Asuransi


DÍLI----Timor-Leste nudar nasaun ida ne’ebe hetan nia indepensia durante tinan-18 maibe iha setór Ekonomia rai laran kontinua dependesia ba Orsamentu Jeral Estadu (OJE) tanbá Menus industria iha rai laran hodi kore an hosi OJE.

Maske ohin loron iha ona setór privadu barak maibé seidauk halo investimentu iha Industria hodi halo Setór privadu sira dada iis wainhira laiha Orsamentu Jeral Estadu. Tuir Lay Siu Hing nudar diretor kompaña Star King Grupu hateten katak durante ne’e setór privadu rai laran kontinua depensia ba OJE nudar save importante ba ekonomia rai laran tanbá faila ida mak seidauk iha industria hodi kore setór privadu sira hosi Orsamentu Jeral Estadu.

“Primeiru ita hare los tanbá barak nia depensia ba Orsamentu Jeral Estadu tanba ita nia faila ne’e iha ita nia industria iha Timor ladun iha,” dehan Lay Siu Hing nudar diretor kompaña Star King Grupu ba BT iha nia knar fatin, Audian, Dili, Kinta (06/02).

Nia mos esplika katak hosi industria Menus implikasaun mos Timor-Leste mak hanesan dependensia ba importansaun pursentu 90 tanba produsaun rai laran ho pursentu 10 hodi halo setór privadu kontinua nafatin depende ba OJE. “Tanbá sasan hotu ita importa hosi liur deit no ida ne’e nia implika ba ita nia situasaun rai laran no se wainhira Orsamentu Jeral lalao ita hateten katak buat hotu faila hotu tanbá ita nia depensia ba OJE nomos Inportasaun pursentu 90 no produsaun rai laran pursentu 10 deit,” katak nian.

Maske ohin loron iha setór privadu barak tantu Internasional nomor nasionál kontinua depende ba projetu governu ninian no ohin loron industria iha rai laran ne’ebe halo produsaun ba produtu sira oinsa bele responde ba merkadu rai laran nomos halo exportasaun sei menus. “Tanbá pursentu 10 ne’ebe mak Timor-Leste produs hodi halo exportasaun mak kafe deit no industria barak laiha no agora mak kolega balun halo industria mak bee-moos mak foin komesa lao, industria Masin,” katak nia.

Nia klarifika katak wainhira iha rai laran komesa iha industria no fabrika oin-oin mak komesa menus ona ba depensia ba OJE inklui mos ba inportasaun. “Se aban bainrua ita nia industria no fabrika sira komesa lao ona, hahú redus ona inportasaun entaun ita ladun depende ba Orsamentu Jeral Estadu tanbá setór privadu fiar rasik ba nia negosiu maibé iha mos produsaun balun tenke depende ba iha Orsamentu Jeral Estadu hanesan Britas, Tian Listrik inklui sira seluk tan ne’ebe mak ba kontruksaun hakarak ka lakohi presiza OJE tanbá bainhira laiha projetu sasan sira ne’e sei la hola no ida ne’e mak sirkulasaun osan problema iha ne’e,” katak nia.

Tan ne’e Kuandu Orsamentu Estadu laiha nia implikasaun ba fabrika lokal sira ne’ebe mak iha maibé wainhira setór privadu produs aihan hodi halo exportasaun sei mihis dadaun nia depensia ba Orsamentu Jeral Estadu tanbá Orsamentu Jeral laiha mos produsaun kontinua lao nafatin hodi faan iha merkadu rai laran inklui mos halo exportasaun.

Nia mos kestiona mos kona-ba setór privadu internasional sira barak mak mai iha Timor-Leste maibé seidauk halo investimentu ne’ebe boot maibé sira nia prezensa iha TL hodi kompete ho setór privadu rai laran ba iha projetu sira hanesan projetu Governu, Projetu ADB, Projetu Banku Mundial ne’ebe loke tenderizasaun iha Timor-Leste.

Tan ne’e wainhira iha futuru setór privadu nasionál no Internasional iha ona hanoin diak hodi halo investimentu iha rai laran mak OJE sei la sai ona save ekonomia nasaun ninian maibé produsaun no industria sira mak sei sai ekonomia forte nasaun ninia. “Se wainhira iha ita nia rai laran hahú ona halo produsaun hodi responde ba iha merkadu rai laran inklui halo mos exportasaun mak ita sei la depende tan ba iha Orsamentu Jeral Estadu,” katak nia.

Nia dehan ohin loron hakarak ka lakohi Timor-Leste tenke dependensia ba iha OJE Estadu ne’ebe mak iha. Tan ne’e nia mos rekomenda ba iha Estadu no governu hakarak atu kore setór privadu rai laran hosi OJE mak governu tenke fasilita setór privadu rai laran mak hanesan kria ambiente ne’ebe diak hanesan Siguransa rai laran, hadia lei balun inklui mos tenke apoiu setór privadu rai laran hodi sai save importante iha pais ne’e.

Se wainhira laiha siguransa ne’ebe diak no lei mak iha futuru Timor-Leste nia ekonomia kontinua nafatin depende ba iha OJE Estadu tanbá laiha kondisaun ne’ebe diak ba setór privadu rai laran nomos internasional atu interese investe iha Timor-Leste. “Atu labele dependesia ba OJE mak primeiru tenke hare ba iha Politika tanbá bainhira iha rai laran ita nia politika kontinua lao hanesan ne’e sei la lao, segundu mak Siguransa tenke garante ba setór privadu, terseiru mak Lei sira hodi fo forsa ba setór privadu hodi halo Investimentu. (BT)