Asuransi


VENILALE----Ministériu Obras Públikas (MOP), fim de semana prense tempu halo inspesaun ba projetu konstrusaun estrada nasionál husi munisípiu Baukau ba munisípiu Vikeke. Projetu ne’e antes halo inagurasaun iha loron 09 fulan-Agostu tinan 2019, ne’ebé daudauk ne’e hahú serbisu iha Lot 1 husi munisípiu Baukau ba postu administrativu Venilale

Ministru Obras Públikas (MOP) Salvador Eugénio Soares dos Reis Pires hatete bazeia ba fim de semana hanesan liman ain Governu halo inspeksaun ba projetu konstrusaun estrada nasionál husi munisípiu Baukau ba munisípiu Vikeke atu hare oinsa lala’ok hahú servisu iha lot 1 husi munisípiu Baukau ba postu administrativu Venilale. “Ohin loron priense hela tempu fim de semana nian, Ita halo hela inspesaun ba iha projetu konstrusaun estrada nasionál husi munisípiu Baukau ba munisípiu Vikeke nian ne’ebé mak dadaun ne’e hala’o hela serbisu iha lot 1 nian,” Hateten Ministru MOP Salvador Eugénio Soares dos Reis Pires iha Postu administrativu Venilale, Sabadu (04/07).

Nia hatutan, Iha inspesaun ne’e governante orienta konstrusaun estrada nasionál husi munisípiu Baukau ba munisípiu Vikeke presiza la’o, tanba ne’e, sei orienta Unidade Manajementu Projetu (PMU) hamutuk ho kompañia konstrutór no supervisór hodi aprosima ho autoridade lokál no komunidade iha área afeitadu ne’ebé daudauk ne’e seidauk halo libertasaun ba rai hodi prosesa lalais indiminizasaun, nune’e konstrusaun estrada nasionál ne’e bele la’o ho di’ak. “Antes ne’e, liuhosi lansamentu fatuk dahuluk ba konstrusaun estrada nasionál Baukau-Vikeke, ha’u husu ba autoridade lokál no komunidade afeitadu atu apoiu no kontribui ba prosesu reassentamentu ka prosesu libertasaun rai, tanba, prosesu ne’e mak todan no kleur tebes, ne’ebé bele defikulta prosesu konstrusaun estrada nasionál refere,” Hateten nia.

Nia dehan, Projetu estrada nasionál trosu Baukau-Venilale no Venilale-Vikeke ne'e konstrui husi kompañia Internasionál CRIG-COVEC ho distánsia Kilometru 58 resin, ho orsamentu millaun $44 dollar Amerikanu, fundu impréstimu husi Banku Dezenvolvimentu Aziátiku (ADB). Ne’e dunik, Lansamentu fatuk dahuluk ba konstrusaun estrada Baukau-Vikeke hala'o husi Ministru Obras Públikas (MOP), Salvador Eugénio Soares dos Reis Pires, iha loron 09 fulan-Agostu tinan 2019.

Depois Projetu estrada ne'e iha Lot 2, Lot primeiru mak husi Baukau to'o Venilale no Lot segundu mak husi Venilale to'o Vikeke. Hafoin lansamentu kompañia konstrutór no superizór mobiliza kedas ekipamentu pezadu no halo levantamentu dadus ba reassentamentu ka indiminizasaun ba komunidade nia ai-horis ne'ebé afeitadu husi konstrusaun ne'e rasik. “Konstrusaun projetu ne'e sei hala'o durante tinan tolu (3) nia-laran, hahú husi fulan-Agostu tinan 2019 no sei termina iha fulan-Fevereiru tinan 2022,” Informa nia.

Prosesu libertasaun rai iha konstrusaun estrada nasionál Baukau-Vikeke lot 1 husi Baukau ba Venilale, daudauk ne’e kompañia konstrutór no supervisor hahú halo libertasaun rai iha parte Berkoli, postu administrativu Venilale nian tanba prosesu indiminizasaun la’o ona no fó ona kompesasaun ba komunidade afeitadu liuliu ba ai-horis no rezidénsia ne’ebé afeitadu husi konstrusaun refere.

“Lot 1 nian iha área balun seidauk liberta hanesan husi Baukau Vila, ba Buibau nian parte balun, suku Uailili, suku Gariuai to’o iha Fatumaka seidauk iha prosesu libertasaun rai ba konstrusaun estrada nasionál tanba sei iha prosesu identifikasaun no negosiasaun ho komunidade hodi fó indiminizasaun ba komunidade nia ai-horis no rezidénsia ne’ebé hetan afeitadu,” Informa nia. (BT)