DILI—Negosiante estranjeiru hanesan xineza sira sei kontinua domina iha merkadu tradisional no estrada ibun hodi fa’an sira nia produtu maski fulan hirak liuba governu liu husi Ministeriu Turizmu Komersiu no Industria (MTCI) duni no bandu ona vendedor estranjeiru sira nebe fa’an sasan iha merkadu tradisional iha kapital Dili.

Tuir kompanhia Watubita Marcelino da Costa hateten, governu duni sai ona negosiante xineza sira husi merkadu tradisional maibe agora dadaun balun komesa fa’an fila fali ona iha merkadu tradisional. “Ida ne’e bele hamate negosiante timoroan sira,” dehan Xefi kompania Watubita Marcelino da Costa ba BT Kuarta (25/07) semana liu ba iha ninia knar fatin Kaikoli, Dili.

“Hau hanoin mandatu governu AMP nian atu besik remata ona sura deit ona loron tanba ne’e ministeriu kompotenti lakohi kontrola ona negosiante xineza sira halo fila fali negosia iha merkadu tradisional no dalan ninin sira ne’e,” dehan nia.Entretantu Rosa Soares, estudante finalista Universidade Nasional Timor Lorosa’e (UNTL) fakultas Ekonomia Manejementu hateten realidade ema estranjeiru maka domina iha Timor Leste tanba laiha kontrola ne’ebe masimu husi governu.

“Ita nia governu mak kontrola karik timor la kiak demais hanesan ne’e maske servisu laiha maibe atu buka osan la araska ida ne’e falta de kontrolu husi ita nia nai ulun sira. Tuir lolos governu tenki kontrola oinsa bele atende povu nia nesesidade,” Rosa hatete. Agusto Gama, negosiante timoroan ida senti triste wainhira hare ema husi nasaun seluk mai nakonu iha ne’e.

Ida ne’e hanesan taka dalan ba negosiante fila liman iha dalan ninin, tanba sira mai fa’an sasan folin baratu deit duke sasan ne’ebe timoroan fa’an. “Ita timor fa’an sasan sempre tuir folin ne’ebe sosa iha loja maibe ema estranjeiru hanesan xineza laiha, sira nia sasan ne’e fa’an baratu deit halo ema sosa mak sira nian ita nian ne’e fa’an karun ne’e ema lakohi sosa,” dehan Gama.

Tuir observasaun BT iha terenu katak los duni agora dadaun negosiante estranjeiru barak mak kontinua halao sira nia negosiu iha merkadu tradisional hanesan Bekora, Komoro Taibesi no seluk tan.(R-4)