Asuransi

VENILALE----Kondisaun uma Eskola Baziku Sentral Uai-Bua a’at fó difikulta tebes ba prosesu aprendijazen iha tempu udan, tanba udan ben turuk dala barak halo meja no kadeira bokon inklui estudante sira labele tuir aula ho diak tanba zinku uma nian feruzin no barak kuak.

Preokupasaun ne’e hato’o husi adjuntu eskola ensinu baziku sentral Uai-Bua postu administrativu Venilale munisipiu Baukau João Guterres informa, eskola EBC Uai-Bua hari’i iha tempu okupasaun Indonezia to’o agora zinku sira feruzin, uma nia plafon hahu dodok halo sala de aulas menus ba bei-beik, maske volume estudantes barak. Nia afirma problema seluk ne’ebe eskola ne’e imfrenta mak anin mos sobu hotu edisifiu profesores sira nian, mesmu nune’e profesores sira obriga utiliza nafatin sala refere tanba laiha edifisiu apropriadu ba profesores sira.

“Ita bo’ot sira hare ami nia eskola oras ne’e dadauk ninia kondisaun a’at hotu ona tanba Indonezia mak halo hela, ne’ebe ami nia preokupasaun bo’ot mak alunus barak sala aula la to’o ida, hanesan ohin iha ami nia sala hateke sae ba leten hateke borus ba lalehan, inklui ami profesores sira ninia sala anin sobu tiha uma nia kakuluk, maibe ami baku netik fali ho pregu augenta tur iha laran tanba laiha sala propiu ba ami” dehan adjuntu eskola ensinu baziku sentral Uai-Bua postu administrativu Venilale munisipiu Baukau João Guterres ba jornalista sira, Kinta (03/09) bainhira akompaña vizita vise MEJD nian iha eskola refere.

João haktuir eskola EBC Uai-Bua hari’i iha tinan rihun ida atus sia Ualu nolu resin tolu (1983) to’o agora governu mos seidauk dada bee ba eskola erefere, obrigadu parte eskola obriga estudantes sira ba kuru bee iha bee matan. “Problema ida mos ne’ebe eskola imfrenta mak kona-ba bee tanba eskola ne’e hari’i iha tinan 1983 ate a data bee laiha tanba ne’e bainhira fase liman ami nia labarik sira ba kuru bee iha bee matan, hanesan ne’e mos tempu implementa merenda eskolar mos sira ba kuru bee iha bee matan” João informa.

Hatan ba preokupasaun ne’e vise ministru edukasaun juventude no desportu António Guterres rekonese kestaun ne’e tanba kuaze eskola publiku iha teritoriu Timor-Leste kondiasaun a’at inklui bee-moos maibe tuir nia governo Timor-Leste sei la’o hela ho orsamentu dua desimu para responde hotu preokupasaun hirak ne’e maibe la’o neineik. “Enjeral eskola publiku hotu-hotu hau hare nia kondisaun problema, iha ne’e bee-moos araska ita agora uza orsamentu temporariu tanba ita seidauk iha orsamentu jeral estadu (OJE) ita seidauk bele halo buat barak” dehan vise MEJD

Eskola ensinu baziku Sentral Uai-Bua total estudantes hamutuk atus lima, lima nolu resin hat (554), no iha profesores hamutuk na’in rua nolu resin rua (22), profesores sanulu resin ualu (18) funsionariu publiku no na’in haat (4) funsionariu kontratadu. Hakarak informa mos katak eskola filial Uatumisa ne’ebe loke husi komunidade iha tinan rihun rua sanulu resin haat (2014) iha profesores voluntariu hamutuk na’in Ualu (8). (BT)