Asuransi


DÍLI----Relasiona ho prezensa surtu Corona Virus Desease-2019 (COVID-19) iha Timor-Leste liliu iha Oe-Cusse mezmu kazu iha Rejiaun Administrativu Espesial Oe-Cusse Ambeno (RAEOA) laiha maibe ema tama karantina hamutuk na’in-159 no dadaun ne’e hela ema na’in-6 mak sei iha hela karantina.

Prezidente Autoridade RAEOA José Luis Guterres “LUGU” hatete Ohin mai enkontru ho primeiru Ministru par hakarak informa Situasaun COVID-19 iha Oe-Cusse no kestaun seguransa iha ne’eba tanba nemak kazu iha Oe-Cusse laiha maibe ema iha karantina hela na’in-6.

“Ohin informa ba Primeiru Ministru kona-ba ema ne’ebé tama Karantina iha rai Oe-Cusse ate a data hamutuk ema na’in-159 maibe ema na’in-153 sai ona no kumpri ona loron 14 hela na’in-6 ke hela iha sentru rekollamentu iha Rai Oe-Cusse,” Hatete PA-RAEOA José Luis Guterres “LUGU” ba Jornalista hafoin remata enkontru ho PM, Iha Palasiu do Governu, Tersa (19/05).

Nia hateten, Sira na’in-6 ne’e na’in-3 tama husi Postu Administrativu Pasabe no na’in-3 tama husi Postu Administrativu Oesilo i sira na’in-6 tama illegalmente iha loron tolu liuba kotuk. “Ami Kumpri normais hot-hotu,” Hateten Nia.

Nia haktuir, Atu informa mós serbisu Professor Dotór Nelson Martins nia mak Prezidente Brigada Soque ba iha Oe-Cusse, no nia foin halo vizita. Depois iha tim ne’ebé Dotór Nelson Martins prezide partisipasaun husi sosiedade sivil, infermeirus medikús hospital nian. Ne’ebé ema barak Partisipa iha Tim ida ne’e.

“Ami mós halo ona proposta orsamentu ba iha COVID-19 nian tanba ita preziza prepara-an par sei COVID-19 ne’e hanesan inkrementa karik hanesan fatin seluk iha ita-nia rai sorin rai Indonezia mós aumenta ba bebeik. Ne’ebé ita hanesan rai Oe-Cusse impartikular ami tenke reforsa medidas de seguransa iha ne’eba fó apoiu ba ita-nia Unidade Patrollamentu Fronteira (UPF), ami fó ba Polisia Nasional Timor-Leste (PNTL), liliu Polisia Komunitárius par bele garante katak ema ne’ebé tama illegal mai Kumpri Karantina,” Esplika LUGU.

Nune’e, Kona-ba orsamentu ami-nia ekipa sei hare, ami iha fim de ida ne’e ami mai iha gabinete PA-RAEOA par bele assina hodi lori mai iha Primeiru Ministru. Nia kontinua hatutan, hnaesan mós ita presiza halo kria kondisoens ba Unidade Patrollamentu Maritíma (UPM) par sira bele halo Patrollamentu iha Tasi par evita ema ne’ebé tama iha ita-nia Rain illegalmente par bele bolu tama karantina par kumpri medidas hotu.

Purke iha Timor-Leste mezmu moras surtu Corona Virus seidauk kona ema mate maibe kria kondisoens sira ne’e par bele halo preparasaun deit wainhira mosu mai tan bele responde ona ba situasaun sira hanesan fatin ka tim ne’e preparadu ona. “Signifika katak medidas ne’ebé governu toma to’o ohin loron medidas ne’ebé ke diak, ita presiza hare halo nusa mak ita bele funu kontinua tan tanba ita presiza hare mós iha Oe-Cusse, purezemplu, iha Kupang aumenta barak, entaun agora ne’e ita presiza kuidadu, para ita bele evita lori moras ne’e mai iha ita-nia rain,” Informa nia. (BT)