Asuransi


DÍLI----Haree husi potografia Timor-Leste iha nia aréa Potensial oin-oin hahú husi setór Agrikultura, Turismu nomos Peskas inklui iha aréa balun ne’ebé merese ba iha Zona Indústria hanesan Aréa Tasi-Tolu (Dili) to’o iha Maubara Likisá.

Haree husi Potografia koredor Aréa Tasi Tolu to’o Maubara estratejia tebes ba harii Indústria oin-oin tanbá ohin loron konsege hahú hatur ona nia baze Indústria hanesan Portu Tibar, Indústria Masin, Indústria Minarai inklui mos Industria ba Paking Simente mós. Husi establesementu indústria hirak ne’ebé ohin loron la’o namasa iha koridor Tasi Tolu to’o Maubara konsege hafanun VIII governu Deside aréa refere sai zona Indústria ba iha Futuru Timor-Leste.

Tuir Sekretariu Estadu Ambiente (SEA) Deometrio Amaral hateten katak Ministeriu Comersiu Turismu no Indústria halo ona politika ida atu dezenvolve koridor Dili no Likisá nudar koridor (Zona) indústria ida no ida ne’e hola parte iha futuru instalasaun boot zona Indústria Dili ba Maubara.

“VIII governu Inisia ona plataforma ida iha Maubara atu halo pusat Indústria terpadu ida iha ne’eba no korridor ida ne’e ejiste tiha ona, ita hotu hatene katak iha ne’e iha estasaun mina iha sorin, iha dulas fatuk iha sorin, no ida ne’e nudar atividade Indústria ne’ebé hola parte ba zona Industri,” Dehan SEA Deometrio Amaral wainhira halo Inspesaun ba Kompañia Simente Timor Likisá foin lalais ne’e.

Nia informa katak zona refere sei sai Indústria, Governu Timor-Leste liu husi Sekretariu Estadu Ambiental kontinua nafatin atu proteje Ambiente ne’ebé mak iha. Iha biban ne’e mos Asesor Prinsipál Ministeriu Turismu Comersiu no Indústria (MTCI) Jacinto Rigoberto hateten Timor-Leste nudar nasaun tama iha fase dezenvolvimentu no haree husi potografia TL ninia iha potensialidade tebes iha aréa oin-oin inklui mos iha potensialidade ba asesu

“Ita haree husi Potografia Timor nia ne’ebé poténsialidade no liga mós ba nia asesu, entaun kosta ida husi Dili to’o Loes nudar potensiál tebes ba Indústria ho ida ne’e mak Ministeriu Comersiu Turismu no Komersiu konsidera Zona Dili to’o Loes nudar zona Indústria,” dehan nia ba BT iha Likisa foin lalais ne’e. Nia afirma katak maske ohin loron seidauk iha indústria ne’ebé kompletu maibé hare ba dinamika indústria iha koridor Tibar to’o iha Loes nudár potensial tebes ba Indústria.

“Tan ne’e mesmu iha ne’e la’os Indústria ida ne’ebé kompletu tanbá iha fatin ne’e prosesu posesamentu sementu mos iha fatin ida-ne’e, iha fatin ne’e mos la’os inisiativa Governu nian maibé setór privadu sira mós loke indústria iha fatin ne’e,” afirma nia. Nia informa katak iha aréa refere nudar estratejia tebes ba zona indústria ikus mai governu plánu koridor refere sai nudar koridor indústria ba Timor-Leste.

“Loke indústria iha zona ida ne’e tanbá lokalidade rai ida ne’e serve duni ba indústria sira tanba ida ne’e mos ita haree katak portu boot ne’ebé oras ne’e dadaun ita nia governu harii dadaun no ida ne’e bele fasilita mos,” hateten Jacinto. Nia mos informa katak kona-ba estatutu rai aréa Tibar to’o Loes dala ruma mosu problema maibé governu kontinua esforsu atu oinsa bele solusiona problema ligadu ba estatutu rai iha aréa korridor Tibar to’o iha Loes. (BT)