Asuransi


DÍLI----Relasiona ho impase politik ne’ebé lao iha Timor-Leste durante tinan rua nia laran ladun estavél, hodi fó impaktu ba rendimentu povu ki’ik sira nia atividade iha baze. tuir Magnifiku Reitór UNDIL José Belo hatete Situasaun politik rai laran durante tinan rua ona lao ladun estabil no situasaun ida ne’e afeita tebes ba rendimentu povu kiik-nia moris lor-loron nian iha merkadu no iha loja sira tanbá lahetan lukru prosetivu.

“Ita triste ho situsaun ne’ebé lao iha rai laran ladun estavél hanesan akademista nota katak ida ne’e fó influensia ba ekonomia rai laran liliu ba rendimentu povu kiik nian iha baze ne’e sura sira hetan lukru,” Preokupasaun ne’e hato’o husi José Belo ba Jornalista BT, iha nia knaar fatin UNDIL-Mascarinhas, Kuarta (04/03).

Nia dehan, ekonomia iha rai laran la lao, kompara ho tempu uluk, kada semana tenke hatama sasan mai TL, liu-liu nesesidade baziku, tenke importa kada semana, maibe agora fulan rua tolu mak foin hatama mai, no stok nakonu hela maibe sosa nain sira menus. Nia hateten, Hare ba povu-nia Rendimentu la hanesan ho uluk ona tanba situasaun politika tinan rua-nia laran sai afeitadu tebes ba povu kiik atu buka sira-nia moris lor-loron nian.

“Ita hare agora rendimentu tuun tebes, kompara ho uluk rendimentu diak, tanba movimentasaun ekonomia lao, liu-liu merkadu de kompra diak tebes, maibe agora merkadu de kompra tun, tenik Reitor. Ne’e Dunik, husu lider sira hamutuk rezolve problema rai laran, hodi normaliza ekonomia hanesan uluk no Akademi sira fiar katak Prezidente sei hola desizaun ne’ebé ho komun tebes tanba durante ne’e Prezidente bolu ema hotu ba fó-sira nia hanoin tomak ba Prezidente.

Iha parte seluk Prezidente Camara Comersiu Indutria Timor-Leste (CCI-TL), Oscar Lima hatutan impase ida ne’e fó impaktu bo’ot ba ekonomia rai laran, loja bo’ot sira ne’e la hetan rendimentu, produtu importasaun kontinua menus, loja nain sira importa hela produtu barak mai TL, maibe sosa nain sira laiha, tanba ne’e susar atu dudu ekonomia ba oin, kuandu situasaun politika nafatin hanesan ne’e.

“Hanesan mahon ba setór privadu ita preokupa tanba ekonomia rai laran hare ba menus dadaun ona,” katak nia. Nia dehan, Susar atu hasae fila-fali, tanba ne’e husu ba lider sira atu hakotu lalais impase politika refere, ho nunee bele fo hikas moris diak ba povu, liu husi sira-nia atividade lor-loron nian.

“Tanba ne’e, Ezijensia setor privadu sira nian ba lider sira hamutuk hodi buka solusaun ba problema rai laran, tanba povu iha rai ida ne’e hakarak dezenvolvimentu lao diak,’ katak nia. Nune’e mos, Deputadu Adriano do Nascimento afirma liutan katak, Sin… los duni durante ne’e setór privadu barak mak halerik, balun to’o agora governu seidauk halo pagamentu ba obra ne’ebé sira finalize no balun halerik tanba sasan ne’ebe fa’an iha sira nia loja la folin.

Maske Supermerkadu, loja sira no Kios sira ne’e fa’an sasan ho presu normal hela maibe sosa nain sira laiha, nune’e sasan ne’ebé fa’an iha super market no mini market mós kuaze lafolin hotu ona. “Halerik sira ne’e mosu tanba impase politik ne’ebe lao iha rai laran durante tinan rua nia laran, laiha solusaun. Maibe korajen nafatin ba setór privadu sira, tanba desizaun iha lider sira nia liman atu hakotu impase ne’e,” Afirma Adriano. (BT)