Asuransi


DÍLI----Kompania Business Media Group hari’i iha tinan 2010 no to’o iha tinan 2020 Business Timor Konsege kompleta ona nia ejistensia ba tinan 10 nia laran, maske durante ne’e Kompania Business Timor nia ejistensia seidauk hetan vizita.

Maske antes ne’e liuhusi komprimisiu governu liu-liu Ministru ka Sekretariu Estadu Komunikasaun Sosial hato’o sira nia komprimisiu katak sei halo vizita ba instituisaun Media sira ne’ebe ejiste iha Timor-Leste atu oinsa bele hare kondisaun serbisu media nian inklui mos problema sira ne’ebe hasoru.

Husi Business Timor nia observasaun katak durante ne’e Sekretariu Estadu sira konsege halao sira nia Vizita ba ba Instituisaun Media sira seluk maibe ignora tiha Business Timor to’o sira nia mandatu remata. Hafoin iha VIII Governu ne’ebe lidera husi Primeiru Ministru Taur Matan Ruak hodi establese Ministeriu Asuntu Parlamentar no Komunikasaun Sosial (MAPKomS) hodi nomeia Ministru Francisco Martins da Costa Jeronimo, foin halo vizita dahuluk ba Kompania Business Timor iha loron 11 fulan Jullu tinan ne’e iha loron Sabadu tuku 10 dader.

Iha vizita kortejia husi Ministru Asuntu Parlamentar no Komunikasaun Sosial (MAPKomS) Francisco Martins da Costa Jeronimo nudar Orgullu bo’ot ida ba BT tanba antes ne’e hetan ignorasaun husi Komprimisiu Sekretariu Estadu balun maske sira hatene hela ejistensia BT nomos hare hela rejultadu Publikasaun jornal Business Timor iha sira nia serbisu fatin nomos iha publiku. Iha vizita Kortejia MAPKomS Francisco Martins da Costa Jeronimo sai orgullu ida ba Kompania Business Timor Inklui mos Estrutra no funsionariu Tomak.

Iha prezensa MAPKomS nia lider Business Timor Hanesan Diretor José Ximenes direitamente simu Ministru hodi hakat sae ba andar kraik hodi hakat ba iha andar Leten hodi simu ho tara tais ba Ministru nudar Simbolu Kultura no Apresiasaun ida ba Vizita refere no hetan akompana husi funsionariu BT tomak. Depois tara tais hodi hola fatin tur, Diretor Business Timor fó apresia tebes ba MAPKomS nia Vizita tanba nudar istoria dahuluk iha ejestensia BT durante ne’e.

“Hau Orgullu tebes ho ita nia vizita mai iha ami nia kompania Business Timor Tanba desde Inisiu to’o ohin loron seidauk hetan vizita husi Lider governu ne’ebe mak kaer pasta hanesan Sekretariu Estadu Komunikasaun ruma,” dehan José Ximenes ba MAPKomS iha Edifisiu Business Timor, Kolmera Shooping Center, Lantai 3, Sabadu (11/07).

Iha dada lian entre Diretor BT ho MAPKomS ne’ebe akompana husi Asesor MAPKomS ho nia Ekipa inklui mos Ekipa Jornalista BT rasik, diretor mos hato’o kona-ba problema sira ne’ebe mak durante ne’e BT hasoru. Problema sira ne’ebe mak Diretor hato’o mak kona-ba kuantidade Produsaun jornal Business Timor, Problema Situasaun rai laran ne’ebe afeita ba rendimentu, kapasitasaun, inklui mos problema sira seluk tan. “Durante ne’e Business Timor iha rekursu umanu ne’e sai desafiu ba Busniss Timor tanba durante ne’e BT Hakbi’it ninia rekursus maibe ohin loron rekursu sira ne’e, ohin lororn sirkula tiha ba instituisaun seluk,” katak nia.

Alende ne’e mos Diretor mos esplika kona-ba Area kobertura Business Timor rasik tanba BT nudar jornal ida ne’ebe mak koloridu no semanal ne’ebe durante ne’e publika maka’as liu asuntu ekonomia halo komparasaun ho Jornal sira seluk ne’ebe foka liuba asuntu politika.

Iha biban ne’e mos manajer Business Timor Domingos Freitas haforsa tan katak durante ne’e BT nia ejistensia konsege halo nia sirkulasaun iha munisipiu sira hanesan Maliana, Oe-Cusse, Suai, Ermera, Aileu, Baukau no Vikeke, maibe tanba ho impase politika konsege iha munisipiu balun paradu nia sirkulasaun tanba problema finanseiru. “Uluk ita hetan subsidiu husi governu no konsege sirkula iha munisipiu sira maibe depois iha tiha situasaun impase politika konsege munisipiu sira balun para nia sirkulasaun Jornal maibe ohin loron iha munisipiu Dili no Suai deit mak sei lao hela,” katak nia.

Nia dehan maske Business Timor Nudar kompana ida ne’ebe harii husi Timoroan rasik la involve husi ema estrajeiru maibe ho situasaun politika kontinua lao nafatin hodi fó informasaun ba publiku kona-ba asuntu ekonomia ne’ebe lao iha rai laran. Tan nia dehan liu husi vizita ne’ebe mak iha espera katak governu sei iha atensaun hodi fó apoiu ba Instituisaun Media sira oinsa bele kria serbisu ba timoroan sira nune’e bele kontribui ba dezenvolvimentu Timor-Leste.

Iha biban ne’e Ministru Asuntu Parlamentar no Komunikasaun Sosiál (MAPKomS) Francisco Martins da Costa Jeronimo iha nia dada lia hateten katak objetivu hodi halo vizita ba media sira atu oinsa bele kria kooperasaun serbisu diak liutan iha inklui mos oinsa bele hare kondisaun nomos oinsa bele enkoraja jornalista sira bele serbisu diak liutan hodi fó informasaun ne’ebe kredibel no kualidade ba publiku.

“Prezensa ami nian ne’e fó mensajem ba media sira, Governu iha ninian interese iha nia hanoin oinsa mak hakbesik-an ba media sira, buka dalan solusaunu di’ak liuba Media sira iha Timor-Leste,” hatete Ministru Asuntu Parlamentar no Komunikasaun Sosiál (MAPKomS) Francisco Martins da Costa Jeronimo.

Governante ne’e akresenta vizita ne’e lori preokupasaun no atu dezenvolve institusaun no Jornalista sira hotu ne’eb’e tun iha terenu FÓ INFORMASAUN BA PÚBLIKU HO KREDIVEL NO KUALIDADE. “Ami sei lori ita bo’ot sira nia preokupasaun no media hotu-hotu sira nia preokupasaun ida ne’e hanesan meius ida ba ami no hanesan informasaun ida ba ami, oinsa mak ami buka solusaun hamutuk, atu halo planu Asaun annual ninian saida mak atu halo ba media sira,” katak nia.

Iha vizita ne’e nia dehan katak sei la promete maibe sei esforsu atu oinsa bele akumula problema sira ne’ebe mak iha hodi politika bele fo atensaun ba instituisaun media sira iha Timor-Leste. Depois remata Vizita Ministru Asuntu Parlamentar no Komunikasaun Sosiál (MAPKomS) Francisco Martins da Costa Jeronimo ho nia ekipa foto hamutuk ho estrutura BT nomos ho funsionariu Tomak. (BT)