Asuransi


DÍLI----Oras nee Café no Restaurante K2C disponivel ona hodi promove produtu lokál Timor-Leste nian no ida ne’e dalan ida oinsa bele mós kompete iha vida emprendedoria.

Diretór Kompaña Café no Restaurante K2C Augusta Da Silva hateten objetivu loke Café no Restaurante refere oinsa atu bele promove produtu lokál hodi bele hetan valor ba komunidade nasional no internasionál sira.

“Tuir esperiénsia ne’ebé mak iha durante servisu ho ema estranjeiru sira iha tinan barak bele duni aprende buat barak kona-ba Cafetaria nian, hodi prepara Café ho modelu oin-oin, no oras nee pesoalmente bele ona atu kria rasik no hamosu inisiativa atu estabelese Café K2C.” Dehan Diretora Cafeteria Augusta Da Silva ba jornalista sira iha Acait, Dili, Segunda (03/02)

Nia esplika katak liu hosi harii Café no Restaurante refere nudar Pontu ida ne’ebé hetan inspirasaun hosi ninia belun emprezáriu sira ne’ebé mak oras ne’e hamahun an iha organizasaun Câmara Komérsiu e Indústria. Tan ne’e hosi inspirasaun no mos esperensia servisu konsege esforsu hodi establese Cafeteria K2C, liu hosi prosesu inisiu ne’ebé mak lafasil maibé hakarak hala’o papél importante ida atu hamosu idea inovativu ba produtu lokal hodi bele kompete ho produtu mai hosi rai liur.

“Observa katak komunidade barak tebes ba iha interese boot konsume produtu mai hosi rai liur tan liu hosi idea inovativu no kriativu ne’ebé sira iha. Tan nee sai obstaklu ida ba Cafeteria K2C hodi bele mós promove produtu lokál ho idea inovativu atu bele kompete ho produtu rai liur.” Dehan Diretora Cafeteria K2C Augusta Da Silva

Nia hatutan hosi idea foun ne’ebé mak iha bele produs kafé Timor sai Cappuccino, Glate, Latemakiatu no seluk tan tanbá hakarak iha futuru, Timo-Leste nia produtu lokál ne’ebé mak iha kualidade a’as tebes bele ona kompete iha merkadu nasionál no internasionál. Tanba oras nee ita iha produtu internasionál ba Café nian ne’ebé mak promove hela hosi kompaña Gloria Jean Café. Iha futuru Café K2C bele mós halo kompete ho Cafeteria internasionál sira iha Timor-Leste.

Iha tempu liu ba iha ona esperiénsia hodi hala’o negósiu nee ho ki’ik tan nee iha ona konsumidór permanente balun hanesan langanan no konsumidór hirak nee mak sei kontinua mai hodi sosa no sei dada konsumidór seluk hodi mai tan.

“Hakarak hato’o mensajen ba komunidade hotu iha Timor-Laran espesiálmente iha sidade Dili bele hakat mai hodi pasa tempu ho kolega sira hodi hemu Café orijinál Timor nian ne’ebé mak ho kualidade di’ak. Iha Cafe K2C mós loke Restaurante hodi prepara hahán furak tuir gostu ema Timor nian ne’ebé mak ho folin asesivel ba ema hotu,” katak nia. (BT)