Asuransi


DÍLI----Ministériu Agrikultura No Peskas (MAP) liuhosi Diresaun Nasionál Agro Komèrsiu (DNAK) halo lansamentu ba fόs lokal Timor nian. Objetivu husi lansamentu ba karon label foun ne’e atu oinsa hatudu timor mos iha ona produtu lokal rasik ho nia marka “Karon Label Fós Lokal Timor”.

Tuir Sekretariu Jerál MAP, César José da Cruz hatete, MAP halo lansamentu Karon label foun ba fós Timor ne’ebé mak durante ne’e produz hosi Asosiasaun CAAKUB ho WEBABA nian.

“Ohin ita halo lansamnetu ida Label foun fós Timor 100%, fόs rai lokál, katak bainhira ita produz fós lokál iha rai laran ita bele uja karon ida ne’e, ho nune’e ita halo lansamentu ba fós-rai ho marka karon foun ne’e tanba ba oin ita iha hanoin bele produz barak liutan atu nune’e timoroan hotu-hotu bele konsumu ita labele depende de’it ba fós rai liur,” hateten Sekretariu Jerál MAP, César José da Cruz ba jornalista sira hafoin remata lansamentu ne’e iha Komoro, Sexta (26/06).

Tan ne’e nia husu ba Timoroan sira tenki serbisu hamutuk ho ajensia Internasionál hanesan JICA no WFP atu bele hare oinsa atu bele hadia kualidade no kuantidade produsaun, maske TL sei hasoru obstaklu barak hanesan diferensia presu ba fós mutin ho metan inklui mos numeru konsumu nain sira mos. Nia mós hatutan, fós-rai dadaun ne’e mai hosi Bobonaro nomos husi munisipiu sira seluk-seluk sei lori mai loja agrikultores, hodi tau fali ba karon foun ne’e hodi manda ba iha loja agrikultores, restaurante sira balun nudar dalan ida atu sensibliza ba komunidade Timor-Leste katak Atu konsumu fós lokál ita nian.

Nune’e, Nia kontinua mós apela ba povu tomak liu-liu funsionariu agrikultura sira atu sosa fós tanba liuhosi sosa fós lokál ne’e bele ajuda agrikultór sira. Iha fatin hanesan, Diretór Nasionál Agro Komèrsiu, (DNAK) Fernando Egídio Amaral mós haktuir katak, dadaun ne’e fόs-rai iha ona loja agrikultores atu nune’e konsumidór sira bele atinji ona produtu lokal Timor nian. “Kona-ba kuantidade ba responde merkadu lokál ita seidauk atinji tanba konsumidores iha Timor tinan ida presiza kuaze 100 mill toneladas maibe ita iha esperansa katak ba oin ita bele produz kuantidade nato’on atu bele responde konsumidores ne’ebé mak presiza duni,” Informa nia.

Nia dehan, Durante ne’e governu hetan apoiu fundus hosi ADB no ajensia Internasionál sira seluk ne’e duni osan ne’ebé mak sira tau ne’e sufisinte atu sosa haree hosi munispiu sira ne’ebé mak foin lalais ne’e koilleta ona hanesan munisipiu Maliana kada semana ami apoiu grupu asosiasaun sira iha ne’eba kada semana sira dulas toneladas 10 hodi oferese mai iha loja agrikultores nune’e mos hosi Oebaba, Raibere, Uatulari, Uatukarbau no Tono sira ne’e ita fiar katak sira sei fornese fós ba merkadu lokál to’o toneladas rihun 3 ou 4.

“Presu saku ida kilo 10 ne’e fa’an ho presu $11,50 Centavus, karon 25 kilos ne’e fa’an ba $26,50 centavos no dadaun ne’e iha kontainer rua iha Ministériu ne’e nakonu ho fós-rai neduni ba konsumidores sira katak kona-ba kualidade fós garante 100 prsentu organiku la kahur ho kimiku,” Esplika nia. Alende ne’e Reprezentantes JICA iha Timor-Leste Masafumi Nagaishi Kontinua relata katak, hanesan reprezentante parseiru dezenvolvimentu sente apresia tebes ba Timoroan sira tanba bele esforsu halo ona produsaun nomos iha ona saku rasik ona.

“Ha’u hakarak apresia esforsu hosi Ministériu Agríkultura no Peskas nomos ekipa projetu ne’ebé mak iha komitmentu bo’ot tebes hodi promove ita-nia fós iha rai laran. Maske agora daudaun ita iha situasaun defisil nia laran durante Surtu Covid-19 nomos udan been ne’ebé mak menus iha tempu udan foin lalais ne’e, ita bo’ot sira hakas an nafatin serbisu hamutuk ho ita nia agrikultór sira hodi bele produz no promove fós-rai iha pais ida ne’e,” Informa nia.

Nia dehan, Durante inferenta Surtu Covid-19 ne’ebé mak afeita nasaun hotu-hotu, ita hotu konsiente katak situasaun ida ne’e hafraku setór ekonomia, ne’ebé mak depende ba supply chain global nomos iha konsiente importansia hosi seguransa alimentar iha rai laran, nasaun barak mak blokeia ou limita sira nia esportasaun ai-han, espesialmente fós iha Asia. No situasaun ida ne’e afeita tebes Timor-Leste hodi nune, seguransa alimentar iha tempu ida hanesan ne’e mais importante tebes kompara ho situasaun antes ita infrenta surtu Covid-19. Iha Timor-Leste fós hanesan ai-han esensial tebes hodi bele asegura estabilidade iha rai laran.

Hanesan ita hotu hatene katak governu japaun liuhusi JICA suporta rehabilita ona eskema irigasaun bo’ot balun iha rai laran, hanesan Maliana I, Laclo, nomos Bluto maibé ita sei hasoru obstaklu barak hodi bele hasa’e produsaun fós-rai, intermus ninia produtividade nomos asesu ba merkadu. Liuhosi projetu fós lokál ne’e, liu-liu atividade relasiona ho output 3, ne’ebe mak kolabora ho MAP, espesialmente diresaun nasional Agro-Komersiu, ita iha espetativa ida katak ita nia fós-rai bele koinesidu liutan hanesan fós ne’ebé ho kualidade diak iha merkadu nomos halo ita-nia konsumidór sira satisfas. (BT)