Asuransi


DÍLI----Iha loron 13 fulan Marsu tinan ne’e mosu inundasaun ne'ebé akontesé iha area oioin iha kapitál Dili Hanesan iha Area Becora, Taibesi, Bidau, Kuluhun, Bemori, konsége lori dezastre boot ba Povu sira ne’ebe mak iha.

Husi inundasaun tenke lori trauma oin-oin ba povu sira hahú husi labarik to’o ferik no katuas sira tanbá sira tenke lakon sasan uma laran hanesan estraga povu sira nia hela fatin nomos sira tenke toba iha tahu laran. Husi akontesimentu ne’e lori mos triste balun ba familia balun tanbá tenke lakon sira nia familia balun husi inundasaun refere.

Iha akontesimentu ne’e Governu liu husi Sékretariu Estadu Protesaun Sivil (SEPS) tun direitamente hodi apoiu vitima sira hodi evakua ba iha fatin sira ne’ebe mak séguru hanesan Edifisiu Protesaun Sivil, Igreja Bidau nomos fatin séluk. Tuir Sékretariu Estadu Protesaun Sivil katak inundasaun ne’ebe Invade Kapitál Díli mak hanesan Becora, Bidau, Kuluhun, Bemori, Taibesi nomos fatin séluk tan.

Responsável refere ona katak "iha buat barak mak estraga, inklui uma sira" no autoridade sira hasai hela ema sira ba "fatin provizóriu sira", dehan sékretáriu Estadu Protesaun Sivil Alexandrino Xavier de Araujo, ba Jornalista sira foin lalais ne’e. Nia dehan husi akontesimentu refere konsége estraga sasan komunidade barak ninia inklui uma sira hodi governu lori sira ba fatin ne’ebe provizoriu.

Husi dezastre refere iha sábadu Publiku sira barak mak voluntariu hodi halo limpeza inklui liu husi Ministeriu Obras Publiku orienta kedas Instituisaun Gestaun Ekipamentus, Ministeriu Defesa mos Orienta PNTL no F-FDTL hodi ajuda normalize fali fatin sira ne’ebe afeita ba inundasaun hanesan Edifisiu Prezidénsia Repúblika, Eskola Portugeza Díli, Universidade Nasionál Timor Lorosa’e (UNTL) no to'o eis-Prezidente Repúblika, Xanana Gusmão, nia uma ne'ebé hetan mós inundasaun.

Tuir Informasaun ne’ebe BT sita husi Sapo katak Ministru Obras Públikas, Salvador Soares, bainhira vizita Eskola Portugeza iha Díli hatete katak ekipa sira Governu nian, inklui Institutu Jestaun ho Ekipamentu kontinua iha loron-séxta kalan ne'e. "Ami avalia hela situasaun ne'ebé agora ami iha no Eskola Portugeza hanesan duni próblema ida. Ami mobiliza ekipamentu todan hodi hahú atua kedas hodi nune'e labele iha tan estraga sira bainhira udan tau fali", nia hatete.

Governu verifika hela "estraga sira hotu ne'ebé mak akontesé" no avalia saida mak bele halo. Bainhira hatán kona-ba kondisaun sira drainajen sidade nian no hosi mota Bidau rasik, ne'ebé mak estraga mota ninin no hamosu estraga boot sira iha loron-séxta ne'e, Salvador Soares hatete katak dezeñu detalladu hosi Planu drainajen nian konklui ona maibé presiza atu implementa. "Planu diretor séi iha kustu dolar millaun 250 no ami tenki haruka fundu sira ba ne'e", nia hatete.

"Agora daudaun ami tenta hodi hadi'a hodi normaliza situasaun ho rekursu sira ne'ebé ami iha", nia hatete. Konstrusaun ne'ebé la metin no la reguladu, manutensaun fraku hosi zona sira eskoamentu bee nian no konstrusaun hosi uma sira iha besik mota ibun no, iha kazu barak iha besik estrada, aumenta próblema sira bainhira udan maka'as. Iha kazu hosi mota rasik, populasaun lokal sira hatete katak obra foun bele ajuda halo fraku mota ninin sira, halo fatuk sira monu maka'as no material sira séluk ba mota laran no halo intupidu iha parte oioin.

Ne'e implika ona katak volume hosi bee arasta kuantidade boot hosi restu sira ne'ebé mak aumenta durante kanal nia laran hodi blokeia korente maka'as ne'ebé halo aumenta iha parte ninin sira. Alende ne’e husi Dezastre ne’ebe mak iha konsége iha loron 3 nia laran konsége halo fatin sira ne’ebe inundasaun Blokiadu ba transporte sira atu liu tanbá fatin sira ne’e nakonu ho tahu no fatin inklui sasan sira séluk.

Maske Inundasaun ne’ebe iha komunidade balun to’o ohin loron séidauk hetan apoiu emerjensia balun husi governu hodi sira bele responde ba iha sira nia moris lor-loron. “Ami to’o ohin loron séidauk hetan apoiu husi Governu atu oinsa bele hadia fali ami nia uma ne’ebe hetan dezastre,” dehan Vitima Maria Ba jornalista sira iha Suku Bidau.

Nia konta tuir katak akontesimentu ne’ebe sira hasoru ohin loron sira tenke mantein hodi hela ho vizinu sira tanbá uma ne’ebe sira hela hetan estragus seidauk hadia tanbá laiha kbi’it ho rajaun sasan no osan hotu bee lalin hotu no seidauk hatene nia paradeiru. “Ami atu hadia fali ami nia uma forsa laiha tanbá Osan no sasan sira hotu mota lalin hotu no to’o ohin loron ami han deit séi depende ba ami nia vizinu sira,” hateten nia.

Tuir Obsérvasaun BT katak maske Inudasaun ne’e akontesé iha loron 13 fulan Marsu ne’e maibe komunidade sira kontinua nafatin hamos sira nia uma hodi hasai tahu no ai sira inklui balun konsége halo rehabilitasaun fila-fali sira nia uma maibe séidauk finaliza. Alende ne’e IGE kontinua nafatin lalin rai sira ne’ebe tama mota no barajen sira iha Díli laran to’o ohin loron séidauk finalize.

Alende ne’e mos Ministeriu Saude mos hatun Ekipa Mediku sira hodi halo tratamentu ba iha Komunidade sira inklui mos fahe Muskiteriu ba komunidade sira tanbá tuir Informasaun ne’ebe BT rekolla katak ohin loron moras ne’ebe Komunidade sira hasoru mak hanesan Isin Katar, Mear nomos Malaria. (BT)