Asuransi


DÍLI----Kompaña ACELDA nu’udar kompaña nasional ne’ebé ohin loron halo exportasaun Mina-Kamii ba merkadu internasionál hanesan nasaun Amerika no nasaun seluktan fó lukru di’ak ba Timor-Leste.

ACELDA nu’udar kompaña ida ne’ebé promove produtu lokál ba merkadu internasionál no oras ne’e halo ona akordu ho kompaña OIL of ALOHA hosi Estadu Unidus no bele hatama osan mai nasaun Timor-Leste ho montante 160 Millaun dollar Amerikanu.

Diretór Ezekutivu Kompaña ACELDA Higino da Costa Freitas hateten atividade exportasaun ba Mina-Kamii ba nasaun Amerikanu hahú hosi tinan 2005 no hahú hosi tinan ne’e to’o iha tinan 2010 kada Tinan kompaña ACELDA sempre exporta Mina-Kamii ba kompaña Oil of ALOHA hodi hatama osan hamutuk dollar Amerikanu 160 Millaun mai Timor-Leste.

“Tuir akordu ne’ebé asina ona entre kompaña ACELDA no kompaña OIL of ALOHA ho objetivu atu hametin kooperasaun iha merkadu hodi exporta Mina-Kamii ba nasaun Amérika, kada tinan kompaña ACELDA tenke haruka Mina-Kamii tonelada 45 no bele hetan fali osan ho montante 160 millaun dollar Amerikanu.’’ Dehan Nia

“Mina-Kamii hosi Timor-Leste hetan kualidade as tebes no hetan interese boot hosi nasaun barak iha merkadu internasionál, oras nee ACELDA halo ona akordu ho nasaun Xina ne’ebé mak hakarak mós atu hetan Mina-Kamii hosi Timor-Leste, maibé atualmente seidauk realiza tanba nasaun Xina sei enfrenta hela problema hosi Virus Corona.’’ Dehan Diretór Ezekutivu kompaña ACELDA Higino da Costa Freitas ba jornalista Business Timor (BT) Iha nia Rezidénsia Bidau Lesidere, Segunda (03/02/20)

Iha fatin hanesan nia salienta tan oras nee prosesu exportasaun Mina-Kamii ba nasaun Amérika iha kada tinan halo exportasaun dala-3. Maibé bainhira hetan dezafiu balun mak sei exporta ba dala rua ou dala ida. “Dezafiu ne’ebé mak sempre enfrenta mak agrikultór sira dala ruma ladún badinas atu rekolla sira nia produtu hodi halo atraza ba prosesu produsaun, kona-ba produtu Kamii sempre sufisiente no disponivel.’ Dehan Nia.

Atu asegura ba futuru hodi bele kontinua hetan produtu Kamii ne’ebé mak sufisiente oras nee kompaña ACELDA trasa ona planu hodi prepara biberus Ai-Kamii hodi fornese ba agrikultór sira hodi kada uma kain ida bele kuda Ai-Kamii to’o oan 10 ou 20 ba leten atu ré plantasaun ba Ai-Kamii sira ne’ebé mak tuan ona no oras nee ladún fó fuan barak iha toos Agrikultór sira nian.

Husu ba parte governu liu-liu ba ministériu relevante atu bele fó apoiu maximu ba programa re-plantasaun ba Ai-Kamii atu nune’e ba futuru bele kontribui ba ekonomia rai laran no tulun uma kain agrikultór sira bele moris di’ak no sai hosi mukit no ki’ak hodi realiza mehi hirak nee iha futuru.

Alende produtu Mina-Kamii kompaña ACELDA iha kometmentu atu kontinua promove produtu lokál ba iha merkadu internasionál no oras nee ACELDA sei nafatin buka parseiru hosi nasaun boot sira atu bele hetan akordu ba investimentu exportasaun produtu. (BT)