Asuransi


VIKEKE----Ministru Agrikultura no Peskas (MAP) Pedro dos Reis halo koileta ba hare hamutuk ektares haat nulu (40) iha Demo-área, Munisipiu Vikeke, ne’ebe uza adubu organiku POC Nassa ne’ebé ninia rezultadu hatudu di’ak tebes. Ministru ne’e espera ba oin MAP bele tau atensaun liu iha irigasaun hodi bele fornese bee ba natar kuaze 1100/hektares, agora dadauk natar sira ne’e seidauk uza ho masimu tanba bee la to’o.

“Ohin ita-nia agrikultura na’in hala’o koileta haree iha Demo área ho hektares haat nulu (40) ne’ebe mak utiliza adubus oraganiku POC Nassa, POP Super Nassa no Hormonik, husi adubu sira ne’e hatudu razultadu koileta haree ne’ebe di’ak tebes kompara ho la uza adubu refere,” hatete Ministru MAP, Pedro dos Reis ba jornalista sira iha Demo-área Segunda (17/08).

Nia hatutan, Iha tinan 2021 Ministeriu agrikultura promesa sei hadia irigasaun Bebui, atu nune’e fatin ne’ebe mak lahalo produsan ne’e tenki halo produsaun hotu, maibe husu ba inan aman agrikultor tenki koopera hamutuk iha kanal irigasaun sira ne’ebe mak di’ak. “Kona-ba atu hadia irigasaun Bebui ne’e tinan 2021 mai ami tenki hadia, atu nune’e fatin ne’ebe mak lahalo produsan ne’e tenki halo produsaun hotu, ita tenki halo manuál hodi bele ajuda malu, tenki hamos tutuir atu labele estraga kanal sira, ami mos sei iha hela preparasaun hanesan agora dadauk ami mos lao hela hodi foti dadus identifika hodi trasa ba planu tinan 2021 nian.” tenik Ministru MAP.

Iha fatin hanesan, xefe suku Afaloikai Constantino Guterres hato’o nia obrigadu wain ba Ministru MAP ho nia ekipa tomak ne’ebe mak marka ona prezensa iha seremonia koileta haree ne’e, nia sente kontenti tanba iha seremonia koileta haree ne’e hatudu rezultadu di’ak. Nia mós husu MAP atu bele hadia kanal irigasaun Bebui tanba mota bo’ot tenki halo normalizasaun nune’e bele salva komunidade sira nia natar iha tempu udan.

Nia haktuir iha VI Governu hadia ona metade 800 metru maibe xefe suku ne’e husu atu iha tinan 2021 hadia irigasaun Bebui ne’e. Tanba komunidade sira fiar katak natar 1100 hektar ne’e sei uza hotu ba kuda haree bainhira irigasaun lao di’ak no sei uza adubu POC Nassa hodi muda sistema konvensional ba Pratika Agrikultura Di’ak (PAD).

Entretantu xefe grupu Agrikultor Afloikai Jeremias da Cruz Xavier haktuir, tinan uluk hanesan agrikultor sira kuda ho sistema tradisional nia rezultadu la hanesan, maibe tinan ne’e MAP mai koileta hatudu ona rezultadu produsaun di’ak hafoin sira uza adubus POC Nassa. Apoiu ne’ebe sira hetan mak hanesan: Kapa, Tudik, Botas, Bomba, Insada, Ai-moruk no Adubu POC Nassa.

Seremonia koileta haree ne’e marka prezensa ofisiál husi Ministru Agrikultura no peskas (MAP) Pedro dos Reis, Diretora jerál MAP, Maria Odete do Céu Guterres, Administradór Munisipiu Vikeke, Diretór MAP Munisipiu Vikeke nomós autoridade lokál sira. (BT)