Asuransi


DÍLI----Embaixada Japaun iha Timor-Leste liu husi Japan Internationál Cooperation Agency (JICA), ne’ebé mak durante ne’e hala’o nia programa kona-bá Asosiasaun Alumi JICA iha Timor-Leste, ne’ebé mak kria ona Membru Alumi husi JICA nian hamutuk 1200.

Programa ida ne’e hanesan liu husi Mini Grant no Projetu ki’ik sira, ne’ebé durante JICA fó apoiu liu husi Orsamentu hodi bele hala’o programa no planu saída mak sira iha. Tanbá óras ne’e Membru Alumi husi JICA nian hamutuk ema 1200, ne’ebé mai husi Instituisaun Governu, Sosiedade Sivíl no UNTL, ne’ebé hetan suporta husi JICA, tanbá durante ne’e tuir treinamentu iha Japaun.

Tuir Xefí Reprezentante JICA iha Timor-Leste Nagaishi Masafumi hateten, objetivu husi atividade refere oinsa bele akumula ideia ne’ebe mak husi membru alumi JICA nian, atu nune’e implementa ba programa ne’ebé mak iha.

“Objetivu husi aktividade ida ne’e hanesan ita hotu hatene, iha tinan kotuk lansamentu ba Asosiasaun Alumi JICA Timor nian, objetivu atu hala’o enkontru ida ne’e hodi nune’e bele akumula ideia husi membru alumi sira hotu,” dehan Xefí Reprezentante JICA iha Timor-Leste Nagaishi Masafumi, ba Jornalista sira iha Hotel Timor (HT), Sexta (31/01).

Xefí JICA iha Timor-Leste afirma katak, programa planu annual ida ne’e, oinsa fó ideia ba malu hodi nune’e aktividade ne’ebé mak Mini Grant Projetu iha hodi nune’e JICA fó apoiu liu husi Orsamentu atu nune’e bele hala’o atividade ne’ebé iha.

“Tanbá ne’e atu halo programa planu annual balun ninian, ne’ebé mak fó sira nia ideia, ba oin atu hala’o aktividade saída nian, liu husi Mini Grant Projeitu, no projeitu ki’ik oan sira, ne’ebé mak propoin mai husi JICA, hodi bele JICA fó suporta liu husi Orsamentu hodi bele implementa programa no planu ne’ebé mak sira iha,” tanbá ne’e

Xefí JICA dehan, aktividade ida ne’e Alumi JICA nian, sira ba tuir treinamentu iha Japaun, sira hetan ona esperiensia ho hetan matenek husi Japaun, antes sira fila mai Timor-Leste, halo planu sira nia aktividade, saída mak atu hala’o, hafoin remata treinamentu iha Japaun.

Nia dehan, Alumi husi JICA nian kuaze hamutuk ema 1200, óras ne’e dada’uk saí ona Membru Alumi husi JICA nian, membru sira ne’e mai husi Liñas Ministeriais sira, husi Instituisaun Governu nian, Sosiedade Civil, NGO ho UNTL sira hotu, Membru Alumi JICA tanbá hetan suporta husi JICA ba tuir treinamentu iha Nasaun Japaun fila mai sira iha diretu atu saí Membru Alumi JICA nian iha Timor-Leste.

Tanbá ne’e nia haforsa liutan, Japaun nia annual fiskal, ne’e hahú husi fulan Abril até fulan Marsu, agora dadauk seí iha annual fiskal ba tinan 2019 nian, tinan ida ne’e nian seí hahú iha fulan Abril, to’o fulan Marsu tinan 2021.

Xefí Reprezentante JICA iha Timor-Leste Nagaishi Masafumi argumenta, Programa prioridade ne’ebé husi JICA nian, iha pilar tolu primeiru Infraestrutura, Segundu Diversifikasaun Indústria liu husi área Agrikultura, Turizmu no Indústria no ikus liu Asistensia ba Servisu Sosiál, iha area Saúde, Polísia Komunitária no fó bolsu estudu ba timoroan kada tinan.

Nia esplika ba Jornalista sira katak, kada tinan Embaixadór Japaun iha Timor-Leste liu husi JICA fó bolsu estudu ba timoroan sira hamutuk na’in-8, maibé programa ida ne’e naran GDS, ne’e hanesan fundu ne’ebó fó gratuita, hodi suporta ba timoroan sira, hala’o estudu iha Japaun, hodi hasai sira nia Mestradu ho Dotoramente.

Tanbá ne’e kandidatu sira ne’ebé husi JICA fó anunsiu sira bele aplay, ne’e husi Liñas Ministeriu sira hotu, iha oportunidade no posiblidade atu bele aplay, atu aplika ba bolsu estudu ida ne’e. Iha sorin seluk Diretor Jerál Instituisaun Nasionál de Administrasaun Públika (INAP) Agostinho Letensu De Deus haktuir tan, annual husi JICA kria iha tinan kotuk, kada tinan membru alumi annual bele tur hamutuk hodi diskuti ba programa tinan ida nian.

“Objetivu ba aktividade ida ne’e hanesan ita hotu hare rasik, annual husi JICA sira, annual JICA ne’e kria iha tinan kotuk, kada tinan ita espera katak, ita hotu ne’ebé mak partisipa iha alumi annual ne’e bele tur hamutuk diskuti ba programa tinan ida nian,” dehan DJ INAP

Nia esplika, tinan ida ne’e iha inisiu fulan Janeiru, alumi sira seí tur hamutuk hodi bele hala’o diskuti ba programa ba oin, no Mitin ida ne’e mós importante tebés, tanbá liga mós servisu INAP nian, ne’ebé mak INAP hanesan sentru ida, atu halo koordena kapasitasaun ne’ebé mak liga ho Governu Japaun nian.

Tanbá ne’e enkontru Alumi ida ne’e, INAP mós bele kaña tan, no ideia no input barak oinsá hodi bele propoin mós ba Governu Japaun liu husi JICA, ba programa ne’ebé mak nesesita duni ba ita nia nasaun.

Nia dehan, Governu Timor-Lsete liu Ministéiru Negósiu Estranjeiru no Kooperasaun Asina Akordu ho Ministériu Negósiu Estranjeiru husi Japaun nian, hodi bele kada tinan fó bolsu estudu hamutuk nain-8 ba funsionáriu sira, tinan kotuk ba faze primeiru iha ona ema nain-8, ne’ebé óras ne’e hala’o hela estudu iha Úniversidade iha Japaum. (BT)