Asuransi


DÍLI----Governu da VIII ne’ebé Xefia husi Primeiru Ministru Taur Matan Ruak hahú fó “lampu verde” kona-bá oinsá atu apoiu fundu ba setór privadu rai laran, liuhusi injeta fundu ka tau kapitál finanseiru iha Banku Nasional Komersiu Timor-Leste (BNCTL-sigla Portugés) hodi bele fó apoiu ba setór privadu sira liuhusi kréditu.

Atu injeta kapitál finanseiru iha banku úniku Timor nian ne’e la’os foin mak hetan ejijénsia husi setór privadu nasional maibé ejijénsia ne’e mai kedas iha tinan hirak liu-bá tanba emprezariu nasional sira halerik bebeik katak sira labele halo investimentu tanba laiha banku ida mak fó kréditu ba sira hodi halo investimentu iha rai laran iha setór oin-oin. Ministeriu Kordenadór Assuntus Ekonómiku (MKAE) Joaquin Amaral hatete MKAE simu ona orientasaun husi Primeiru Ministru atu hare posibilidade tau osan ba BNCTL hodi ajuda setór privadu.

“Objetivu enkontru ho Primeiru-Ministru atu hetan orientasaun serbisu koordenasaun nian liuliu iha relasaun ho planu rekuperasaun ekonomia ho mós ida relasaun oinsá atu bele ajuda setór privadu nasionál sira ne’ebé besik, ita-nia sistema BNCTL ne’ebé ohin tuir orientasaun S.E. Primeiru-Ministru husu atu oinsá bele hare iha posibilidade atu bele ajuda BNCTL,” Hateten Ministru Koordenadór Asuntu Ekonómiku, Joaquim Amaral ba jornalista sira hafoin remata enkontru ho Xefe Governu, iha Palasiu do Governu, Tersa (25/08).

Nia hatutan, Xefe Ezekutivu mós fó orientasaun atu aselera koordenasaun ho liña ministerial relevante sira iha planu rekuperasaun ekonómika niann tanba hanesan ita hotu hatete katak, setór privadu ohin loron iha difikuldade bo’ot iha fundus, nune’e presiza hametin koordenasaun husi liñas Ministeriais sira ne’ebé sei hola parte.

“Ita-nia Primeiru Ministru fó orientasaun atu bele aselera prosesu ne’e halo koordenasaun ho ministériu sira ne’ebé sei involve iha prosesu levantamentu de dadus i nune’e mós iha prosesu implementasaun tanba hanesan ita hatene ita sei fahe sasán entaun ninia konsekuénsia lojístika mós sei bo’ot entaun presiza hametin koordenasaun husi liñas Ministeriais sira ne’ebé sei hola parte,” Esplika nia.

Ne’e dunik, Maske Timor-Leste tama hela iha situasaun impase politika mai tan ho problema Global hanesan Pandemia virus Corona nia implikasaun lori Ekonomia mundu no Timor-Leste hetok piur liu tan. “Depois ekonomia Timor-Leste monu no nia impaktu bo’ot liu tan mak ho COVID-19 nia impaktu ne’e bo’ot tebes maske ita la hatene moras ne’e mai husi ne’ebe no nia impaktu kuaze rai hotu-hotu sofre moras ida ne’e no nia impaktu mos ba iha ekonomia Global,” Dehan nia.

Nia informa katak ohin loron iha Timor-Leste setór privadu ne’ebé sai parseiru ba governu hasoru problema finanseiru atu halo investimentu tanba nia impaktu husi impase politika no pandemia virus Corona. Aleinde ne’e, Primeiru Ministru husu atu identifika mós dezafiu sira hodi bele buka solusaun atu programa ne’e wainhira implementa bele la’o ho susesu. “Primeiru-Ministru nia apoiu no ninia orientasaun atu Ministériu sira serbisu metin liu tan atu hare identifika sá dezafiu sira ne’ebé iha i rekursu saida mak iha atu bele uza atu halo programa ne’e lao ho susesu,” Informa nia.

