Asuransi


DÍLI----Ministeriu da Saúde (MS) hamutuk ho Parseiru Dezenvolvimentu Internasional Fundus UNICEF-Sigla Inglesh, iha Timor-Leste ohin loron lansa ona serbisu telefóniku hotline dedikadu ba saúde mental nian dahuluk iha Timor-Leste. Projetu ne’e hanesan parte ida apoiu serbisu prevensaun COVID-19.

Hotline ne’e lansa ona husi Dra. Odete da Silva Viegas, Diretora Jeral Prestasaun Servisu Saúde ho Reprezentativa UNICEF ihaTimor-Leste Valerie Taton, iha Eis SPK Lahane-Dili. Nune’e estabelesimentu hotline ne’e, UNICEF ajuda atu hetan informasaun no rekursu teknolojia komputador inklui monitor no ekipamentu seluk. Alende ne’e, UNICEF sei ajuda mos dezenvolve anunsiu publiku radio no televizaun atu ajuda konsientiza kona-ba hotline sira no serbisu prestadu.

“Efeitu husi pandemia Corona Virus ne’e oi-oin de’it no la deskrimina, Iha Timor-Leste, UNICEF ho ita nia parseiru sira serbisu hela ona atu garante labarik no foinsa’e sira hetan apoiu iha aspetu hotu husi sira-nia moris mak bele hetan impaktu husi krizi ne’e, inklui, krusialmente, sira-nia saúde mentál. Timor-Leste nia foinsa’e mak futurú país nian, tanba ne’e sira-nia saúde aspetu hotu krusial ba dezenvolvimentu país ne’e.” Hateten Reprezentativa UNICEF iha Timor-Leste, Valerie Taton, ba Jornalista sira iha Eventu lansamentu Hotline (12123), iha Eis SPK Lahane-Dili, Kinta (04/06).

Nia hatutan, Iha COVID-19 nia mahon, populasaun husi parte hotu iha moris hasoru aumentu dezafiu tanba mudansa estilu moris ho hotline ne’e. “Ita hakarak atu oferese ba Timor-Leste nia labarik no foinsa’e sira espasu foun ida atu ajuda no apoiu ultrapasa dezafiu bo’ot balun ba ita-nia tempu,” Hateten nia.

Hotline nia operasaun sei halo husi Ministeriu Saúde no PRADET, Organizasaun Naun Governamental lokál mak hala’o kna’ar pisko-sosiál iha Timor-Leste ba tinan 20 ona. Xamada ba hotline sei hatan husi konselleiru formadu iha saúde mentál sira, sira ne’ebé bele oferese apoiu liu husi telefone hanesan mós referral ba serbisu saude sira seluk.

Hotline ne’e mós oferese informasaun ba sira ne’ebé presiza apoiu ba problema saúde xave sira hanesan maternidade, saúde labarik no kuidadu bebé foin moris, nutrisaun no presiza konsellu ba tratamentu saúde jeral ka informasaun saúde nian. “Hotline ba apoiu saúde mental no psikososial no material resposta sira hotu, inklui mensajen radio no televizaun finansia ho fundus husi Governu Japaun. Hotline ne’e gratuita ba fulan neen (6) no sei implementa ho apoiu husi fornesedor serbisu telekomunikasaun iha Timor-Leste hanesanTelkomlcel, Telemor no Timor-Telecom,” Katak nia.

Nia informa, Atualmente laiha ona kazu COVID-19 pozitivu iha Timor-Leste. Husi kazu konfirmadu nain-24 iha país ne’e, pasiente ida-ida rekopera ona no laiha ema ida mate. Estadu emerjensia loron 30 deklara ona iha país ne’e iha 27 Marsu. Halo tiha ona extensaun dala-rua. Periodu dala-ikus previstu ba 27 Juñu 2020. (BT)