MOTASUI—Populasaun subdistritu Fatuberliu, distritu Manufahi hato’o esperasaun ba governasaun foun ne’ebe sei mai atu fo atensaun seriu ba problema estrada iha distritu refere, nune’e bele fasilita povu hodi buka moris hadia ekonomia uma laran. Administrador subdistritu Fatuberliu, Tobias Hornai hateten problema importante ba populasaun maka hadia kondisaun estrada.

Oras ne’e kondisaun estrada iha area subdistritu Fatuberliu nia laran maioria aat la permiti ba movimentu transporte publiku atu sirkula ba mai. Ligasaun entre subdistritu, suku, no aldeia susar tebe-tebes ba transporte publiku. “Problema seluk fali konaba problema bee-moos, fasilidade edukasaun, saude no eletrisidade iha sub distritu Fatuberliu,” dehan administrador ba Business Timor semana foin liuba.

Nia informa katak iha aldeia suku balun susar tebes asesu bee moos. Governu presiza fo tulun kanaliza bee-moos ba area suku no aldeia ne’ebe ho kondisaun uma eskola barak mak laprimiti ba estudante. Ba setor saude nian presiza amenta parteira iha sentru saude no postu klinika. “Se governu hakarak hadia povu nia moris, ajuda povu hadia ekonomia uma laran mak setor hirak ne’e presiza fo prioridade. Se lae ita lalika koalia dezenvolvimentu, lalikan hanoin atu hadia povu nia moris,” hateten Administrador Tobias ba BT iha suku Kaikasa, Fatuberliu, Tersa (31/08) semana liuba.

Xefi suku Kaikasa Henrique Antonio de Jesus reforsa tan katak governu foun mai presiza tau atensaun no prioridade ba nesesidade baziku povu nian iha baze hodi nune’e povu ki’ik sira bele asesu ba nesesidade ne’ebe sira presiza,” dehan Henrique. Tuir observasaun BT iha terenu, katak estrada ligasaun Fatuberliu-Alas agora dadaun grave tebes halo motor kareta halai mos la tuir dalan.(R-4)