Asuransi


DÍLI----Joventude sira iha Munisipiu Ermera ho inisiativa rasik dezenvolve sítiu turistiku iha Gleno, Munisipiu Ermera hodi dada turista lokál no estranjeiru ba vizita. Xefe turizmu Gleno Eusebio Salsinha Soares hatete inisiativa husi joventude Ermera konsege dezenvolve Gleno sai fatin turizmu primeiru iha Timor-Leste, no fatin turizmu ne’e hahú loke vizitante husi munisipiu 13 mak mai Vizita, inklui mós vizitante husi estranjeiru.

“Ami hari'i buat ne'e fundus laiha, hanoin rasik husi Joventude sira, mai husi Joventude sira nia inisiativa rasik, hahu loke abertura ema kuaze Distritu hotu-hotu mai hodi vizita, tanba ida ne'e entrada primeiru Munisipiu Ermera, no ba distritu sira seluk hotu,” dehan Eusebio Salsinha Soares

Nia salienta, hahú husi sira loke ba vizitante sira to’o ohin loron hetan ona fundus husi vizitante sira hamutuk $2000 no fundus ne’e ohin loron sira depozita iha banku. "Dezde hari'i ami hetan fundu ne’e besik $2000 dadaun ne'e ami tau hela iha Banku, tanba ami sei hanoin ba oin sei hadia buat ruma, maibe osan ne’e joventude nian duni, grupu Joventude sira hari'i ho sira nia inisiativa rasik," nia dehan.

Xefe Joventude dehan, iha planu seluk atu hari’i ho fundus ne’ebé mak sira hetan husi vizitante sira, maibe nia dehan sei iha prosesu nia laran no sei segredu hela. “Iha plano atu halo maibe joventude sira labele relembra lai, ami labele hanoin uluk se ami hanoin uluk entaun iha fatin seluk bele kopia tiha fali, ida ne'e ami nia rahasia,” tenik nia. Nia dehan durante mosu tiha surtu COVID-19 no Timor-Leste aplika estadu emerjénsia vizitante komesa menus tanba ema ladún iha movimentasaun.

“Iha Estadu Emerjensia Ami taka tiha atu prevene moras COVID-19, Distansia Sosial, atu ema labele movimentu ba mai, entaun ami taka tanba kumpri regras husi Saude, depois estadu loke fila-fali mak ami loke fila-fali, maibe vizitante tun tanba turizmu ne'e kleur ona. Husi Joventude sira nia inisiativa dadaun halo kanalizasaun bee mai iha Fatin Turizmu Gleno, Tanba Tanke boot kontribui husi Padre Jejuita sira, Dadaun maske ema nia movimentu normal, maibe vizitante ladun iha no loron ida lahetan fundus bo’ot husi Vijitante sira. (BT)