Asuransi


DÍLI----Ministériu Agrikultura no Peska (MAP) Parseria ho Organizasaun Internasional hanesan UNDP hodi dezenvolve programa konservasaun ekosistem iha area tasi ibun. Tuir Ministru Agrikultura no Peska (MAP) Joaquim Gusmão Dos Reis Martin, hatete, atu dezenvolve programa konservasaun ba ekosistem iha area Costa Marítimu, MAP koopera ona ho UNDP atu tulun realiza no dezenvolve program refere iha munisípiu lima (5) mak hanesan Munisipiu Manatutu, Lautem, Vikeke no Munisipiu Covalima.

‘’Programa nee realiza ona iha tinan ida nee maibé hakarak atu halo tan akordu no parseiru UNDP atu bele halo akordu ba kontinuasaun programa ba konservasaun iha area costa nian durante tinan tolu ba oin.’’ Dehan Ministru Agrikultura no Peska (MAP) Joaquim Gusmão Dos Reis Martin ba Business Timor (BT) iha Suai-Room, Timor-Plaza, Díli, Segunda-Feira (16/12/2019)

Programa refere atu prepara formasaun ida-ne’ebé adekuadu ba komunidade sira ne’ebé hela iha area tasi ibun oinsá bele kapasita sira hodi hasa’e konsensia, nune’e bele konserva Balada Tasi sira hanesan Lenuk no Ikan sira ne’ebé mak menus daudaun ona iha tasi laran, no mós oinsá atu bele proteje Ahu Ruin sira. Ida-nee intervensaun governu hodi proteje riku iha tasi-laran.

Nia hatutan tan katak tuir planu sei loke tan area protejidu iha tasi Lospalos atu nune’e aumenta tan area ne’ebé mak balun ba komunidade atu labele halo peska hodi bele konserva Balada Tasi ne’ebé mak presiza tebes atu dezenvolve sira nia númeru tanbá besik atu lakon ona iha tasi laran. ‘’Timor-Leste sai mós membru hosi programa konservasaun Balada Tasi iha Asia Pasífiku tan nee, governu Timor-Leste liu hosi ministériu Agrikultura no Peska so bele prepara apoiu téknika de’it no Órsamentu sei mai hosi UNDP rasik.’’ Dehan Joaquim.

Nia mós husu ba komunidade sira hotu ne’ebé hela iha tasi ibun, espesiál liuba peskadór hotu iha Timor laran tomak atu bele tau konsensu no hanoin ida di’ak hodi bele preoritiza programa konservasaun ba Balada Tasi no Ai-horis sira iha tasi laran atu labele prejudika ba risku nasaun no afeita ba mudansa klimátika ne’ebé mak oras nee sai problema boot iha mundu tomak

Iha biban ne’e mós Diretora UNDP Munhtna Altangerel hateten objetivu ba projétu konservativu iha area tasi nian mak atu oferese formasaun ba komunidade sira liu-hosi estratéjia governu nian atu dezenvolve area prioridade iha tasi nian hodi komunidade sira bele iha konsensa no koñesimentu atu kuidadu no próteze balada tasi ne’ebé moris iha ambiente tasi. Tan ne’e UNDP sei prontu atu kontinua apoiu hodi promove hanoin pozitivu ba peskadór sira atu bele próteze Lenuk, Ikan no Ai-horis balun iha tasi laran atu bele estraga hodi fó risku ba tasi rasik. (BT)