Asuransi


DÍLI----Governu Australia Promete katak kontinua kria kooperasaun ho Nasaun Timor-Leste nudar nasaun viziñu ba malu no prontu nafatin kria relasaun metin hodi apoiu ba malu hodi hare ba dezenvolvimentu nasaun rai rua nian.

Iha selerasaun loron Espesial Australia nian ne’ebe halao iha Kristu-Rei iha Domingu (26/01) Embaixadór Australia iha Timor-Leste Peter Robert hateten, ho komemorasaun loron Espesiál Nasaun Australia nian, ne’ebé maka akompaña hosi sidadaun Australia iha Timor-Leste hamutuk ho komunidade Timor-Leste balun nudar dalan ida oinsa bele kria lasu amizade entre nasaun Lafaek ho nasaun Kanguru hodi hare ba dezenvolvimentu ne’ebe mak iha.

“Ha’u kontente tebés ba relasaun entre Timor-Leste ho Australia ne’ebé mak iha lasu amizade ida di’ak tebés, tanbá Governu Australia no Timor-Leste iha komitmentu di’ak atu bele kopera malu hodi hala’o servisu iha programa importante balun,” Dehan Embaixadór Australia Peter Robert ba Jornalista BT, iha Pasir Putih, Kristu-Rei, Domingu (26/ 01/20).

Embaixadór ne’e hatutuan, ohin loron Embaixadór Australia hamutuk ho sidadaun Australia iha Timor-Leste no sidadaun timoroan rasik, hodi hala’o eventu ba tinan Australia nian iha Timor-Leste. “Ohin loron atividade nian mak loron Embaixadór Austrália, nu’udar eventu informal ne’ebé mak realiza devertiementu hosi komunidade Australia no sidadaun Timoroan rasik, eventu ida ne’e hanesan selebrasaun komemora loron Australia nian,” dehan nia

Nia dehan Nasaun Australia hasoru dezafiu boot hosi akontesementu ahi sunu rai manas iha teritóriu Asutralia laran tomák, hodi hamosu ema balun mate no barak mak lakon uma no sasan, maibé Nasaun Australia sempre iha komimentu atu bele kopera ho Timor-Leste.

Tanbá ne’e Aban seí iha seremónia entkonru entre funsionáriu senior hosi Australia no Timor-Leste nian. Tan nee reprezentante hosi Austrália nian sei to’o mai aban hodi halo enkontru ho reprezentante hosi Timor-Leste hosi liña Ministerial hotu, sei ko’alia sobre area hotu-hotu hanesan dezenvolvementu, área seguransa, seguransa Marítima hodi servisu iha rejiaun Asia nian.

Embaixadór Australia iha Timor-Leste agradese ba Timoroan sira, espesialmente ba Presidenti da Republika, Primeiru Ministru, ne’ebé mak fó ona suporta ba nasaun Australia iha tempu ne’ebé mak difisil. Embaixadór Australia Peter Robert senti orgullu, tanbá Australia no Timor-Leste asina ona tratadu Fronteira Maritima, ida ne’e hatudu pontu pozitivu katak seí apoiu ba dezenvolvementu iha Timor-Leste.

Momentu furak ba Timor-Leste atu bele halo dezenvolvementu, no ida ne’e prosesu furak ida atu Timor-Leste bele ona hahú atu bele kombate ba peska illegal iha Tasi Timor, liu hosi tratadu Maritima ne’ebé mak hetan ona akordu. Australia mós seí fó tulun Timor-Leste hodi kontrola iha area tasi nian.

Tanbá ne’e Nasaun Australia iha komitmentu atu fó tulun ba Timor-Leste, hodi kesi lasu amizade ida forte liutan, haré hosi programa balun ne’ebé mak realiza ona, entre Nasaun rua, ne’ebé mak bele implementa programa iha area hanesan Veteranu, Edukasaun, Siguransa, nu’udár sinal ida iha Timor-Leste ho Australia, atu saí Nasaun viziñu ida ne’ebé besik malu no Povu Australia no Timor-Leste sempre tulun malu nafátin ba futuru nasaun rai rua nian. (BT)