Asuransi


DÍLI----Timor-Leste nudar nasaun ida, ne’ebé kompleta ona nia Indepensia ba tinan 18, maibé iha ambietu ne’e rasik Timor-Leste oras ne’e sei kontinua kesi a'an ba iha fundu petroliferu ne’ebe durante ne’e iha. Maske Timor-Leste iha potensialiadade bo'ot iha area oin-oin maibe sei abandonado hela, Potensialidade ne’ebe mak Timor-Leste iha mak hanesan setór Turizmu, Setór Agrikultura, Setór Rekursu umanu inklui mos setór sira seluk tan.

Hare ba iha seitor importante hirak ne’e iha potensialidade bo'ot maibe laiha planu ne’ebe mak diak ikus mai Timor-Leste tenke hasoru dezafiu oin-oin no ezemplu ki'ik mak kombate pandemia COVID-19 Timor-Leste infrenta problema oin-oin tanba la prepara infreastrutura baziku. “COVID-19 halo ita hare moos kedas sala husi ukun-nain sira kona-ba latau atensaun di’ak ba infra-estrutura bázika. Ezemplu ida mak falta bee-moos iha uma-kain no fatin-públiku sira.

Ita bá hanorin ita nia-ema atu moris ho ijiene, liuhusi fase liman beibeik, maibé ita-nia ema barak mak laiha asesu ba bee-moos. Hahalok sala ne’e hahú husi ukun-nain sira ne’ebé la halo planeamentu ba oinsá gasta ho di’ak Orsamentu Jeral Estadu ne’ ebé mai husi osan Fundu Minarai,” hateten Prezidente Republika Francisco Guterres (Lú-Olo) iha nia diskursu iha Palasiu Prezidente Aitarak-Laran wainhira selebrasaun Loron Independensia Timor-Leste ba XVIII, Kuarta (20/05).

Nia esplika katak durante ne’e Timor-Leste nia depedensia ba Fundu Minarai maibe hare fila-fali ba folin Mina no gas iha Mundial kontinua ki'ik inklui investimentu fundu mina rai mos ohin loron tun tanba kauza husi problema global ne’ebe ohin loron iha. “Moras COVID-19 de’it lori ona konsekuénsia barak no bo'ot ba ekonomia mundiál no afeta umanidade tomak nia moris.

Folin minarai no gáz sei ki’ik nafatin no sei la hanesan uluk ona. Bele tun tan karik! Iha merkadu finanseiru, nasaun-sira riku ne’ebé ita investe hela osan Fundu Minarai iha ne’ebá hatudu mós ona katak valor bolsa tun makas nu’udar konsekuénsia husi hapara atividade ekonómika. Situasaun ida ne’e lori impaktu bo'ot ba reseitas ba ita-nia Fundu Minarai,” katak nia.

Nia afirma katak Tuir Relatoriu Banku Sentral foin lalais ne’e hatudu retornu Fundu Petroliferu negativu husi investimentu. “Tun ba pursentu haat virgula hitu (-4,7%) iha fulan Janeiru to’o Marsu, tinan ida ne’e. Ho retornu negativu, ita-nia Fundu Minarai lakon reseitas liu dóllar milliaun atus ualu hatnulu (840 milloens), iha fulan haat nia laran,” Hateten Presidente.

Tan ne’e nia Lú-Olo dehan Biar osan Fundu Minarai la funan hanesan horiuluk, Timor-Leste iha hela oportunidade di’ak ida hodi aselera reformas estruturais atu bele haree filafali oinsá Timor-Leste bele sai País ida ne’ebé bele atrai duni investimentu husi rai-li’ur, hetan konfiansa husi investidor-sira no sai país ida ne’ebé seguru atu halo negósiu. Ita-nia País iha kapasidade atu nakfilak husi ekonomia-de-konsumu ba ekonomia-de-produsaun. “To’o ona tempu atu produtor lokal sira aumenta liután sira-nia produsaun no produtividade, liuliu ba hahán báziku,” katak nia 

Alende ne’e mos Prezidente Repúblika apela ba sidadaun hotu-hotu atu sosa produtu lokál atu nune’e bele motiva agrikultor no produtor-sira atu hasa’e sira-nia produsaun tanba agrikultura mak baze ekonomia no sektór ida ne’ebé bele fó empregu barak liután ba sidadaun sira. Nia mos afirma katak tempu ona ba Timor-Leste atu investe maka’as iha agrikultura. Hamriik ho kbi'it rasik mak fó sentidu ba soberania nasional proklama iha 28 Novembru 1975 no restaura iha 20 Maiu 2002.

“Ho COVID-19, ita haree moos ona katak importante tebes prodús rasik ita-nia hahán báziku no kaer metin polítika seguransa alimentar ida ne’ebé garante hahán ba ita-nia Povu, iha momentu ne’ebé de’it. Ita hotu tenke hatene prodús rasik ita-nia hahán,” dehan nia. Atu taka nia apela mos ba sidadaun hotu atu kontinua fiar nafatin katak orgaun soberania hotu-hotu atu esforsa nafatin nu’ udar nasaun ida, iha rejiaun Ázia no Pasífiku, hamri'ik ho matenek no kbi'it rasik, ho identidade sosiál-kulturál rasik tuir espiritu ne’ebe kuda ona iha timoroan sira. (BT)