Asuransi


Federasaun Juventude Profisionál Xineza iha Timor-Leste oferese, segunda-feira ne'e, ekipamentu protesaun individuál ba Sentru Integradu Jestaun Krize hodi prevene no kombate COVID-19. Materiál hirak ne'e mak hanesan máskara rihun sanulu, máskara KN95 atus ida, protesaun matan atus ida, vestimenta ba protesaun pesoál atus ida, luvas médiku rihun lima no dezinfetante atus ida.

Segundu Komandante Operasionál SIJK, Brigadeiru Generál João Miranda "Aluk Descartes" haktuir katak komunidade xineza laos foin mak fó ajuda ba Timor-Leste, maibe hahú kedas iha situasaun difísil no to'o ohin loron sira kontinua fó apoiu ba Timor-Leste hodi luta kontra COVID-19.

Brigadeiru Generál João Miranda "Aluk Descartes" agradese apoiu husi Asosiasaun Juventude Profisionál Xineza iha Timor-Leste no mós organizasaun internasionál sira ne'ebé fó ona apoiu ba Timor-Leste hahú kedas surtu COVID-19 eziste iha nasaun ida ne'e.

Segundu Kordenadór Asosiasaun Juventude Profisionál Xineza iha Timor-Leste, Rudy Kwan, agradese esforsu husi Sentru Integradu Jestaun Krize iha prevensaun no kombate corona vírus iha rai laran no haktuir katak maske Timor-Leste laiha ona kazu ativu ba COVID-19, maibe importante nafatin atu halo prevensaun. Tamba ne'e maka Asosiasaun ne'e hakarak fó apoiu materiál médiku balun ba SIJK hodi ajuda ema hotu hodi prevene an husi transmisaun COVID-19.

Fo hanoin hikas fali katak, iha loron 15 fulan-maiu, Timor-Leste deklara zero kazu ativu ba COVID-19 hafoin pasiente konfirmadu 24 rekuperadu hotu ona no durante fulan ida resin ona maka nasaun ida ne'e la rejista tan ona kazu konfirmadu foun ba COVID-19. (BT)