Print
Kategoria: Politika
Hits: 325


DÍLI-----Timor-Leste nudar nasaun ida ne’ebé ninia rendimentu maioria mai husi mina no gas, hahú husi independénsia mai to’o ohin loron orsamentu jerál estadu kada tinan kuaze foti hotu husi osan mina no gas nian tanba seidauk iha reseitas másimu husi rendimentu seluk ne’ebé ses husi mina no gas ninian.

Maske nune’e governu konsege halo levantamentu orsamentu husi fundu minarai ba Orsamentu Jeral Estadu kada tinan ne’ebé bo'ot maibe la investe maka’as iha setór edukasaun no setór prioridade seluk. Peskizador Lao Hamutuk Adilsonio da Costa Junior hateten durante ne’e Timor-Leste halo levantamentu ba fundu Petroliferu ba Orsamentu Jeral Estadu maibe latau preoridade ba iha area importante sira ne’ebe mak bele ajuda sustentabilidade ekonomia nasaun iha futuru.

“Lao Hamutuk nia hare kona-ba realidade situasaun agora kona-ba Timor-Leste nia rezerva petroliferu ne’ebe agora iha tun ba beibeik no iha espektasaun husi governu no kompania mina sira hatudu katak Bayu Undang sei maran iha tempu besik (2021/2022) no realidade TL tenke rekuinese to’o ohin loron seidauk iha Ekonomia alternativa alende fundu petroliferu ne’ebe mak ita investe iha nasaun sira seluk no Timor-Leste rasik seidauk iha baze ekonomia non petroliferu ne’ebe forte atu ajuda sustentabilidade ekonomia TL nian iha futuru,” dehan nia ba BT iha nia knar fatin Bebora foin lalais ne’e.

Nia dehan husi levantamentu ne’ebe mak durante ne’e iha governu latau preoridade hodi investe iha Rekursu Umanu hodi lori Timor-Leste ohin loron tama hela iha Malisan Rekusu Umanu rasik. “Ohin loron ita iha situasaun ida ne’ebe kritiku ita presiza duni buka dalan alternativa ajuda dezenvolve politika investimentu ida ne’ebe mak diak liu iha seitór non petroliferu, importante mos governo tenke iha politika investimentu ida ne'ebe mak diak ba dezenvolvimentu kapital umanu liu-liu ba investe iha setór edukasun ida ne’e buat ida ke importante tebes no ida ne mak sai hanesan investimentu fundamental liu atu bele ajuda dezenvolve ka aumenta ita nia numeru rekursu humanu ne’ebe diak, hodi bele hanoin oinsa Timor-Leste bele hadi`ak ninia ekonomia no dezenvolve setór non petroliun,” katak nia.

Adilsonio dehan durante ne’e Estadu foti osan kuaze porsentu 98 (98%) ba atividade ekonomia tanba laiha rendimentu seluk ne’ebe mak bele ajuda Estadu nia depedensia ba fundu minarai ne’ebe sai sorte ida ba iha TL. Ho levantamentu ne’ebe governu halo sosiedade Sivil sempre fó hanoin atu labele foti osan Fundu Minarai liu Rendimentus Sustentavel Estimativu (RSE) tanba bele aseguran rejerva fundu ba iha jerasaun tuir mai maibe lakonsidera rekomendasaun ne’ebe mak iha.

“Ita bele hare prosesu levantamentu osamentu fundus petroliferu ne`e, desde 2009 to`o 2015 sempre liu Rendimentus Sustentavel Estimativu (RSE) no Lao Hamutuk husu bebeik no fó atensaun bebeik ba governu katak tenke kuidadu atu halo levantamentu husi fundu petroliferu ne'ebe dala barak ita labele kontrola no bele lori risku mos ba ita nia sustentablidade finansas nia futuru tamba ita tenke rekuinese katak rejerva uniku ne'ebe mak agora dadaun husi fundu minarai ne’ebe iha,” katak nia.

