Asuransi


DÍLI----Ajensia Kooperasaun Internasionál KOICA ho Organizasaun Cruz Vermella Timor-Leste (CVTL), asina akordu ida ho sekretariu Estadu Protesaun Sivil (SEPS) hodi apoiu orsamentu hamutuk dollar $50.000. Apoiu orsamentu refere atu oinsa bele sosa ekipamentu ba protesaun Virus COVID-19 ne’ebe ohin loron sai preokupasaun mundu ninia.

Iha diskursu governu Timor-Leste liuhusi Sekretariu Estadu Protesaun Sivil (SEPS) Alexandrino Xavier De Araújo, Lori governu nia naran, agradese tebes ba parseiru sira apoiu hodi tulun Timor-Leste hodi hasoru Pandemia COVID-19. Nune’e mos liuhusi apoiu ne’ebe iha nudar dalan ida hodi hametin liutan amizade entre Governu ho parseiru sira iha Timor-Leste.

“Ohin ita halo koperasaun ho KOICA ne’ebé mak oferese ona orsamentu ba Protesaun Sivil ho montante $50 mill atu apoiu direita ba situasaun COVID-19 nian, tan ne’e ha’u hodi governu nia naran hakarak agradese ba KOICA ne’ebé imi nia sentimentu solidaria ba povu ida ne’e no prosesu atu hola ekipamentu sira ne’e sei transfere osan mill $50 ne’eba konta bankaria CVTL nian,” dehan Alexandrino Xavier De Araújo ba Jornalista sira iha Salaun SEPS, Kaikoli, Tersa (26/05).

Nia esplika katak SEPS laiha esperansa atu hetan fundu refere maibe ho grasa konsege liuhusi parseiru sira hodi apoiu Timor-Leste. Nia dehan osan ne’ebe iha SEPS fó fiar ba iha CVTL hodi hola ekipamentus ba protesaun COVID-19 hodi fó ba iha SEPS hafoin SEPS fahe fali.

Iha fatin hanesan Diretór KOICA Sikhon Kim ba Timor-Leste fó rajaun fundamental ba kooperasaun ne’e hodi kombate moras COVID-19 no prezensa KOICA nia atu oferese osan ne’ebé naton ba SEPS hodi hola ekipamentus protesaun ba pamdemia COVID-19 ne’e dadaun ne’e Nasaun hotu-hotu afetadu.

“COVID-19 sai problema mundial inklui Timor-Leste no laiha ema mak kria iha era kontemporanea no ita hotu tauk moras hanesan exame kritikal ida ne’ebé hodi verifika valor solidaridade, maske nune’e ita serteza ita bele ultrapassa obstakulu ne’ebé ita hasoru ona, atu konkista inimigu invizivel iha tempu badak kuriozidade ita tenke serbisu hamutuk fó liman ba malu hodi kombate moras ne’e,” Akresenta nia.

Iha biban ne’e mos Prezidente Crus Vermelha De Timor-Leste (CVTL) Madalena Hanjam mós akresenta katak iha sira nia parte prontu simu osan $50 mill husi SEPS atu maneza hodi halo kompras ba ekipamentus COVID-19 nian.

“Ami agora uza osan $50 mill ne’e atu ko’alia ba Indonezia kona-ba saida mak ita presiza Indonezia bele hatama mai deit, alende ami sosa husi PMI Indonezia, no sasan ne’ebé ita sosa husi nasaun mak, Nasaun Makau, Xina nomos husi Australia sasan ne’ebé hola mak hanesan maskra, louvas, iha direzente, no dezenfekta sira seluk tan, no sei fó mos sasan sira ne’ebá hospital liu-liu ba enfermeiru no dotor sira bele uza,” salienata nia (BT)