Asuransi


DÍLI----Governu liu hosi Konsellu Ministru (KM) Aprova ona Órsamentu Duodesimál ba Fulan Fevereiru nian hamutuk Millaun $116.449.057. Tan ne’e, Governu deside aprova Órsamentu Duodésimu tanba ho razaun Órsamentu Jerál Estadu (OJE) 2020 agora seidauk iha aprovasaun no provizoriamente sei uza Órsamentu Duodésimu ba iha fulan Fevereiru.

Tuir Prezidente Konsellu Ministru Agio Pereira hatete iha reuniaun Konsellu Ministru Extraordinaria Ministra Finanças aprezenta sobre diploma Govenu nian ba aplikasaun regime duodesimál, ne’ebé Governu deside aprova Órsamentu duodésimu hamutuk dollar Amerikanu milaun $116.449.057 no Órsamentu ida ne’e fahe ba kategoria haat (4) oinsa bele atende servisu boa governasaun administrasaun publiku.

“Ohin governu liu hosi KM aprova dekretu ezekusaun ba adotasaun Órsamentu tempόraria ba fulan Fevereiru nian, fiksa ho montante dollar Amerikanu milaun $116.449.057,” hateten Prezidente Konsellu Ministru Agio Pereira ba jornalista sira hafoin remata enkontru iha Salaun Konsellu Ministru, Kuarta (05/2).

Nia dehan, Governu deside sobre aplikasaun regime duodesimál tanba OJE 2020 laiha, nune’e aprova Órsamentu refere atu bele atende ba boa servisu administrasaun hodi hein Órsamentu Jerál Estadu. Tan ne’e, Órsamentu refere fahe ba kategoria haat (4), mak hanesan, Salariu Vensimentu, Bens no Servisus, Transferensias Publikas, no Kapital Dezenvolvimentu.

Alende kona-ba kategoria ha’at nemak, “Salariu Vensimentu U$D17.852.076, ba Bens no Servisus U$D38.614. 980, depois Transferensias Publikas U$D26.591.048, nomos ba Kapital Dezenvolvimentu U$D33.390.953 i soma hamutuk total U$D116.449.057,” Tenik nia.

Nia haktuir, Órsamentu ida ne’e mόs la inklui kapital menor hanesan fulan kotuk Janeiru nian tanba aplikasaun regime duodesimal ne’ebé iha hanesan atu atende ba servisu boa governasaun nian. Tanba ne’e, tuir diskusaun katak Ministeriu Finanças sei halo distribuisaun kada Ministerial atu nune’e kada ministeriu bele kontinua halo adotasaun ba ezukusaun Órsamentu fulan Fevereiru nian.

Ne’e Dunik, governu deside aplika duodesimal hetan partisipasaun hosi Primeiru Ministru (PM) Taur Matan Ruak, Prezidente Konsellu Ministru (PKM) Agio Perreira, Ministra Finanças Interina (MFI) Sara Lobo Brites, Ministru Transporte no Komunikasoens (MTK) José Agustinho, Ministra Edukasaun Joventude no Deposrtu (MEJD) Dulce de Jesus, Ministru Agrikultura no Peskas (MAP) Joaquin Martins, Ministru Komersiu Assunto Ekonomiku (MKAE) Fidelis Magalhães, Ministru Obras Publikas (MOP) no Ministeriu do Ensinu Superior Siensia no Kultura (MESSK) Longuinhos Dos Santos. (BT)