Asuransi


DÍLI----Timor-Leste nudar nasaun ida ne’ebe antes ne’e sai propinsia ba nasaun Indonezia dala-27, ikus mai povu deside hodi haketak an no TL restaura ninia indepedensia iha loron 20 fulan Maiu tinan 2002 no to’o ohin loron (2020) TL konsege kompleta ona ninia indepedensia tinan 18 ka sai nasaun ne’ebe mak tama ona iha ambiente ho idade joven (produktivu).

Depois restaura nia indepensia Timor-Leste tenke hasoru problema oin-oin iha rai laran no tenke sidi ba sidi, Esforsu ba esforsu to’o ohin loron sidauk iha Solusaun atu oinsa bele lori mehi TL sai mos nasaun ida dezenvolvidu hanesan Singapura. Sasidik ne’ebe Timor-Leste infreta mak lideransa ka ukun nain sira seidauk unidade no kontinua mosu diferente idiolojia politika, husi Idiolojia politika mehi Timor-Leste sai Singapura kontinua namlele no novidades ba povu mak Impase Politika lao iha rai laran.

Husi novidades Impase politika lao laos halo Kaman ekonomia nasaun maibe sai naha ne’ebe todan liu tan hodi hurlele Ekonmia nasaun tenke Hakdasak tanba Seitor Privadu tenke hakilar, no Povu barak mak hakilar ba Dezenvolvimentu iha baze. Tanba husi impase politika ne’ebe lao hahú husi Tinan 2017 no ikus mai liu Parlamentu Nasional xumba Orsamentu Jeral Estadu ne’ebe governu aprezenta, lori Ekonomia TL sai hetok monu wain liu tan.

Tuir Prezidente Camara Comersiu Industria Timor-Leste (CCI-TL) Oscar Lima hateten katak ohin loron Ekonomia TL monu ona husi impase politika no liu husi xumba Orsamentu Jeral 2020 lori ekonomia monu hetok liu tan. “Ita hatene katak ho impase politika ne’ebe naruk tebes hahú husi tinan 2017 to’o 2020 depois ita mos hakarak hateten lolos katak pior liu tan kuandu ita xumba Orsamentu 2020 Timor-Leste nia ekonomia ne’e monu no agora monu at liu tan,” dehan Prezidente CCI-TL Oscar Lima ba BT iha nia knar Fatin Acait, Díli, Segunda (08/06).

Nia mos esplika katak maske Timor-Leste tama hela iha situasaun impase politika mai tan ho problema Global hanesan Pandemia virus Corona nia implikasaun lori Ekonomia mundu no Timor-Leste hetok piur liu tan. “Depois ekonimia Timor-Leste monu no nia impaktu boot liu tan mak ho Covid-19 nia impaktu ne’e boot tebes maske ita la hatene moras ne’e mai husi ne’ebe no nia impaktu kuaze rai hotu-hotu sofre moras ida ne’e no nia impaktu mos ba iha ekonomia Global,” esplika nia.

Nia informa katak ohin loron iha Timor-Leste setór privadu ne’ebe sai parseiru ba governu hasoru problema finanseiru atu halo investimentu tanba nia impaktu husi impase politika no pandemia virus Corona. Alende ne’e mós Ministru Kordenadór Assuntu Ekonómiku (MKAE) Fidelis Manuel Leite Magalhães hatete ho problema Virus Covid-19 konsege lori impaktu bo’ot ba iha TL tanba populasaun nia komsumsi tun, no komfiansa ba atua ekonomiku sira monu, rezultadu rendimentu husi populasaun menus, empreza sira lahetan lukru, no empreza sira mós sei lulun biti.

“Ba parte fortura nian iha ita nia populasaun nia komsumsi sei tun, no komfiansa ba atuas ekonomiku sira sei monu, tanba inserteza ne’ebé mak kauza husi COVID-19, no distribuisaun ne’ebé mak mosu, no ba redinmentu mós sei menus. Ida ne’e sei redus ema nian poder de kompra ba empreza sira. Tanba ida ne’e mós, rezulta empreza sira barak mak sei taka, iha redusaun prokura. Emjerál ita rejista redusaun ne’ebé mak kontante husi importasaun no setór turizmu ita bele dehan sei paradu totál,” Hateten Ministru Koordenadór Assuntus Ekonómikus Fidelis Manuel Leite Mgalhães, iha PN, Kinta (23/04).

Nia hatutan, rendimentu iha Timor-Leste tun no empreza barak mak taka, tanbá tuir previzaun Banku mundiál nian katak Timor-Leste ninia kreximentu negativu iha tinan 2020 menus husi porsentu 2.8. “Provisaun de baze ba tinan 2020, wainhira ita la iha pandemia COVID-19 ne’ebé mak mosu oras ne’e, tuir previzaun ne’e mak Banku mundiál hato’o katak ita sei iha kreximentu negativu iha tinan 2020 menus 2.8% maibe, ida ne’e rejulta husi falta Orsamentu Jeral Do Estadu, no redusaun iha gastu públiku emjerál,” Hateten Fidelis.

Nia haktuir, COVID-19 ne’e fó impaktu ba ekonomika sira ne’e, tanbá naturalmente sei depende ba medidas kontensaun ne’ebé mak governu sei foti, previzaun hatudu katak hanesan komparasaun iha krize finansiamentu mundial. “Maibe impaktu ekonomika sira ne’e naturalmente sei depende ba medidas kontensaun ne’ebé mak governu sei foti, previzaun hatudu katak hanesan komparasaun iha krize finansiamentu mundial, iha reinu unidus 2008, lakon nia perra do PIP, mesal purvolta 4% tun 2%, gripes Espanola iha 1917 mensalmente iha 2008,” Informa Nia.

