Asuransi


DĺLI----Timor-Leste sai uma nain ba seminariu Forum Rejional ASEAN (ARF) kona-ba rezolusaun disputa no dieritu tasi nian, durante loron rua no seminariu ne’e ko-prezudiu husi Timor-Leste, Australia no Malazia no seminariu ne’e ho nia tema “Workshop On Dispute Resolution And Law Of The Sea”.

Seminariu ne’ebé halao iha salaun Enkontru Ministeriu Finansas ne’e refere lori hamutuk partisipante nain-120 husi membru estadu ARF nian no Timor-Leste nia líder nasional no sefi negosiu ba fronteira maritima S. E. Kay Rala Xanana Gusmão hato’o diskursu prinsipal iha enkontru refere durante sesaun abertura.

Seminariu ARF ne'e refere fornese forum espesifiku ida ba estadu sira hodi diskuti rezolusaun disputa liga ho direitu tasi nian iha rejiaun, no sei foti ezemplu husi experiensia rejional sira nomos husi peritu no akademiku sira, no ezamina kazu anterior sira liliu mak Timor-Leste no Austrália nia prosesu konsiliasaun iha estabelese fronteira marítima permanente liu husi komisaun konsiliasaun UNCLOS.

Timor-Leste no Australia mak henesan nasaun dahuluk ne’ebé uza komisaun konsiliasaun hodi estabelese sira nia fronteira marítima. Tratadu fronteira marítima ne’ebé asina ona iha dia 30 fulan Agostu tinan 2018 mak hanesan pasu importante ba nasaun rua nia relasaun bilateral, ba UNCLOS no ba direitu internasionál. ARF hanesan Forum Konsultativa rejional ida kompostu husi pais partisipante nain-27 ne’ebé mak buka atu fahe hanoin kona-ba asuntu seguransa iha rejiaun Azia-Pasífika. Timor-Leste hetan konvite hodi hola parte iha ARF iha tinan 2005.

Timor-Leste sai ona hanesan nasaun partisipante ba ARF ne’ebé ativu no sai ona mos uma nain ba seminariu ARF iha pasadu iha tinan 2011, 2017 no 2019. Experiensia hirak ne’e haforsa Timor-Leste nia prosesu aplikasaun ba adesaun ba ASEAN, liu husi nia kapasidade hodi partisipa no organiza eventus ASEAN. 

Austrália no Malázia mos suporta Timor-Leste nia aspirasaun atu adere ba ASEAN.

Iha fatin hanesan Diretora jeral ba asuntu ASEAN, Milena Rangel hatete, Timor-Leste fasparte iha ASEAN forun ne’ebé hanesan membru ba ASEAN rejional forum.

“Timor-Leste ita fasparte iha ASEAN forum ne’ebé hanesan membru ba ASEAN rejional Forum, halao atividade hanesan ne’e, agora ba espesifikamente ba ita nia sorumutu ohin nian ne’e ita ko’alia kona-ba UNCLOS ita hotu hatene, tanba Timor-Leste iha esperiensia balun atu bele partilla iha ita nia rejiaun laran ba estadu Unidos no ba ASEAN rejional Forum,” dehan Milena Rangel ba jornalista sira iha salaun ministeriu finansas Aitarak-laran, Dili (27/02/20).

Nia dehan, iha ne’e ita nia Ministru Agio Pereira nomos azentes do estadu uluk husi Australia nian sira sai hanesan oradoor ba ita nia sorumutu ida ne’e atu fahe mos Timor-Leste nia esperiensia oinsa bele uza instrumentu internasionál atu rezovlve disputa marítima nian. Nia afirma, sorumotu ne’e foka liuba ASEAN forum ne’e nomos iha asuntu balun ne’ebé fasparte iha ASEAN rejional forum nian, Timor-Leste mos partilla informasaun sira ne’e hamutuk ho panelista husi nasaun iha rejiaun laran.

“Ita nia sorumutu ida ne’e ita foka liu ba ASEAN forum ne’e nomos iha asuntu balun ne’ebé fasparte iha ASEAN rejional forum nian, ita mos partilla informasaun sira ne’e hamutuk ho ita nia panelista husi nasaun iha rejiaun laran hanesan Indonézia, Singapura, Malázia nomos ho Vietnam ne’ebé fasparte hotu iha ita nia sorumutu ida ne’e,” afirma nia

Nia dehan tan, Timor-Leste nia esperansa prontu hanesan estadu membru ita mos iha esperiensia boot tebtebes kuandu ita rezolve ita nia fronteira marítima ho Austrália ita uza konsiliasaun obrigatoria iha UNCLOS nian dahuluk pais ida uza mekanismu ida ne’e intrumentu internasionál ne’ebé rezolve problema ho paz. Nia haktuir, Timor-Leste iha duni esperiensia boot ida ne’ebé atu uza oportunidade ida ne’e atu bele partilla estadu membru sira katak Timor-Leste fasparte rezolve problema fronteira marítima ho nasaun Austrália.

“Ida ne’e Timor-Leste iha duni esperiensia boot ida ne’ebé ita atu uza oportunidade ida ne’e atu bele partilla estadu membru sira katak Timor-Leste fasparte rezolve ita nia problema fronteira marítima ho nasaun Australia ho maneira ne’ebé kapas no kontinua sai amigu ida ba ita nia dezemvolvimentu nian,” haktuir nia. Nia salenta, Timor-Leste iha responsabilidade no iha knar atu mos partilla informasaun sira ne’e ho estadu membru no ita nia bainaka sira ne’ebé mai tuir konferensia ne’e. (BT)