Asuransi


DÍLI----Lalehan tanis, udan komesa monu ba rai, mota bee komesa tun husi foho lolon, hodi hamate ema nain 2 no estraga mós komunidade nia uma iha area Bekussi Bekora husi Mota Maloa ne’ebé akontese iha loron Sexta (13/03/20) lokraik kuaze oras rua nia laran.

Tuir Vise-Ministru Obra Públiku (V-MOP) Nicolau Lino Freitas hateten, inundasaun ne’ebé mak akontese iha loron Sexta ne’e komunidade nia uma no ema ida mate, seluk seidauk hetan.

“Ita nia sidadaun nain 5, ida mak mate ida seluk seidauk hetan mate isin, tanbá ne’e mak parte husi Sekretáriu Protesaun Sivíl nian, esforsu atu identifka hodi nune’e bele hatene lolos komunidade hira mak ita nia komunidade sira hasoru iha loron Sexta” dehan Vise-Ministru Obra Públiku (V-MOP) Nicolau Lino Freitas hafoin partisipa iha konferénsia Partidu FRETILIN ba dahat ba Jornalista sira iha Salaun Katedral, Vila-Verde, Sabadu (14/03).

Governante ne’e hatutan, inundasaun akontese iha area Bekussi no Bekora, MOP sei esforsu hela hodi hatun ba jestaun no ekipamentu hodi tun ba Baze atu normaliza. “Ema ne’ebé mak lakon iha tempu inundasaun iha loron Sexta (13/03/20), iha area Taibessi, liu-liu iha Mota Maloa, Vise MOP seí esforsu hodi tun ba baze atu haree no halo mós jestaun ba iha ekipamentu, atu nune’e bele solusiona ba ita nia komunidade sira ne’ebé mak hasoru inundasaun” dehan V-MOP

Nia dehan, akontese inundasaun ne’ebé afeita ba kuaze iha Díli laran tomák, komunidade hotu ne’ebé mak afeita ba iha inundasaun ba ita nia komunidade sira. Tanbá ne’e mak esforsu boot ida husi parte husi Ministeriu Obra Públiku nian, ho nune’e mós akontesimentu iha foho Fatu-Ahi rai monu hodi taka ba estrada ne’ebé fó movimentu ba transporte husi diresaun Munisípiu Lautém, Baucau, Vikeke no Manatuto.

Ministériu Obras Públiku nian, ne’ebé orienta ona ita nia ekipamentu pezadu ne’ebé mak tun direta husi Ministru Obras Públiku rasik ho nune’e mós husi Vise-Ministru. V-MOP, oras ne’e dadaun mos ita nia ekipamentu sira, iha hela iha terenu, atu nune’e bele normaliza fila-fali, iha area risku sira ne’ebé iha kapital Díli laran, hanesan mota Bekussi, Maloa, Manleuana no parte mós Komoro nian no fátin ne’ebé mak ita identifika.

Alende ne’e mós Lider Nasionál Kairala Xanana Gusmão ho Sekretáriu Estadu Protesaun Sivil (SEPS) Alexandrinho de Araujo hamutuk ho komunidade sira iha loron Sabadu (14/03/20) hodi hala’o intervensaun hamos dalan ne’ebé foer iha komunidade nia uma ne’ebé mak hetan dezastre naturais iha Sexta.

Governante ne’e hatutan, oras ne’e daudaun esforsu másimu atu oinsa bele normaliza fila-fali vida Povu nian, maibe la’os tempu badak, tanbá situasaun ida ne’e presiza ba parte hot-hotu hahú husi aldeia too iha ministeriu. Nia dehan inundasaun no dezastre ne’e iha kapital hotu, iha Bidau, Bekora, Bekussi, Mota Maloa no iha Komoro nian oituan, atu hatene lolos dadús ne’e, maibé provizoriumente iha 445 no familia 198, maibé dadús ida ne’e seí Provizóriu no seí presiza tan dadús balun. (BT)