Asuransi


DÍLI----Sentru Integradu Jestaun Ba Krize (SIJK) iha loron 15 fulan Juñu, hato’o ba públiku katak, Timor-Leste durante iha loron 52 hafoin kazu na’in-24 rekopera, laiha kazu foun ba Corona virus Desease 2019 (COVID-19).

Porta-Voz Sentru Integradu Jestaun Ba Krize (SIJK), Dr. Rui Maria De Araújo aprezentasaun dadus ba surtu Corona virus katak, iha Timor-Leste durante loron 52 ona la rejistu kazu Pozitivu tanba komunidade barak mak oras ne’e komprende ona oinsa atu halo kombate ba COVID-19 nomós teste laboratóriu negativu durante hamutuk na’in-1809.

“Loron 52 Timor-Leste laiha kazu detektadu foun, total akumulativu exame laboratóriu na’in-1833, totál akumulativu rezultadu laboratóriu negativu hamutuk na’in-1809,” hatete Porta-Voz Sentru Integradu Jestaun Ba Krize, Rui Maria De Araújo ba jornalista sira iha SS-SIJK, CCD, Merkadu Lama, Segunda (15/06).

Nia hateten, durante nemós komunidade kuaze barak mak hatene ona atu preve-aan tanba total kazu akumulativu ema sira ne’ebé iha karantina dadaun ne’e aumenta barak maibe laiha kazu foun mosu tan mezmu ema tama husi dalan ilegal ne’e barak hela maibe nafatin negativu. “Total ema iha karantina obrigatóriu hamutuk na’in-121, Auto-karantina na’in-27 iha Díli, na’in-21 iha munissipiu, na’in-49 hela iha fasilidade Governu iha Díli, no na’in-24 iha fasilidade Governu iha munisipiu,” nia afirma.

Nia hateten katak, Total ema ne’ebé passa ona karantina ka komfinamentu obrigatóriu husi inisiu to’o ohin loron hamutuk na’in-2457, iha munisipiu na’in-522, no husi Díli na’in-1935. Nia haktuir tan, lha loron 12 de Juñu sidadaun vietman na’in-11, mane-8 ho feto-3, hamutuk ho sidadaun Indonezia na’in rua, ne’ebé halo viajen loron 10 liu-ba, husi sidade Kediri, Provinsia Sulawesi Tengara, iha Indonezia, tama ho sira nia ró iha illa Jaco, Munisipiu Lautém, tamba presiza ajuda kombustivel, hodi bele kontinua sira nia viajen iha tasi laran.

Entretantu, Sidadaun Vietname na’in-11 ho Sidadaun Indonezia na’in-2 ne’e mos Ró avaria ka a’at, no tamba sira labele fila ba tasi, autoridade Munisipiu Lautem, hamutuk ho Unidade Resposta Répida Sala Situasaun, Sentro Integradu Jestaun ba Krize (SIJK), transfere sira na’in-13 mai halo karantina iha Díli.

Hafoin halo exame laboratoriu, sira na’in-13 nia rezultadu hatudu negativu. Oras ne’e dadaun autoridade kompetente sira akompaña hela sira nia prosesu, husi perspetiva mitigasaun nian. “Iha mundu tomak, husi loron 13 Juñu ba loron 14 Juñu mosu kazu foun Covid-19 hamutuk ema na’in-142.672 lha Indonezia.

Husi loron 13 Juñu ba loron 14 Juñu mosu kazu foun Covid-19 hamutuk na’in-1.014, iha NTT, mosu kazu foun ida, total iha NTT 108, maibé "Kabupaten” sira ne’ebé halo fronteira direta ho Timor-Leste, kazu zero. Nasaun seluk ne’ebé iha ligasaun viajen ho Timor-Leste, pur-exemplu, Australia husi dia 13 Juñu ba loron 14. kazu foun hamutuk na’in-12 singapura na’in-347, Malazia na’in-34, Korea na’in-34,” Informa nia. (BT)