'alia kona-bá ita nia vizaun atu halo influensia ba ita nia duadór nasaun sira atu bele investe iha Timor-Leste. (BT)