Asuransi


DÍLI----Artista Koñesidu ho naran Estimadu Aida Belo ne’ebe kleur lakon husi publiku nia le'et, hahú husi tinan 2007 to’o ohin loron nunka mosu, halo fens inklui publiku rasik konfundi ho profisaun Aida Belo inklui mós nia paraderu rasik. Durante tinan 13 nia laran Aida Belo lakon no lakon hanesan ema gerileiru sira iha ailaran ne’ebé sira lakon nunka deskobre paradeiru lolos, hanesan mos Aida Belo durante tinan barak lakon husi palku sira inklui mos atividade sira seluk tan.

Maske durante ne’e ema barak sempre rona nia lian domin liu husi muzika hodi temi nia naran maibé nunka hare'e nia isin lolon lolos hanesan ho Artista senior sira seluk ne’ebé sempre mosu iha palku muzika hodi anima publiku no fens sira. Aida Belo hahú husik atividade iha palku hahú iha tinan 2007 maske iha tinan ne’e nudar tinan ba artista Senior no Junior sira atu bele hatudu sira nia knananuk ho versu oin-oin maibe nia lakon derepenti husi fens sira.

Lakon la’os tanba nia husik nia kareira nudar artista maibe tanba hakarak atu dezenvolve diak liutan ninian talenta nudar artista ida iha Timor-Leste, tan ne’e iha tinan 2007, nia (Aida) tenke hakur tasi hodi buka bukae ba nia-an oinsa bele hasa’e liutan nia profisaun iha ema nia rai hanesan Indonesia no Malaysia, ho bensaun no grasa maromak nian, kontinua tulun Aida Belo la husik nia profisaun hanesan Artista, maske iha mos profisaun foun ne’ebé mak nia hetan hanesan milagre ida ne’ebé labele konta ba publiku.

Ho nune’e iha loron 29 fulan Junu tinan ne’e ekipa BT la espera atu bele hetan kontaktu husi Aida Belo, maibe konsege hetan kontaktu husi Artista famozu ne’e ho ninia manajer rasik hodi hasoru malu ho Jornalista BT iha SM Studio ne’ebé lokaliza iha Bairo Pite, nudar Studio ida ne’ebe ohin loron ajuda hodi halo hela gravasaun ba album foun ne’ebé mak sei lansa iha tinan ne’e ho nia Titulu Muzika Rezistensia. Muzika ne’ebe oras ne’e SM Studio Grava maioria kona-ba Rezistensia sira nia luta pesoal ba Timor-Leste hamutuk muzika 15. Iha dala lia ho Aida Belo katak rajaun nia dezenvolve muzika rezistensia nudar dalan ida atu oinsa bele hafanun sidadaun sira iha TL bele hanoin ba luta ne’ebe heroi sira halo ba Timor-Leste.

Maske muzika hirak ne’ebe nia hakerek sempre hetan ajuda mos husi lider nasional balun hanesan Jose Ramos Horta hodi hadia liafuan balun ne’ebe mak iha no oras ne’e tama ona iha faze gravasaun ninian. Iha SM Studio, Aida konta tuir katak nia lakon husi publiku hahú husi tinan 2007 to’o ohin loron maibé ho lakon ne’ebé iha konsege mai ho knananuk Rezistensia nian oinsa bele hafanun liutan sidadaun sira nia hanoin hodi hanoin fali lider rezitensia sira nia luta. “Tinan ne’e ha’u sei lansa Musik Rezitensia nian hamutuk 15 ne’ebé ohin loron halo hela gravasaun,” dehan Aida Belo ba BT iha studio SM, Bairo Pite, Dili, Segunda (29/06).


Nia dehan rajaun hakerek muzika Rezistensia nudar parte pesoál hodi didika ba heroi TL sira, ne’ebé mak luta ba independensia Timor-Leste. Muzika rezitensia ne’ebé nia dedika ho nia Titulu mak hanesan Damen, Nicolau Lobato, Francisco Xavier, Xanana Gusmao, Ramos Horta, Mari Alkatiri, Taur, Lu- Olo, Sebastiao Gomes, Lere Anan Timor, inklui mos Muzika 12 Novembru.

