DILI—Diresaun Nasional Transporte Terestres (DNTT) rekoñese to’o agora seidauk iha diploma ministerial konaba regulamentu tarifa ba transporte publiku hanesan bis, mikrolet no angguna ne’ebe halai entre distritu, subdistritu no suku. Nune’e kondotor sira hasa’e tarifa foun tuir ida-idak nia hakarak deit.

Diretor DNTT Silvestre de Oliveira hateten ba BT Kuarta (25/07) semana liu ba iha ninia knar fatin katak, hahu husi tinan 2003 DNTT iha diploma ministerial konaba tarifa transporte publiku maibe la relevante ona ba situasaun dadaun ne’e. Tanba ne’e iha tinan 2011 no tinan 2012 sira tenta halo proposta ba sira nia ministeriu hodi halo fali diploma foun konaba tarifa tuir survei ne’ebe sira halo ba situasaun riil ne’ebe iha maibe to’o agora la hetan proposta.

Tuir Diploma Ministerial tinan 2003 nebe agora la relevante ona ho situsaun ohin loron mak tarifa ba bus no mikrolet diresaun Dili-Manatutu $1,00, Dili-Baucau $2.00, Dili-Lospalos $4.00, Dili-Vikeke $3.50, Angguna Dili-Aileu $1.00. Bis diresaun Dili-Same$4.00, Dili-Ainaro $4.00 Dili-Covalima $5.0, Mikrolet diresaun Dili-Ermera $1.50, Mikrolet diresaun Dili-Likisa $1.00, Dili-Dare $0.25.

Mikrolet diresaun Dili-Metinaro $0,50, angguna diresaun Dili-Maubisse $3.50, diresaun Dili-Remexio $3.00. Angguna no bis Dili-Atsabe $5,00, travel Diresaun Dili-Kupang $17.00 no ikus liu bis diresaun Dili-Maliana $5.00. Hafoin tinan 2011, tuir survei DNTT kondotor sira hasa’e tarifa hanesan bis no mikrolet diresaun Dili-manatutu $2.00, Dili-Baucau $4.00, Dili-Lospalos $7.00, Dili-Vikeke $7.00, angguna Dili-Aileu $2.50.

Enkuantu bis no angguna Dili-Same $8,50, Dili-Ainaro $8.50, Dili-Suai $10.00, Dili-Ermera $3.5, Dili-Likisa $2.00, Dili-Dare $0,75. Ba tinan 2012, Dili-Metinaro nafatin, Dili-Maubisse nafatin, angguna diresaun Dili-Remexio nafatin, Travel Dili-Kupang $20.00, Dili-Maliana $5.00 sa’e ba $7.00, Dili-Same sa’e ba $9.00, Dili – Suai sa’e hosi $10.00 ba $15.00.

“Agora dadaun DNTT foin bele rezolve konaba tarifa iha kapital Dili maibe konaba distritu seidauk bele rezolve parese forma governu foun mak ami bele halo fali estudu viavelidade ou survei ida iha terenu depois husi depois rekomenda ba ami ministeriu hodi hatun fali diploma ministerial ida mai hodi implementa,”dehan Diretor DNTT.

Nia hatete DNTT labele fo sai tarifa ida enkuantu seidauk halo survei. Nia rekoñese normalmente agora dadaun ne’e iha mudansa ba tarifa transporte diresaun distritu nian tanba kondotor sira hasa’e tarifa konforme sira nia gostu, la tuir DNTT nia orientasaun.(R-4)