Purenkuantu, “Kontextu pais barak mak halo prejisoens kona-ba posiblidade paradu ba sira-nia ekonomia, produsaun iha rai laran nian, emjeral nivel global, projisoens hotu hatudu katak purvolta de 2% ne’ebé mak ita dehan optimista liu to’o 5%, ba kada fulan ita implementa distánsiamentu social kada fulan ita medidas sanitaria sira,” Hateten Fidelis. Nune’e mos iha selebrasaun loron restaurasaun Independensia ba dala 18 Prezidente da Republika Francisco Guterres (Lú-Olo) iha nia deskursu hateten katak ohin loron ekonomia nasaun tama hela iha ambiente Namlaek (laburas).

Ekonomia Timor-Leste tama iha ambitu refere tanba Timor-Leste ohin loron tama hela iha Estadu Emerjensia tanba kauza husi Pandemia Verus COVID-19 ne’ebé ohin loron nasaun hotu hasoru. Nia dehan TL lao ho situasaun estadu emerjensia nudar dalan ida atu oinsa bele salva vida povu Timor Leste husi pandemia verus Corona ne’ebé sai problema global ohin loron. Tan ne’e hare husi problema refere, liga ba independensia TL ne’ebé kompleta ona ba dala XVIII maibe ekonomia kontinua lao namlaek hanesan mos ho nasaun sira seluk.

Presidente hateten, ekonómia Timor-Leste laburas tanba tuir relatóriu anuál husi Banku Sentral fó-sai katak atividade ekonómika ladún lao, produtu internu brutu mós tun, maske ekonomia iha tinan kotuk sae maibé iha tinan ida ne’e, tun fali pursentu ida (1%). Ekonomia TL tun tamba fatór lubun ida, hanesan Orsamentu Jerál Estadu xumba iha Parlamentu Nasionál no obriga Estadu moris ho rejime duodésim, Mudansa klimatika ne’ebé mak halo hodi populasaun lubuk ida tenke afeita inudasaun iha sidade Dili no Munisipiu balun inklui mos pandemia virus Corona (COVID-19).

“Fatór sira ne’e hotu afeta tebes ita-nia ema-sira ne’ebé moris husi sira-nia negósiu kiik, médiu no boot. Ho rendimentu ne’ebé kiik ka menus, família-sira lakon kbi’it hodi sosa ai-han no produtu sira seluk ne’ebé presiza lorloron,” hateten Sefe Estadu. Sefe estadu afirma ho próblema ne’ebé iha liu-husi Governu Konstitusional Da-ualu aprova no hahú ona implementa Pakote Ekonómiku, ho kuaze dóllar milliaun atus ida limanulu, hodi responde ba moras COVID-19 no estragus husi udan bo’ot iha aspetu ekonómiku-sosiál,” Katak Nia.

Pakote Ekonómiku nia objetivu mak atu apoiu uma kain ho rendimentu kiik liu dolar atus lima kada fulan no evita empreza sira taka sira-nia atividade komersiál ka hatún saláriu no/ ka hasai traballadór sira. “Importante hotu-hotu hatene katak Pakote Ekonómiku ida ne’e mak hahalok dahuluk atu hamenus Povu-nia susar balun iha períodu emerjénsia. Maibé la’ós resposta ba problema hotu-hotu iha rai laran. Montante dólar milliaun atus ida lima nulu ne’ebé aprova husi Parlamentu Nasional ba fulan tolu lato’o atu hasa’e kreximentu ekonómiku ida ne’ebé ita hotu hakarak,” klarifika Prezidente da Republika.

Tan ne’e Prezidente-Repúblika fiar katak liu husi planu ne’ebé mak Governu da-ualu aprova garantia bele rekupera sosiál no ekonómika no hahú ona prepara Orsamentu Jerál Estadu ba tinan ida ne’e no ba tinan oin. “Ha’u fiar no ita hotu-hotu fiar no hanoin katak importante tebes hala’o fila-fali ita-nia ajenda reforma sosiál no ekonómika atu ita bele hakbiit no sustenta ita-nia ekonomia atu buras babeibeik,” katak nia.

Nia informa katak ohin loron Estadu labele kontinua funsiona de’it ho rejime duodésimu tanba Rejime duodésimu nu’udar rejime tranzitóriu ida exekusaun orsamentál nian ne’ebé garante, ba tempu badak hodi funsionamentu servisus públikus. Enkuantu TL la iha Órsamentu Jerál Estadu, maske TL Ho kreximentu ida ke ki’ik no hatudu katak ekonomia lakon kbiit, tanba ne’e, TL tenke rekupera fila-fali atu fó konfiansa ba ajente ekonómiku-sira hotu.

“Urjente tebes halo rekuperasaun sosiál no ekonómika. Atu bele lao ba oin ho susesu, ita presiza fó atensaun boot liu ba kapital umanu tanba ita-nia ema mak rikusoin bo’ot liu ne’ebé Timor-Leste iha. Hanesan ezemplu, ha’ u temi de’it kona-ba nesesidade atu kapasita ita-nia ema iha área saúde. Importante tebes kapasita sira ho padraun internasional atu ita-nia profissionál sira bele fó prestasaun servisu saúde ho kualidade aas no hatene fó kedas resposta adekuadu bainhira surtu moras mosu derepente,” dehan PR. (BT)