Asuransi

DÍLI----Sekretaria Estadu Formasaun Profisionál no Empregu (SEFOPE) públika ona naran kandidatu traballador Timoroan ba Seasonal Worker Programme (SWP) Austrália hosi Munisipiu Díli hamutuk na’in-13.167, kompostu hosi mane na'in-7.923 no feto na’in-5.244. Diretór Nasionál Empregu Exterior, Filomeno Soares hatete, Naran kandidatu traballadór iha tinan 2019 ne’ebé pasa ona no sei tuir teste fiziku, bele asesu iha website Diresaun Nasionál Empregu Exterior (DNEE) http://www.dnee.sefope.gov.tl/

“Ami públika ona naran kandidatu traballadór Austrália ba aplikasaun vaga Seasonal Worker Programme iha ami-nian website. Kandidatu sira konkorre ona iha tinan kotuk no ema ne’ebé mak liu aplikasaun vaga espesiál munisipiu Dili hamutuk na’in-13.167,”informa, Diretór Nasionál Empregu Exterior, Filomeno Soares ba BT, iha ninia kna’ar fatin, Becora, Segunda(14/09).

Tuir planu SEFOPE kandidatu sira sei tuir teste fiziku iha fulan-Setembru nia-laran durante loron-15, hahu 21 Setembru to’o 09 Outubru, iha dader tuku 07:30 to’o 12:30 OTL no iha lorokraik 12:30 to’o 17:30 OTL. “Kandidatu munisipiu Díli sei tuir teste iha loron 21 Setembru no teste sei realiza iha Akadémia Polisia Nasionál Timor-Leste (PNTL) no hosi teste ne’e mak ami sei hare’e hodi selesiona tan kandidatu sira,”informa nia. Naran ne’ebé sai konsege mosu reklamasaun maibé parte SEFOPE kontinua rezolve atu kandidatu sira bele tuir teste ho di’ak. “Iha sistema mosu letra balun sala no balun data moris mak sala, Reklamasaun sira ne'e ami simu komesa ohin to'o segunda semana oin, tanba ne’e ha’u espera sei bele halo ona diskusaun atubele deside,”tenik nia. 

Diretór hatautan, Kadidatu sira ne’ebé dadaun atu tuir teste ne’e ba iha area Agrikultura, maske ho situasaun Covid-19 maibé liu huis SEFOPE matein nafatin prepra Timoroan. “Atu Kandidatu Sai Traballadór Austrália iha area hotu-hotu Tuir Teste ne’e rasik la’os de’it ba fiziku, maibé sei iha teste seluk hanesan Saúde, teste Eskrita, teste Oral, prosesu teste ba Austrália ne'e iha faze hira kedan, laos to’o de’it iha faze teste fiziku,” nia dehan. Nia hakotu, maske ohin loron iha situasaun Covid-19 ne’ebé mak nasaun hotu-hotu afetadu inklui mós Timor-Leste, no Australia sei lockdown hela maibé SEFOPE nia papél halao nafatin nia servisu prepara trabaldores nia mentalidade nia saúde.(BT)