Asuransi


DÍLI----Xefe Gabinete Presidente Autoridade-Rejiaun Administrativa EspesiaL Oe-Cusse Ambeno no Zona Espesial Ekonomia Sosial Merkadu (PA-RAEOA-ZEESM) Agostinho Caet hatete relasiona ho situasaun Corona Virus no estadu dekreta Estadu Emerjénsia ema hotu labele lao sai hodi buka meius atende nesidade lor-loron nian, Gabinete PA-RAEOA-ZEESM iha inisitiva politika ida oinsa bele hare no responsabiliza ba nia emar sira hela iha Dili liliu estudantes sira-nia nesesidade ba aihan nian tanba estudante mak sai xave determinante ba futuru nasaun nian.

“Ohin ita husi Gabinete PA-RAEOA-ZEESM distribui fos saku-10 ba estudante Oe-Cusse Oan sira iha Bidau Lecidere hamutuk ema na’in-20 ba apoiu úmanitária nian,” Hateten Xefe Gabinete PA-RAEOA-ZEESM ba Jornalista BT, iha Bidau Lecidere, Sabadu (16/05).

Nia hateten, Gabinete PA-RAEOA-ZEESM distribui fos saku-10 ba estudante Oe-Cusse Oan sira atu nune’e sira labele hanoin barak ba hahan, sira han aguenta lai uza apoiu sira ne’e hodi bele hatan ba sira-nia saude durante estadu emerjénsia iha Dili. Ho nune’e la’os foin mak apoiu ba sira na’in-20 ne’e maibe kuaze estudantes sira husi Atoni-oan iha Dili barak mak hetan ona apoiu úmanitariu husi Gabinete PA-RAEOA-ZEESM.

“Ita hahu distribuisaun ba fos sira ne’e kuaze fulan ida ona, iha Dili, ita fahe ba estudantes balun iha Tasi-Tolu, Kampung-Baru, Bebonuk, Asrama Ambenu, Manleu-Ana no seluk-seluk tan nomós ohin mak mai iha Bidau Lecidere ho Manleu-Ana balun, Vila-Verde balun, i depois sei kontinua hare estudantes sira par kontinua fó apoiu ba tan,” Esplika nia.

Nia dehan, Estudante sira iha Bidau Lecidere ho Manleu-Ana balun, Vila-Verde balun ne’e sira hetan deit fos maibe hanesan ohin ha’u dehan sira balun ne’e sira hetan apoiu fos, Supermie, Bimoli no Rinso. “Objetivu apoiu ba estudante sira ne’e par oinsa estudante hirak ne’e hakmatek iha Dili hodi aproveita estuda online husi sira-nia estudus universitariu nian par bele konsumu aihan sira ne’e ba sira-nia saude ka aguenta saude sira-nian,” Katak nia.

Nia hateten tan, Gabinete PA-RAEOA-ZEESM apoiu úmanitáriu hare ba dadus fixu seidauk hotu maibe kuaze iha lista ema na’in-250 mak hetan ona apoiu ne’e. Iha inisiu apoiu nesesidade bazika hanesan fos, dala ruma ho Supermie, Bimoli. “Ita hetan apoiu husi emprezariu sira husi Oe-Cusse hanesan iha Dili liliu husi emprezariu Kefi-Oel apoiu fos, Supermie, ho Bimoli nomós ita rasik mak tun direta hodi fahe,” Tenik nia.

Nune’e husi apoiu úmanitáriu ida ne’e Xafe Gabinete PA-RAEOA-ZEESM Agostinho Caet nomós hetan akompaña husi Manager emprezariu Kefi-Oel rasik Fernando Manat. Ikus liu, “Lia menon ba estudante sira, tanba ho situasaun ida ne’e kontinua mantein regras, tanba ita la hatene katak depois estadu emerjensia ida ne’e remata seidauk hatene katak sei estende, maibe la espera katak moras ne’e iha ka laiha, i bele kontinua estuda online ho diak mesmu ho situasaun ne’e maibe ita bo’ot sira-nia susesu ho aprendizajen ne’e lao ho diak, para bele hetan susesu,” Informa nia

Entretantu, Reprezentante estudante ida husi ICS iha Bidau Lecidere Elvira Mariana T. da Cruz haktuir tan, Agradese tebes ba Gabinete PA-REAOA-ZEESM tanba ho hanoin no laran luak tebes ohin mai fó apoiu netik fos Saku-10 hodi atende mak hahan lor-loron nian iha sitausaun estadu emerjénsia atu nune’e labele halo movimentasaun ba mai iha Oe-Cusse.

“Ha’u em nome estudantes sira hotu iha fatin (Bidau Lecidere) ida ne’e, fó obrigado wain ba Gabinete PA-REAOA-ZEESM ne’ebé mak ohin loron hakraik a’an mai ami hodi fó netik fos ba ami hodi han aguenta ba estadu emerjénsia iha Dili. Nune’e ami bele kontinua hala’o ami-nia estudus iha universitária iha Dili liu husi online… ho ida ne’e dala ida tan agradese wain tebes ba apoiu sira ne’e,” Dehan Elvira.

Alende estudante husi Bidau Lecidere ho Manleu-Ana, Vila-Verde balun mak hanesan, Elvira Mariana T. da Cruz, Cipriano José António Obe, Minguel Oqui, José da Costa Elo, Maria Monica Cusi, Vinçensius Elo, Calisto Afoan, Minguel Sufa, Julio José Bobo, Angelina Sufa, Francisco Tolo, Pedronela Hermina Sufa, Francisco Oqui, Andreas Obe, José Punef, António Elo, Angela Mirici Neno, Zacarias Elo Lape, Blandina Mauno no Maksiano Elo. (BT)