Nia afirma katak wainhira governu kontinua uza dalan uniku hodi halo levantamentu husi fundu minarai ba Orsamentu Jeral no laiha alternativu seluk mak ba futuru Timor-Leste sei hasoru malisan a'at liutan. “Ita tenke aprende husi esperiensia nasaun sira seluk, hanesan rekursu riku mina maibe realidade nia povu kiak, povu mukit mosu problema oioin korupsaun funu tamba estadu lakonsege salva ka lakonsenge dezenvolve ekonomia ida ne'ebe sustentavel atu hadia ema barak nia moris, ita bele hare iha nasaun sira hanesn iha Afrika neba nomos nasaun sira nebe riku mina maibe lakonsege maneija rezerva rekursu i reseita osan ne'ebe mak mai husi mina no gas ne'e didiak ikus mai sai malisan ba nasaun ne'e rasik,” katak nia.

Tan ne’e nia afirma katak ohin loron maske Timor-Leste riku mina maibe hahú tama dadaun iha malisan rekursu Umanu tanba hare husi nota katak preoridade governu nian desde tinan sanulu resin hitu (17), tau Orsamentu ba iha setór Edukasaun, Saude no Agrikultura Ki'ik liu halo komparasaun ba iha Projetu bo'ot sira.
“Hau hanoin problema malisan rekursu ne'e ita tama ona faze ida ne'e ita tama ona tamba ita bele nota husi preoridade governu ninian desde husi tinan sanulu resin neen ka hitu ba kotuk ita bele hare realidade agora osan hira mak governu investe ba Edukasaun osan hira mak governu investe ba Saude osan hira mak governu investe ba atu dezenvolve ekonomia no petroleum, realidade ida ne`e laiha la akontese maibe ita hare realidade ida ne sei problema bo'ot to`o ohin loron,” afirma nia.

Tan ne’e nia husu ba iha VIII governu atu tau preoridade ba investimentu laos Petroliferu atu nune’e ajuda mos ekonomia nasaun tanba husi investimentu laos petroliferu sei fó kontribuisaun maka'as ba iha sustentabilidade nasaun ninian. “Ita la rekuinese katak ita nia realidade Timor ne'e laos riku mina, ita ne'e nasaun ki'ik maibe tanba grasa maromak nian, ita hetan mina no gas ne'e maibe ita la jere ho kuidadu, entaun ba futuru politika ida ne’e sei kontinua nafatin sei fó risku bo'ot ba estabilidade ekonomia rai laran, bele mos fó risku ba politika no estabilidade siguransa ida ne'e nian i alende mos bele fó risku ba povu ki'ik sira, entaun ema nebe kiak kontinua mukit no ema ne’ebe riku kontinua riku,” informa nia.

Alende ne’e iha fatin seluk Prezidente Konsellu Konsultivu Fundu Petroliferu (KKFP) Juvinal Dias mos hateten katak durante ne’e governu foti desizaun bazea ba Rendimentu Fundu Petroliferu hodi dezenvolve atividade Ekonomia nasaun ninian maibe labazeia ba Lei Fundu Petroliferu ne’ebe mak iha liu-liu levantamentu Fundu Petroliferu tenke porsentu 3 (3%) maibe to’o oras ne’e la Akontese no governu sempre foti liu RSE. “Iha Diskusaun publiku katak hakarak ka lakohi governu Tenke foti osan, Sin ita konkorda hotu governu foti osan ba dezenvolvimentu Estadu maibe bele ka lae iha politika ida atu dezenvolve setór seluk tan atu bele subtitui rendimentu Petroliferu,” hateten Prezidente KKFP ba BT iha knar fatin Koby House Parlamentu Nasional, Kinta foin lalais ne’e.

Tan ne’e nia fó sujestaun katak TL bele uza fundu hanesan makina de aranka ba dezenvolvimentu ekonomia maibe tenke dezenvolve mos setór sira seluk atu nune’e iha futuru labele fó implikasaun ba fundu Petroliferu. Tan ne’e Juvinal mos husu ba governu tenke halo mos investimentu ba iha setór Edukasaun ne’ebe mak sai mos hanesan baze ekonomia ida ba iha futuru. (BT)