Asuransi


ILIOMAR----Sentru Saúde Iliomar oras ne’e dadaun profizóriu utiliza transporte privadu, hodi tula pasienti ba Sentru Saúde Munispiu Lautém, tanba Ambulansia husi Sentru Saúde Iliomar avaria hodi lori mai iha nasional hodi halo manutensaun seidauk diak.

Tuir Xefí Sentru Saúde Komunitáriu Iliomar Narsizio Camoes hateten, Ambulansia husi Sentru Saúde Iliomar nian avaria no husi nasionál konsege tula ona ba nasional hodi halo manutensaun, maibé to’o ohin loron seida’uk nia rezultadu, tanbá ne’e Sentru Saúde Iliomar Provizóriu utiliza transporte privadu hanesan Amo Parókia no Transporte Privadu sira hodi lori pasienti ba Lospalos, wainhira emerjensia.

“Foin dada’uk parte husi Ministériu Saúde mai iha Munisípiu to’o mai iha Sentru Saúde Iliomar hodi lori Ambulansia halo manutensaun iha nasionál, maibé to’o ohin loron seida’uk hatene nia rezultadu,” dehan Xefí Sentru Saúde Komunitáriu Iliomar Narsizio Camoes ba BT iha nia Kn’ar fátin Sentru Saúde Iliomar, Sexta (19/06).

Nia dehan ho transporte ne’ebe at durante ne’e komunidade no pasiente sira moras, Sentru Saúde Iliomar koordenasaun hamutuk ho parte Igreja no PNTL, hodi tulun Sentru Saúde Iliomar hodi nune’e médiku sira hodi atende pasiente iha area rural. “Tanbá ne’e, fasilidade ne’e tuir ita nia fasilidade ne’ebé mak iha hodi atende ba ita nia pasiente sira, maibé fasilidade liu-liu ba parte transporte ida ne’e mak ami nia transporte ne’ebé mak avaria ona,” hateten nia.

Narsizio argumenta tan, moras mai iha Sentru Saúde Iliomar, wainhira médiku sira hare'e mak moras ne’e grave, parte Sentru Saúde Iliomar diretamente liuhusi kontaktu husi Munisípiu hodi Ambulansia husi Munisípiu bele mai tula pasiente hodi ba Lospalos. Nia dehan dalaruma moras ne’e grave liu no emerjensia liu, parte Sentru Saúde Iliomar halo koordenasaun ho Amu Parókia husi Iliomar nian hodi tula ba Lospalos. (BT)