Asuransi

DÍLI----Kompañia husi Media tolu “Business Timor, STL-News noTimor Post, halo inkontru ho Prezidente Instituto Nasional Siguransa Sosial (INSS), hodi diskute kona-ba, razaun de kompañia 3 ne'e la hetan susbsidiu porsentu 60 (60%) ba traballador, tuir saida mak Governu promete ona.

“Antes ne'e iha Fulan Maiu nia laran sira mai halo rejistu iha Seguransa Sosial, ha'u mai rejistu kompletu tiha, no husi parte Seguransa sosial mós informa mai ami katak iha dokumentu balun seidauk kompletu ne’e mak konta bankaria ba Traballador sira, ho nune'e ami mós ba kompleta duni dokumentus hirak ne'e,” hateten Manajer Domingos Freitas hasoru malu ho Prezidente INSS iha nia kna’ar fatin INSS, Kaikoli, Kuarta (23/09).

Nia hatutan tuir mai informasaun mai husi dirassaun ne'ebe mak toma konta ba prosesu hirak ne'e sira hein maibe informasaun laiha, no ikus mai Sira rona informasaun katak husi Media Privadu Lima (5) ne’e iha balun konsege simu ona, ho nune’e halo nia sente konfundi. “Ha'u sente Media ne'e hanesan deit, tamba seguransa sosial ne'e urus ba Funsionariu hotu, no media 5 iha Timor ne'e nia direitu hanesan, no tamba sa mak media balun simu no balun la simu?” hateten nia.

Nia salenta, relasiona ho kestaun hirak ne'e mak Media nain sira husi media, STL-News, Timor Post, no Buisines Timor foti desizaun hodi tenta konfirma ho Prezidente INSS, hodi bele buka solusaun. Iha fatin hanesan Manajer husi Media Suara Timor Lorosae (STL), Florensio de Oliveira, husu ba iha Prezidente Instituto Nasional Siguransa Sosial (INSS), Longuinhos Armando S. Leto, kona-ba Prosesu de pagamentu 60% ba Traballador husi Media nian, tamba hare'e ba Media balun konsege hetan ona pagamentu ne'e maibe balun la hetan

Nia hatutan, tamba oras ne’e dadauk Difisil atu selu salariu de Traballador sira nian, kestaun de Finanseiru, iha tempu Covid-19 ne'e, Ho nune'e mak Garantia ba 60% husi apoiu Governu nian atu bele ajuda Instituisaun Media sira iha Tempu Krize Covid-19. “Kestaun de hatama pedidu tarde ne'e tamba durante ne'e husi parte Kompañia (Media) hanoin katak prosesu ba 60% ne'e liu husi SEKomS, tamba ne'e mak husu ba iha INSS,”nia informa.

Hatán ba kestaun ne’e Prezidente Instituto Nasionál Siguransa Sosiál (INSS), Longuinhos Armando S. Leto hateten, katak prosesu pagamentu 60% ba traballador ne’e bazeia hotu ba iha dekreitu lei. “Segundu ha’u halo auto defeza ida, kuandu ha'u la hato’o informasaun tamba ita boot nia media sira kuaze lor-loron iha ne'e, no kuandu ita nia Ministru Fidelis fo informasaun katak Governu atu ajuda subsidiu ba iha traballador sira la’os ba iha kompañia, ho nune'e dader de'it ema hotu mai rejistu, la’os Media de'it maibe motorista mós mai nakonu iha ne'e,” hateten Prezidente Instituto Nasional Siguransa Sosial (INSS).

Nia informa katak ho nune’e Governu hasai dekretu lei ida, ba kompañia ne’ebe mak rejistu nanis ona iha Seguransa Sosiál, husu atu hato’o pedidu mai iha Seguransa Sosiál to’o Loron 30 fulan Maiu. Nia hatutan rajaun de hato’o pedidu ne'e tamba ajudus ne'e iha oin rua, ne’e mak ajuda ba iha 60% no mos ba iha ida fali husu de'it disstensas 6%. “Bainhira ami hato’o informasaun ne'e kompañia balun husu Governu atu Reinbolsa, 60% ne’e ba kompañia ne’ebe mak durante Covid-19 ne’e nia labele selu saláriu full, no Governu aumenta tan 60%, no kompañia balu husu de’it Distensas 6%, no kompañia balu husu reinbolsu” dehan nia.

Nia hatutantan katak antes ne'e iha Dekretu Lei hateten ona katak ba kompañia ne'ebe mak rejistu nanis ona iha seguransa Sosial, tenke hatama pedidu iha dia 30 de Maiu No ba kompañia ne'ebe mak foin mak rejistu iha tempu Covid-19 ne'e, ho nune'e nia Pedidu ne'e alende nia la rejistu iha seguransa Sosial, nia tenke mai halo pedidu iha dia 30, no kompañia ne'ebe mak rejistu nanis ne'e tenke hatama pedidu antes loron 15 Fulan Juñu.

“No kompañia tuan sira ne'ebe mak la mai hatama pedidu, kerdijer katak kompañia sira ne'e la iha problema finanseiru iha Tempu Covid-19 ne'e," tenik nia. Nia hatutan se pedidu la tama iha INSS, ho nune'e la iha Baze ida hodi bele selu 60% ne'e, tamba ne'e mak pedidu husi kompañia tenke hatama, se liu tia data ne'ebe mak determina ona ho nune'e tenke taka ona, tamba buat hotu bazeia ba iha dekretu Lei. Nia Esplika katak durante ne’e iha media balun hein no rona fali informasaun katak prosesu hirak ne'e liu husi SEKomS, maibé realidade iha dekretu Lei hateten katak so bele liu husi INSS,

“To’o data ne’e remata mós ami nunka hetan dadus ida husi kompañia ruma mai rejistu, so kompañia sira ne’ebe mak mai rejistu ne’e mak GMN hatama nia pedidu tamba ne’e mak GMN hetan,” nia dehan. Nia hatutan katak bainhira pedidu husi kompañia balu hatama pedidu antes de data ne’ebe mak determina ona parese sei halo prosesa, tamba INSS sei la halo deskriminasaun ba Kompañia sira. Nia salienta, oras ne'e dadauk problema ne'e labele prosesa fali ba kotuk tamba nia data liu ona, prosesa ba kotuk hein de'it mak rekoperasaun Ekonomia. Nia hakotu, nune'e ba ida 60% ne’e taka ona, no agora dadauk hela de'it prosesa pagamentu, no pagamentu seidauk hotu tamba lei hateten katak ami tenke halo pagamentu ba ema ida-idak nia konta, no iha 35 mill taballador mak ami tenke pagamentu. (BT)