Asuransi


DÍLI----VIII Governu Konstituisional liu husi Ministeriu Transporte no Komunikasaun (MTK), dada’uk ne’e koopera hela ho Governu Japaun liu husi Ajensia JICA, hodi konstrui tan portu regional iha Timor-Leste.

Tanbá ne’e Politika husi VIII Governu nian, oinsá mak bele kria kondisaun liu-liu transporte Maritima nian, atu nune’e bele fasilita komunidade sira ne’ebe mak parte Norte no Sul iha Timor-Leste. Tanbá durante ne’e Transporte Marítima, liu-liu Ró pasajeiru sira Berlim Nakroma, durante ne’e opera deit iha Dili, Atauro no Oekussi, maibé komunidade sira parte Norte no Sul, durante ne’e nunka asesu ba Transporte Marítima nian.

Tuir Ministru Transporte Komunikasaun (MTK) José Agostinho Da Silva Reprezenta VIII Governu Konstituisionál hateten, objetivu enkontru ida ne’e importante tebés, oinsá bele fahe infomasaun kona-bá programa dezenvolvimentu ba fasilidade Portu Marítima nian, ne’ebé mak Governu Japaun liu husi Ajensia JICA seí konstrui Portu Regionál sira iha Timor laran tomák iha Kosta Sul no Norte.

“Eventu ida ne’e importante tebés, eventu ne’e realiza kooperasaun entre Governu Timor-Leste ho Governu Japaun, ne’ebé mak liu husi JICA, ho objetivu mak atu oinsá bele fahe informasaun kona-bá programa dezenvolvimentu fasilidade Portu Marítima ninian,” dehan MTK José Agostinho Da Silva hafoin remata enkontru ho Governu Japaun iha sala enkontru MTK Merkadu Lama, Kuarta (29/01).

Governante ne’e hatutan, atu Konstrui tan Portu Regionál hamutuk Lima (5) iha Timor laran tomák, hodi nune’e komunidade sira parte Norte no Sul bele asesu hotu ba transporte Marítima. “Atu konstrui tan Portu Regionál hamutuk lima, Munisípiu Lautém iha Lore, Munisípiu Baucau iha Kaira-Bela, Munisípiu Vikeke iha Beaçu, Munisípiu Same iha Betanu, Munisípiu Kovalima iha Suai no iha Munisípiu Same, hodi nune’e komunidade sira mós bele asesu transporte Marítima,” dehan nia

Tanbá ne’e Politika VIII Governu nian, atu halo ligasaun ba Liña Maritima parte Norte no Sul, hodi nune’e Governu bele oferese tan, meius Transporte Marítima ba ita nia populasaun sira ne’ebé iha Munisípiu sira mak hanesan Lospalos, Manatutu, Baucau, Vikeke, Same no Suai.

Ministru ne’e informa ba Jornalista sira katak, futuru Timor-Leste nia planu, oinsá mak trasa planu ida ne’ebe mak di’ak, ligadu ba Portu sira, Portu Marítima no Portu Regionál sira, konstrusaun Portu iha Timor-Leste ne’ebé mak apoiu makás ita nia Parseiru Japaun liu husi JICA. Tanbá ne’e mak ita nia parseiru dezenvolvimentu importante tebés, oinsá mak ba futuru, ita halo ligasaun ida ne’ebe mak di’ak, sira mós fó asistensia téknika hodi dezenvolve ita nia Portu Regionál sira.

MTK esplika, Governu Japaun liu husi Ajensia JICA, oinsá mak dezenvolve tan ita nia Portu Rejionál sira, ba estudu viabilidade ba dezenvolvimentu Portu Regionál sira, hanesan iha Portu Kaira-Bela iha Munisipiu Baucau, Portu Lore iha Munisipiu Lautém, Beaçu Munisipiu Vikeke, Betanu Munisipiu Same no Suai.

MTK José Agostinho haktuir tan, iha Portu hirak ne’e importante tebés, ba dezenvolvimentu Setór Transporte Marítima nian, Governu iha politika kooperasaun ho Governu Alemaña, oinsá mak halo ligasaun Fronteira Marítima ba parte Norte no Sul. Nia klarifika liutan, iha planu oinsá konstrui tan ita nia Ró Pasajeiru Berlin Nakroma II, ida ne’e tau ona ba planu, liga ho asuntu ida ne’e, oinsá mak ita dezenvolve Setór Portu Regionál sira, liu-liu infraestrutura sira.

Reprezenta Japan Internationál Cooperation Agency (JICA) iha Timor-Leste, Shini Yokohori hateten, Governu Japaun liu husi JICA prontu fó apoiu nafátin ba Estadu Timor-Leste, ne’ebé mak iha Dezenvolvimentu. JICA seí prontu hodi fó apoiu ba Nasaun Timor-Leste, iha area dezenvolvimentu, ba Portu Regionál sira inklui mós Illa Ataúro, ne’eb mak agora JICA iha hela prosesu ida ba estudu viabilidade kona-bá Portu sira.

Reprezentante JICA iha Timor-Leste ne’e hatutan, iha tempu besik peritu sira husi Japaun liu husi Ajensia JICA ne’ebé mak seí mai diretamente ba iha area Regional sira ne’ebé mak Governu Planu atu Dezenvolve ba Portu sira ne’e, no ami rasik mak sei hala’o survei. Tanbá ne’e nia dehan, ita hotu hatene katak, estudu viabilidade ne’e seí hahú iha Fulan ida ne’e, espera katak, peritu sira mai husi Japaun seí to’o iha Timor-Leste hanesan planu ona iha Fulan Fevereiru ba tinan ida ne’e, estudu viabilidade ne’e mós hala’o iha Fulan Setembru no Outubru ba tinan ida ne’e.

Nia dehan, JICA sempre apoiu Governu Timor-Leste, iha area dezenvolvimentu inklui mós infraestrutura, maibé iha tinan ida ne’e JICA seí hare iha área ne’ebé mak Governu tau prioridade hodi nune’e ajénsia JICA konstrui. Tanbá ne’e mak, agora daudauk JICA hare hela posibilidade ruma, atu apoiu ruma ba iha Setór Infraestrutura balun iha Timor. (BT)