Nia afrima husi muzika ne’ebé nia prepara todan liu mak Muzika Dame no muzika 12 Novembru tanba ninia lian ne’ebé as nomos liafuan sira ne’ebé mak todan. “Muzika sira ne’e hotu todan maibé todan liu mak Dame no 12 Novembru nian,” katak nia. Artista senior ne’e dehan husi múzika ne’ebé iha sei mai ho jendre oin-oin hanesan tebe-tebe, Rok Tebe-tebe inklui mos ho lian dadolin (puizia) husi lia nain sira. “Hau muda nia versi music ne’ebé kahur uituan la hanesan ho muzika seluk ne’ebé sei involve Tebe-tebe iha laran oinsa bele promove kultura Timor-Leste, "dehan nia

Nune’e mos nia dehan husi muzika ne’ebé iha laos deit halo ba Audio maibé sei halo mos ba iha video ne’ebé sei foti video uza kultura Timor-Leste oinsa bele promove liutan kultura inklui mos video husi heroi sira nia luta iha Ailaran. Husi múzika ne’ebé mak iha sei involve mós Artista sira balun hodi haforsa no hafurak liutan muzika ne’ebé mak sei lansa iha tempu badak. Nia mos informa liutan katak laos deit produz muzika rezistensia maibé sei produz mos album Muzika Fiar (rohani) hodi servisu hamutuk ho Amo Bispo na'in-3 iha Timor-Leste nudar karidade ba iha Igreja iha Timor-Leste.

Iha biban ne’e mos Manager ka Esponsor uniku Cipriano Madeira Pito haktuir katak sente orgullu hodi suporta Artista Aida Belo maske laos artista maibé tanba hare ba iha knananuk ne’ebé iha lori nian hodi apoiu liutan Aida Belo. “Mana Aida Belo hau nunka kuiñese oin no nunka hasoru malu maibé liuhusi grasa ne’ebé maromak fo ba nia ikus mai hau kuiñese nia no husi kuiñese malu konsege lori hau hodi apoiu nian, maske hau laiha osan maibé esforsu oinsa iha osan hodi ajuda,” katak Esponsor uniku Cipriano Madeira Pito.

Nia fo rajaun hodi apoiu Aida Belo tanba hare ba muzika ne’ebé iha liu-liu muzika rezistensia tanba durante ne’e hola parte mos iha Luta maibé laos bo'ot liu maibé husi apoiu ne’ebé iha nudar dalan ida hodi agradese ba luta na'in sira nia luta ba Timor-Leste. Nia mos dehan liuhusi Album ne’ebé iha nia esforsu oinsa bele finalize lalais hodi prepara ba lansamentu iha Tinan ne’e. “Ita nia planu sei lansa iha tinan ne’e, tuir lolos ita finalize ona tanba planu muzika 12 maibé ita aumnta ba muzika 15 tan ne’e ita sei lori prosesu uituan, katak nian. Iha biban ne’e mos Elvis Arselindo S Saldanha hanesan Estudio SM ne’ebé gravasaun lian hateten katak husi muzika ne’ebé iha todan tebes maibé kontinua esforsu oinsa bele finalize lalais tuir kontratu ne’ebé iha.

“Muzika todan tebes tanba nia versi mai kahur,” katak nia hodi hatudu rezultadu final muzika balun. Nia konta katak muzika Aida Belo nudar Muzika ida ne’ebé mai ho Versi Tebe-tebe maibé kona-ba kualidade muzika diak no sei utilize iha tempu naruk nia laran tanba lahanesan ho muzika sira seluk ne’ebé ohin loron ema toka iha publiku. Depois remata Intervista Aida Belo ho Na'in Studio SM lori BT hodi rona muzika ne’ebé mak finalize ona nia gravasaun, husi rejultadu gravasaun ne’ebé mak iha BT nota katak muzika hirak ne’e inspira jerasaun foun oinsa bele agradese no valorize ita nia heroi sira ne’ebé mak didika nian a'an ba Luta independensia Timor-Leste. (BT)