Asuransi


DÍLI----Instituisaun Science of Life Siénsia (SOLS) ou AHHA Edukasaun nudar organizasaun ida ne’ebe mak prepara edukasaun ba joven sira hodi bele hetan abilidade moris hodi kompete iha oportunidade servisu iha rai laran nomos iha rai liur.

Tuir Fundadór husi AHHA Edukasaun SOLS Madenjit Singh hateten, SOLS ou AHHA Edukasaun ne’ebé estabelese iha Timor-Leste iha tinan 2006 ho objetivu atu tulun joven sira ne’ebé mak la hetan oportunidade atu kontinua eskola iha edukasaun formal hodi bele mai atende edukasaun iha SOLS.

“SOLS signifika katak Science of Life (Siénsia ba moris) no hakarak eziste iha nasaun Timor-Leste tanba SOLS mosu ho prinsípiu ida atu hakbesik aan ba nasaun ki’ik no kiak sira ne’ebé mak sempre hetan konflitu, no bele salva joven sira ne’ebé mak laiha abilidade hodi bele garantia ba sira nia moris aban bainrua.’’ Dehan Nia

Fundadór SOLS Dr. Madenjit Singh haktuir edukasaun ne’ebé mak SOLS oferese ba joven sira tuir maneira ida ne’ebé mak própriu atu bele asegura katak joven ida ne’ebé mak tuir formasaun bele duni hetan kapasidade no abilidade tuir kursu ne’ebé mak iha. Maneira ne’ebé mak los ba edukasaun iha SOLS nian mak aprende no pratika, bainhira estudante ida aprende ona liu husi teoria mas sei hetan mós oportunidade atu bele pratika atu bele hatoman aan.

“Oras nee iha ona estudante hamutuk rihun hat no estabelese ona sentru hamutuk 20 iha territóriu Timor Laran tomak, oras nee iha Sentru Sentrál iha Bekora iha estudante hamutuk atus neen’’ Dehan Fundadór SOLS Dr. Madenjit Singh ba jornalista Business Timor iha Ofisina Soldadór, Kinta (05/03/20)

Iha fatin hanesan nia salient bain-bain ema hatene katak SOLS bele fó de’it kursu ba lian Ingles maibé oras nee ajusta tan programa estudu nian balun foka ba formasaun vokasionál, hanesan prepara kursu lian, Korea, lian Japaun, lian Portugues, kursu Komputadór, Matemátika, aprende oinsá atu loke negósiu.

Rasaun husi prepara edukasaun liu husi formasaun ida nee atu bele fasilita joven sira hodi bele asesu ba edukasaun sekarik, SOLS la kontribui ba ida nee sei fó implikasaun boot ba joven sira tanba la edukadu no sei hamosu konflitu no númeru dezempregu sei sa’e maks no nasaun sei iha ema kiak no mukit barak. “Programa sira nee hare katak iha benefísiu boot ba joven sira atu bainhira sira remata sira nia kursu iha nee bele iha ona abilidade ida sufisiente atu bele ba serbisu iha nasaun seluk hanesan Korea Do Sul, Japaun, Australia no seluk tan” Dehan Nia.

SOLS sei prepara program tinan rua ba estudante sira no bainhira sira hetan graduasaun bele ona iha koñesimentu sufisiente atu bele buka rasik serbisu. Tama SOLS prepara mós programa ida báziku hodi serbisu iha edifísiu, kona-ba jestaun, finansas, resesaun no mós pelumenus bele iha koñesimentu ruma kona-ba serbisu iha edifísiu nian.

“Atualmente SOLS produz ona estudante barak tebes ne’ebé mak serbisu iha parte governu, NGO lokál no Internasionál barak iha Timor-Leste laran, iha mós balun ne’ebé mak oras nee hetan oportunidade ba kontinua eskola iha nasaun seluk liu husi programa bolsu estudu ne’ebé mak ofere husi embaixada sira ne’ebé mak iha Timor-Leste, maske ba molok tama mai SOLS, sira laiha abilidade ba língua atu kompete ba bolsu estudu, nia haktuir.

Estudante Finalista SOLS Efrina Souza hateten, sinte priviléjiu boot bele hetan oportunidade hodi mai aprende iha sentru SOLS nian, fatin ida gratuitu maibé bele ofrese edukasaun ida kualidade, iha maneira própriu tebes utiliza iha SOLS ba prosesu aprendizajen nian tanba bainhira aprende liu husi teoria no hetan kedan oportunidade atu bele pratika no ida nee sai pontu ida atu bele asegura ba estudante ida bele hetan abilidade di’ak liu husi prosesu aprendizajen nian.

Efrina hatutan tan maske SOLS la hanesan eskola seluk maibé sempre enkoraja nia hodi estuda maks ho hamosu duni vontade di’ak hodi bele ko’alia lian Ingles ho di’ak. Fundadór SOLS Dr. Madenjit Singh hato’o mensajen katak bainhira atu garantia pesoál ida hetan edukasaun di’ak tenke liu husi motivasaun atu bele tulun pesoál ida liu husi dalan própriu. SOLS ofrese oportunidade ba joven hotu ne’ebé la hetan oportunidade atu ba eskola tanba inan aman la iha kapasidade maibé SOLS prontu atu tulun pesoál ida ne’ebé mak laiha abilidade atu asesu ba serbisu ruma. (BT)