Asuransi


DÍLI----Universidade Oriental Timor Lorosa’e (UNITAL) muda sistema períodu orientasaun sai formasaun ba estudante foun iha ano letivu 2020 hodi nune’e bele lori estudante foun sira koñese di’ak liu universidade molok hahú sira ninia estudu.

Prezidente Komisaun Organizadora Lúcio Filipe Gusmão hateten Universidade Oriental atualmente muda ona objetivu husi prosesu orientasaun ba estudante foun ne’ebé mak uluk ho hanoin atu bele koko estudante nia mentalidade liu husi asaun fíziku ou metal, maibé oras ne’e iha mudansa ona atu utiliza períodu orientasaun hodi sai formasaun ida ba estudante foun.

“Oras ne’e Universidade Oriental hakarak atu utiliza períodu orientasaun ne’e hodi fó formasaun ba estudante foun sira atu bele koñese di’ak liutan ba sira nia ambiente eskola no mós ba magnifiku reitór no estrutura tomak, bele hatene fundadór husi UNITAL rasik, iha tempu ida ne’e mós sira bele koñese sira nia dosente husi fakuldade no departamentu ida-ida nian.

Objetivu ida tan mak atu estudante foun sira bele kria ona lasu amizade entre sira rasik no mós ho estudante tuan sira iha ne’e” dehan prezidente komisaun organizadora Lúcio Filipe Gusmão ba jornalista Business Timor iha Universidade Oriental Bekora Dili, Kinta (05/03/20)

Lúcio Filipe subliña tan períodu formasaun ba estudante foun ne’e sei realiza durante loron 4 nia laran hahú iha dia 4 fulan Marsu 2020 to’o dia 7 fulan Marsu 2020. Total husi estudante foun hamutuk na’in-327 no ba estudante foun ne’ebé mak sei tuir formasaun mak 264 no iha estudante foun balun ne’ebé mak la tuir hamutuk na’in-55 tanba iha kestaun problema privadu balun, maibé estudante hirak nee sei hetan tempu atu bele tuir iha tinan oin mai.

Iha formasaun ne’e mós komisaun tomak sei la utiliza ona hahalok oinsá atu bele fó presaun ba estudante foun sira nia fíziku no metal, tanba ne’e mak husi universidade rasik foti desizaun ida atu muda tiha períodu orientasaun sai nu’udar períodu formasaun hodi hakle’an koñesimentu ne’ebé mak benefísiu ba estudante hotu.

Lúcio salienta iha períodu loron tolu sei iha formasaun liu husi palestra husi magnifiku Reitór UNITAL rasik hodi fahe koñesimentu kona-ba vizaun no misaun husi Universidade UNITAL rasik. Sei mós konvida oradór espesiál balun ne’ebé mak sei halo mós palestra kona-ba asuntu importante relasiona ho vida estudante iha universidade oinsá estudante ida atu bele hatene di’ak liutan sira nia devér no direitu hodi hala’o sira nia knaar ho di’ak.

“UNITAL hakarak atu forma estudante ida ne’ebé mak bele hamosu mudansa ba nia karakterístiku rasik bainhira tama iha komunidade nia leet no sai nu’udar exemplar ba asaun pozitivu balun liuhusi nia hahalok rasik’’ dehan prezidente komisaun organizadora Lúcio Filipe Gusmão

“Husu ba Komunidade tomak liu-liu ba inan aman husi estudante sira hotu katak labele duvida ho kualidade husi Universidade UNITAL nian tanba oras nee UNITAL mós hetan akreditasaun husi Asosiasaun Nasionál Avaliasaun ANA husi Ministériu Edukasaun ba asuntu Ensinu Superior.’’

Oras nee UNITAL hatudu ona pasu pozitivu balun tanba iha estudante graduadu barak mak hetan ona serbisu iha parte governu, NGO no balun bele kria rasik serbisu ba sira nia an, dehan nia. (BT)