DILI- Servisu patroliamentu jestaun ba merkadu kontinua halao nafatin operasaun iha sidade Dili ba balada hakiak sira hanesan fahi no bibi, maibe animal barak maka sei sirkula, hodi halo foer bairu sira. Maria Mendonça, komunidade Fatuhada, husu ba servisu patroliamentu atu kontrola ba animal ne’ebe to’o oras ne’e sei sirkula iha Sidade Dili, ne’ebe halo foer bairru sra no fo impaktu negativu ba saude ema ninian.

“Hau laos la konkorda ho animal sira ne’ebe ita nia maluk sira sei hakiak iha ne’e. Husi estadu nian avizu katak animal iha Dili labele husik, halo luhan hodi nune’e bele sulan, maibe sira la iha konsiensia atu halo tuir no husik bebeik entaun ne’e estraga mos ita nia oan sira nia saude laos kiik deit maibe ba ita ema bot hotu, tanba ninia dois bele halo ita moras,” hateten Maria iha Fatuhada foin lalais ne’e.

Tuir nia hare katak animal ne’ebe maka agora aumenta, tanba laiha patroliamentu husi servisu administrasaun distrital ninian, tanba ne’e nia husu ba Administrador Distrito Dili, atu halo intervensaun lalais ba problema refere, tanba kuandu animal sirkula to’o estrada ninin hatudu sidade Dili nia imajen la diak.Hatan ba preokupasaun ne’e, Administrador Distrito Dili Gaspar dos Santos hateten patroliamentu agora dadauk la’o hela, maibe iha fatin balun maka sira identifika katak animal sei la’o ba mai, maibe kuandu sira hetan sira sei foti medidas hodi nune’e labele sirkula tan iha sidade laran.

“Ami nia patroliamentu jestaun operasaun merkadu Dili ninian agora lao nafatin. Iha fatin ida rua maka animal sei lao, hanesan iha Bidau no mos Audian. Karik ami nia operasional sira maka hetan sira sei hola medidadas ruma,” hateten administrador ne’e ba BT iha salaun MAP wainhira marka prezensa mos ba lansamentu sistema hasa’e aihan iha area rural, segunda foin lalais ne’e. (R-2)