Asuransi


DÍLI----Atu asegura ekonomia Timor-Leste la’o ho estabel no kontribui mós redusaun númeru dezempregu iha rai laran joven timoroan sira presiza involve iha vida emprendedorizmu.

Vice Prezidente Camara Comérsiu e Indústria Timor-Leste (CCI-TL) Rui Castro hateten Joven Timor-Leste barak iha potensialidade boot atu involve an iha vida emprendedór, maibé presiza kriatividade no badinas hodi ultrapasa iha prosesu ida difisil hodi alkansa ba objetivu di’ak ida.

“Iha esforsu balun ne’ebé mak CCI-TL hahú identifika ona hosi juventude sira hodi hetan susesu liu hosi prosesu ida lafasil, iha joven balun hosi munisípiu Ermera ne’ebé oras nee susesu ona iha prosesu promove Kafé Letefoho ho kualidade as ne’ebé oras ne’e fó susesu duni ba nia atividade rasik.’’ Dehan Vice Prezidente Camara Komérsiu e Indústria Timor-Leste Rui Castro ba jornalista Business Timor (BT) Iha Acait, Dili, Segunda (03/02/20)

Nasaun Timor-Leste presiza númeru grupu emprendedór hamutuk rihun tolunulu resin neen (36.000) mak tenke sai empregadu fó servisu mós ba ema atu asegura kresimentu ekonomia iha nasaun hodi fó benefísiu ba traballadór sira ne’ebé mak sei servisu. Nia salienta oras nee iha SERVE rejista ona emprezáriu hamutuk rihun rua nulu maibé barak mak laiha atividade no hein de’it ba projetu governu tan nee sei hamate ekonomia rai laran tanba labele hetan ré tornu ho kompaña lokál barak tenke taka.

Maibé Timor-Leste presiza kompaña ne’ebé mak rejistu iha SERVE tenke iha kriatividade hodi hala’o atividade ruma hodi hetan rétornu. Tuir nia, Iha kompaña barak mak buka meius oin-oin atu hetan projetu hosi governu maibé ikus mai labele jere rasik no tenke fa’an fali projetu ba kompaña estranjeiru seluk ne’e signifika katak laiha kapasidade hodi ezekuta potensialidade ne’ebé mak iha hodi la fó benefísiu ba nasaun rasik. Kompaña ho númeru boot tebes ne’ebé mak rejistu iha SERVE maibé laiha asaun ruma hodi realiza atividade.

“Atu involve an iha vida emprendedór labele mehi ba buat boot maibé tenke hahú hosi prosesu ki’ik hafoin bele hetan boot, tanba emprendedór estranjeiru sira sempre mai ho kapitál boot,” Dehan Vice Prezidente CCI-TL Rui Castro. Nia hatutan maibé iha posibilidade boot ba timorona bele kompete ho emprendedór estranjeiru maske ita tenke hahú hosi prosesu ki’ik hafoin bele kompete ho sira. Prosesu hotu lafasil maibé presiza hamosu espíritu no vontade ida di’ak atu bele realiza ba buat ki’ik ruma. (BT)