Asuransi


DÍLI----Iha Selebrasaun loron restaurasaun Indepedensia Timor-Leste iha loron 20 Maiu tinan ne’e konsege kompleta ona ba tinan 18 (XVIII) maibe hare ba iha ekonomia nasaun tama hela iha ambiente Namlaek (laburas). Ekonomia Timor-Leste tama iha ambitu refere tanba Timor-Leste ohin loron tama hela iha Estadu Emerjensia tanba kauza husi Pandemia Verus COVID-19 ne’ebé ohin loron nasaun hotu hasoru.

Iha Diskursu Prezidente da Republika Francisco Guterres (Lú-Olo) iha selebrasaun loron independensia Timor-Leste ba dala-XVIII iha Aitarak Laran hateten iha selebrasaun loron indepedensia tinan ne’e Timor-Leste lao hela ho situasaun emergensia, maske loron refere nudar loron istoriku ba TL.

Nia dehan iha selebrasaun Independensia refere, TL lao ho situasaun estadu emerjensia nudar dalan ida atu oinsa bele salava vida povu Timor-Leste husi pandemia virus Corona ne’ebé sai problema global ohin loron. Tan ne’e hare husi problema refere, liga ba independensia TL ne’ebé kompleta ona ba dala XVIII maibe ekonomia kontinua lao namlaek hanesan mos ho nasaun sira seluk.

“Ha’u (Red-Françisco Guterres “Lu-Olo”) núdar Presidente da Repúblika simu proposta ne’e, ho haksolok, nu’udar medida Estadu Emerjénsia atu proteje nafatin Povu Timor-Leste husi moras COVID-19. Maski iha faze ida ne’e, ita konsege salva vida Povu nian, maibé ita-nia ekonomia la buras,” Hateten Presidente da Repúblika Françisco Guterres “Lu-Olo” liu husi nia Diskursu Iha Palasiu Presidente, Aitarak-Laran, Kuarta (20/05).

Presidente hateten, ekonómia Timor-Leste laburas tanba tuir relatóriu anuál husi Banku Sentral fó-sai katak atividade ekonómika ladún lao, produtu internu brutu mós tun, maske ekonomia iha tinan kotuk sae maibé iha tinan ida ne’e, tun fali pursentu ida (1%). Ekonomia TL tun tamba fatór lubun ida, hanesan Orsamentu Jerál Estadu xumba iha Parlamentu Nasionál no obriga Estadu moris ho rejime duodésim, Mudansa klimatika ne’ebé mak halo hodi populasaun lubuk ida tenke afeita inudasaun iha sidade Dili no Munisipiu balun inklui mos pandemia virus Corona (COVID-19).

“Fatór sira ne’e hotu afeta tebes ita-nia ema-sira ne’ebé moris husi sira-nia negósiu ki’ik, médiu no bo’ot. Ho rendimentu ne’ebé ki’ik ka menus, família-sira lakon kbi’it hodi sosa ai-han no produtu sira seluk ne’ebé presiza lorloron,” hateten xefe Estadu. Xefe estadu afirma ho próblema ne’ebé iha liu-husi Governu Konstitusional Da-ualu aprova no hahú ona implementa Pakote Ekonómiku, ho kuaze dóllar milliaun atus ida limanulu, hodi responde ba moras COVID-19 no estragus husi udan bo’ot iha aspetu ekonómiku-sosiál,” Katak Nia.

Pakote Ekonómiku nia objetivu mak atu apoiu uma-kain ho rendimentu ki’ik liu dollar atus lima kada fulan no evita empreza sira taka sira-nia atividade komersiál ka hatún saláriu ka hasai traballadór sira. “Importante hotu-hotu hatene katak Pakote Ekonómiku ida ne’e mak hahalok dahuluk atu hamenus Povu-nia susar balun iha períodu emerjénsia. Maibé la’ós resposta ba problema hotu-hotu iha rai laran. Montante dóllar milliaun atus ida lima nulu ne’ebé aprova husi Parlamentu Nasional ba fulan tolu lato’o atu hasa’e kreximentu ekonómiku ida ne’ebé ita hotu hakarak,” klarifika Prezidente da Republika.

Tan ne’e Prezidente-Repúblika fiar katak liu husi planu ne’ebé mak Governu da-ualu aprova garantia bele rekupera sosiál no ekonómika no hahú ona prepara Orsamentu Jerál Estadu ba tinan ida ne’e no ba tinan oin. “Ha’u fiar no ita hotu-hotu fiar no hanoin katak importante tebes hala’o fila-fali ita-nia ajenda reforma sosiál no ekonómika atu ita bele hakbi’it no sustenta ita-nia ekonomia atu buras ba beibeik,” katak nia.

Nia informa katak ohin loron Estadu labele kontinua funsiona de’it ho rejime duodésimu tanba Rejime duodésimu nu’udar rejime tranzitóriu ida exekusaun orsamentál nian ne’ebé garante, ba tempu badak hodi funsionamentu servisus públikus. Enkuantu TL laiha Órsamentu Jerál Estadu, maske TL Ho kreximentu ida ke ki’ik no hatudu katak ekonomia lakon kbi’it, tanba ne’e, TL tenke rekupera fila-fali atu fó konfiansa ba ajente ekonómiku-sira hotu.

“Urjente tebes halo rekuperasaun sosiál no ekonómika. Atu bele lao ba oin ho susesu, ita presiza fó atensaun bo’ot liuba kapital umanu tanba ita-nia ema mak rikusoin bo’ot liu ne’ebé Timor-Leste iha. Hanesan ezemplu, ha’ u temi de’it kona-ba nesesidade atu kapasita ita-nia ema iha área saúde. Importante tebes kapasita sira ho padraun internasional atu ita-nia profissionál sira bele fó prestasaun servisu saúde ho kualidade a’as no hatene fó kedas resposta adekuadu bainhira surtu moras mosu derepente,” dehan PR. (BT)