Ne’e dunik, Problema Virus COVID-19 konsege lori impaktu bo’ot ba iha TL tanba populasaun nia komsumsi tun, no komfiansa ba atuas ekonomiku sira monu, rezultadu rendimentu husi populasaun menus, empreza sira lahetan lukru, no empreza sira mós sei lulun biti. “Ba parte fortura nian iha ita nia populasaun nia komsumsi sei tun, no komfiansa ba atuas ekonomiku sira sei monu, tanba inserteza ne’ebé mak kauza husi COVID-19, no distribuisaun ne’ebé mak mosu, no ba rendimentu mós sei menus. Ida ne’e sei redus ema nian poder de kompra ba empreza sira. Tanba ida ne’e mós, rezulta empreza sira barak mak sei taka, iha redusaun prokura. Emjerál ita rejista redusaun ne’ebé mak kontante husi importasaun no setór turizmu ita bele dehan sei paradu totál,”Hateten Nia.

Nia hatutan, rendimentu iha Timor-Leste tun no empreza barak mak taka, tanbá tuir previzaun Banku mundiál nian katak Timor-Leste ninia kreximentu negativu iha tinan 2020 menus husi porsentu 2.8. “Provisaun de baze ba tinan 2020, wainhira ita la iha pandemia COVID-19 ne’ebé mak mosu oras ne’e, tuir previzaun ne’e mak Banku mundiál hato’o katak ita sei iha kreximentu negativu iha tinan 2020 menus 2.8% maibe, ida ne’e rejulta husi falta Orsamentu Jeral do Estadu, no redusaun iha gastu públiku emjerál,” nia hateten

Nia haktuir, COVID-19 ne’e fó impaktu ba ekonomika sira ne’e, tanbá naturalmente sei depende ba medidas kontensaun ne’ebé mak governu sei foti, previzaun hatudu katak hanesan komparasaun iha krize finansiamentu mundial. “Maibe impaktu ekonomika sira ne’e naturalmente sei depende ba medidas kontensaun ne’ebé mak governu sei foti, previzaun hatudu katak hanesan komparasaun iha krize finansiamentu mundial, iha reinu unidus 2008, lakon nia perra do PIP, mesal purvolta 4% tun 2%, gripes Espanola iha 1917 mensalmente iha 2008,” Informa Nia.

Purenkuantu, “Kontextu pais barak mak halo projesoens kona-ba posiblidade paradu ba sira-nia ekonomia, produsaun iha rai laran nian, emjeral nivel global, projisoens hotu hatudu katak purvolta de 2% ne’ebé mak ita dehan optimista liu to’o 5%, ba kada fulan ita implementa distánsiamentu social kada fulan ita medidas sanitaria sira,” Informa nia.

Antes ne’e Prezidente Camara Comersio Industriál Timor-Leste (CCI-TL) Oscar Lima hatete impaktu hosi impase politika ne’ebé la’o lori tempu naruk no aumentatan ho surtu Covid-19 halo setór ekonómia barak mak lakon rendimentu tanba ne’e husu ba governu atu tau osan iha banku nune’e bele fó kréditu ba setór privadu sira ho jurus ne’ebé ki’ik. “Ami husu ba governu para bele tau osan iha BNCTL minimu milliaun $200 ital para nia bele fó kreditu para Timor oan sira bele diversifika sira nia atividade ekonómikú,” hatete Oscar Lima ba jornalista BT, iha nia kna’ar fatin, CCI-TL, Akait sexta (14/08).

Diversifika ekonomia enkuantu setór privadu sira foti sira kapital rasik mak tau iha ne’eba ne’e ema hotu hakarak tau halo bo’ot maibe labele tanba osan la to’o entaun presiza kreditu, mak bele fó maibé ho jurus ne’ebe mak ki’ik pelumenus 3-5 porsentu. Governu bele investe iha BNCTL tanba BNCTL nu’udar uniku banku estadu nian no di’ak tebes nune’e bele fó kredito ba emprezariu sira hodi sira bele halo atividade ekonómika sira seluk hanesan agrikultura indústria no setór estrateijiku sira iha area ekonomia nian. Hein katak ho anin fresku ne’ebé hahú mosu dau-daun bele tulun emprezariu nasional sira hodi hal’o investimentu iha setór importante sira hodi kontribui ba dezenvolvimentu ekonomia nasaun nian ne’ebé ohin loron la’o namlele hela. (BT)