Asuransi

DÍLI----Emprezariu nasional sira husu ba governu atu tau importansia no fó oportunidade maka’as liu-ba emprezariu nasionál atu involve iha implementasaun projetu hotu liga ba iha rekoperasaun ekonómiku nune’e bele garantia sirkulasaun osan iha rai laran.

Prezidente Câmara Comêrcio Industria Timor-Leste (CCI-TL) Oscar Lima hatete governu tenke tau importánsia fó oportunidade ba empreza nasional sira atu kaer projetu ki’ik sira iha rai laran no labele projetu ki’ik ho boot fó hotu ba empreza internasionál sira.

“Ami sei tenta nafatin katak sira labele kaer projetu ki’ik, kaer projetu boot de’it ami barak klase B sira ne’e ami la hetan hotu, tanba iha Klase Timor-Leste mos iha kapasidade intelektual kapasidade finaseira no kapasidade téknika, ba ekipamentu klase A ami halo hotu ona,”informa Prezidente CCI-TL Oscar Lima ba Jornalista BT hafoin halo abertura ba treinamentu ba emprezariu sira iha Novo Turizmu, Sexta (06/11).

Emprezariu senior no susesu ne’e hatete Orsamentu jerál do estadu Tinan 2021 ne’ebé mak Governu tau importansia atu hadi’a ekonomia no rekoperasaun ekonomia rai laran ne’e importante ba povu no governu tenke implementa hanoin sira ne’ebé iha. “Ami mós hato’o ona ami nia hanoin ne’ebé maka klean kona-ba buat ida rekooperasaun ekonomia ne’e importante, maibe importante liu mak Governu tenke halo implementasaun hanoin sira ne’ebé mak hato’o ona iha rekoperasaun ekonomia,”katak nia.

Tuir nia rekoperasaun ekonomia ne’e parte ida importante liu ne’e mak tenke investe iha infraestrutura, tanba infraestrutura ne’e fó servisu barak no buat ida hasa’e osan iha rai laran, osan bele namkari tun ba rai laran. Entretantu Diretór Kompañia Costa Motor Estanislau Quintas Da Costa salienta se projetu ki’ik sira kaer hotu husi ema estranjeiru emprezariu ki’ik sira iha nasaun ne’e sei labele book-an.

“Ha’u hanoin fatin hot-hotu ita la halo limitasaun klasifikasaun ne’ebé mak di’ak, agora kompañia boot sira bele tun fali ba kraik no hada’u malu ho empreza ki’ik sira, entaun labele book-an, neneik ba neneik mak Governu husik hela de’it hanesan ne’e ba nafatin aban bain rua ne’e iha komapañia ida rua tolu de’it ne’ebé boot mak sei moris ba nafatin kompañia ki’ik sira sei gulun tikar ba fali halo to’os no halo natar hanesan ita nia beiala sira hanesan uluk,”

Nia informa, Ami sujere ba Governu atu buat sira ne’e labele akontese, oinsa atu bele kapasita mos emprezariu ki’ik sira, halo klasifikasaun ne’ebé mak di’ak atu nune’e empreza ki’ik sira mós bele partisipa dezenvolvimentu ida ne’e. Nia dehan durante ne’e partisipasaun setór privadu sira iha rai laran ba projetu nudar emprezariu sente susar teb-tebes, tanba laiha barajen ida atu nue’e empreza ki’ik sira bele, hamutuk ho projetu boot sira, laiha loos fatin atu empreza ki’ik sira atu implementa sira nia produtu, neneik ba neneik empreza ki’ik sira sei paradu hotu.

Husu PN Aprova OJE 2021 Hodi Hadi’a Ekonomia Nasaun
Setór privadu sira husu ba Parlamentu Nasionál (PN) no VIII Governu atu halo diskusaun ho di’ak no halo aprovasaun ba Orsamentu Jerál estadu (OJE) 2021 hodi kontribui ba dezenvolvimentu ekonomia Timor-Leste. Prezidente Camara Comercio Industria Timor-Leste (CCI-TL) Oscar Lima nia espetativa ba OJE 2021 tenke passa tamba komunidade barak mak husu atu orsamentu tinan 2021 nian ne’e tenke passa no povu presiza moris di’ak.

“Ami espera katak sei passa, lapassa bebeik entaun ita nia rai ne’e atu para iha ne’ebé, ami espera katak passa, politiku maibe ita hanoin passa ba, diak liu ne’e sira hanoin de’it dehan Povu ne’e presiza moris,” dehan Presidente CCI-TL ba Jornalista BT hafoin halo abertura ba treinamentu ba emprezariu sira iha Novo Turizmu, Sexta (06/11).

Iha sorin seluk Diretór Kompañia Costa Motor Estanislau Maria Quintas Da Costa hatutan, nudar ema emprezariu husu atu OJE tinan 2021 tenke passa tanba atu dezenvole ekonomia rai laran fonte úniku mak OJE. “Ami husu atu tenke passa atu nue’e ajuda mós ba iha ita nia povu sira hotu, la’os ba emprezariu de’it, maibe ba povu tomak, tan ne’e mak ami husu atu tenke passa atu bele dezenvolve ekonomia rai laran atu povu hotu partisipa iha Nasau ukun-an ida ne’e,” hatete Estanislau Maria Quintas Da Costa.

Nia hatutan katak, preokupasaun husi komunidade sira ne’ebé mak fa’an Tiga Roda ema hotu ijije atu orsamentu jerál tenke passa, la’os ba emprezariu de’it maibe ba povu tomak nia moris. “Povu ki’ik sira ne’ebé mak halo toos halo natar ne’e presiza tamba dadaun ne’e toos natar ne’ebé sira halo sira rasik mak halo no sira rasik han fali sira nian, laiha ema ida atu sosa, ida ne’e preokupasaun boot ba povu tomak,” tenik nia. Setór Privadu sira husu Parlamentu Nasionál ba orsamentu jeral do estadu tenke passa, tanba povu ki’ik sira presiza moris, no atu hadia dezenvolve ekonomia rai laran presiza orsamentu. (BT)